“Koe Fefine Agalelei Koe”
Ko e ngaahi lea fakaongoongoleleí ni naʻe fai ia ki ha fefine Mōape kei siʻi. Ko ha uitou ia ko hono hingoá ko Lute, ko e ʻofefine-ʻi-he-fono ʻo ha fefine ʻIsileli, ko Nāomi. ʻI he nofo ʻi ʻIsileli ʻi he taʻu nai ʻe 3,000 kuohilí, ʻi he taimi naʻe pule ai ʻa e kau fakamāú, naʻe maʻu ai ʻe Lute ha hingoa lelei. (Lute 3:11, PM) Naʻe anga-fēfē ʻa ʻene maʻu ʻa e ongoongo ko ʻení? Ko hai ʻe lava ke ne maʻu ʻaonga mei heʻene faʻifaʻitakiʻangá?
ʻOku ʻikai ko ha tokotaha ia naʻá ne kai ʻa e “ma ae fakabikobiko,” naʻe ngāue fuoloa mo tōtōivi ʻa Lute ʻi ha tuʻunga ko ha tokotaha tātānaki ʻi he ngaahi ngoueʻangá, ko ʻene tōtōiví naʻá ne ʻai ai ia ke ne maʻu ʻa hono ongoongo leleí. Naʻa mo e taimi naʻe fai atu ai ha tokoni ke fakasiʻisiʻi ʻa ʻene ngāue lahí, naʻá ne kīvoi hokohoko atu pē, ʻo fai pehē ʻo lahi ange ia ʻi he meʻa naʻe ʻamanekiná. ʻI he tuʻunga tuʻu-ki-muʻá, naʻe feʻungamālie mo ia ʻa e fakamatala ʻa e Tohitapú ko ha uaifi fakamālōʻia, fita, mo faʻa ngāue.—Palovepi 31:10-31, PM; Lute 2:7, 15-17.
Ko e ʻulungaanga fakalaumālie ʻo Luté—ko ʻene anga-fakatōkilaló, mo ʻene ʻulungaanga feilaulauʻi-kitá pea mo ʻene ʻofa mateakí—ko e ngaahi meʻa tefito ia ki he ongoongo lelei naʻá ne maʻú. ʻI hono liʻaki ʻa ʻene ongo mātuʻá pea mo hono fonua tupuʻangá, fakataha mo e ʻamanaki ko hono maʻu ha maluʻanga ʻe ʻomai ʻe he nofo malí, naʻá ne pīkitai ai kia Nāomi. ʻI he taimi tatau, naʻe fakahāhā ʻe Lute ha holi ke tauhi kia Sihova, ʻa e ʻOtua ʻo ʻene faʻē-ʻi-he-fonó. ʻI hono fakamamafaʻi ʻa hono mahuʻingá, ʻoku pehē ʻe he fakamatala Fakatohitapú naʻá ne “lelei lahi [kia Nāomi] i he tama tagata e toko fitu.”—Lute 1:16, 17; 2:11, 12; 4:15, PM.
Neongo ko e fakamālōʻiá ʻa e lēkooti lelei ʻo Lute ʻi he lotolotonga ʻo hono kaungāfeohi fakaetangatá, ko e mahuʻinga lahi angé ko hono fakafuofuaʻi lelei ʻe he ʻOtuá ʻa hono ngaahi ʻulungāngá pea mo ʻene fakapaleʻi ia ʻaki ʻa e monū ʻo e hoko ko e kui fefine ʻa Sīsū Kalaisi. (Mātiu 1:5; 1 Pita 3:4) Ko ha faʻifaʻitakiʻanga lelei ē ʻa Luté ʻo ʻikai ki he kakai fefine Kalisitiané pē ka ki he kotoa ʻo e faʻahinga ʻoku taku ʻoku nau lotu kia Sihová!