Ko ha Taimi ke Fakahā Ai ha Meʻa Fakapulipuli

Ko hono tauhi ha meʻa fakapulipuli pau ʻe lava ke ʻuhinga iá ko e faikehekehe ʻi he vahaʻa ʻo e melinó mo e fakakikihí. Ka ʻoku ʻi ai ha taimi ke fakahā ai ha meʻa fakapulipuli? Fakatokangaʻi ʻa e meʻa ʻoku leaʻaki ʻe he palōfita ko ʻĒmosí fekauʻaki mo hono ʻOtuá: “Talaʻehai ʻe fai ʻe Atonai Sihova ha meʻa, ka te ne fukefuke ki heʻene kau tamaioʻeiki ko e kau palofita ʻa e meʻa kuo tuʻutuʻuni [“meʻa fakapulipulí,” NW].” (Emosi 3:7) Mei he ngaahi lea ko ʻení, ʻe lava ke tau ʻilo ha meʻa fakapulipuli. ʻOku tauhi nai ʻe Sihova ha ngaahi meʻa fakapulipuli pau ki ha vahaʻa taimi pea faai atu pē ʻo ne fakahā kinautolu ki ha faʻahinga ʻe niʻihi. ʻE lava fēfē ke tau faʻifaʻitaki kia Sihova ʻi he fekauʻaki mo e meʻá ni?

ʻI he taimi ʻe niʻihi, ʻoku ʻilo ʻe he kau tauhi-sipi ʻosi fakanofo ʻi he fakatahaʻanga Kalisitiané ʻa e ʻaonga ke tauhi ai ha meʻa pau ʻo ʻikai ke fakahā. (Ngāue 20:28) Hangē ko ʻení, ʻi he fakakaukau atu ki ha ʻaonga ki he fakatahaʻangá, ʻoku nau fili nai ke tauhi ha ngaahi fakamatala ʻo ha ngaahi fokotuʻutuʻu pe liliu ʻe niʻihi ʻo ha ngaahi fatongia ʻi he fakatahaʻangá kae ʻoua ke aʻu ki ha taimi pau.

Kae kehe, ʻi he tuʻunga peheé, ʻoku mahuʻinga ke fakamahino ki he faʻahinga ʻoku nau kau ki aí ʻa e taimi pea mo e founga ʻe fakahā ai ʻa e meʻá. Ko hono ʻilo ʻa e taimi ʻe toki fakahā ai ʻa e meʻá ki he kakaí ʻe tokoni nai ia kiate kinautolu ke tauhi maʻu ʻa e fakapulipulí.​—Palovepi 25:9.