ʻE Lava Fēfē ke Tokoniʻi Koe ʻe he Kau Sangato Moʻoní?
ʻI HE ngaahi Konga Tohitapú, ko e foʻi lea faka-Kalisi ʻoku fakalea ko e “sangató” ʻi he ngaahi liliu ʻe niʻihi ʻoku lava ke liliu ia ko e “tokotaha māʻoniʻoni.” Ko hai naʻe ngāueʻaki ki ai ʻa e kupuʻi leá? “ʻI he tuʻunga palulalí, ʻi he lave ki he kau tuí,” ko e fakamatala ia ʻa e An Expository Dictionary of New Testament Words, “ʻoku fakahingoa ʻaki ia ʻa e faʻahinga kotoa ko iá pea ʻoku ʻikai ke ngāueʻaki pē ia ki he faʻahinga ʻi he tuʻunga māʻoniʻoni hāhāmolofiá, pe ki he faʻahinga naʻe fakafaʻahinga ʻi heʻenau maté ʻaki ʻa e ngaahi ngāue fakasangato anga-kehe.”
Ko ia ai, naʻe fakahingoa ʻe he ʻapositolo ko Paulá ʻa e kotoa ʻo e muʻaki kau Kalisitiané ko e kau sangato moʻoni, pe faʻahinga māʻoniʻoni. Hangē ko ení, naʻá ne lea ʻi ha tohi naʻe hiki ʻi he ʻuluaki senituli T.S. “ki he jiaji oe Otua oku i Kolinito, fakataha moe kaiga maonioni fulibe oku i [he vahefonua Loma ʻo] Akeia kotoabe.” (2 Kolinito 1:1, PM) Ki mui ai, naʻe fai ʻe Paula ha tohi “kiate kinautolu kotoabe oku i Loma, oku ofeina e he Otua, kuo ui ke maonioni.” (Loma 1:7, PM) Ko e faʻahinga māʻoniʻoni ko ení ʻoku hā mahino naʻe teʻeki ai te nau mate, pea naʻe ʻikai ke fakamavaheʻi kinautolu koeʻuhi ko ha ʻulungaanga tuʻu-ki-muʻa, ʻo māʻolunga ia ʻi he toenga ʻo e kau tuí. Ko e hā ʻa e makatuʻunga naʻe fakamavaheʻi ai kinautolu ko e kau sangató?
Fakamāʻoniʻoniʻi ʻe he ʻOtuá
ʻOku fakahāhā ʻe he Folofola ʻa e ʻOtuá ʻoku ʻikai ke fakahaaʻi ha tokotaha ko ha sangato ʻe ha kau tangata pe ko ha kautaha. ʻOku fakamatalaʻi ʻe he ngaahi Konga Tohitapú: “[Ko e ʻOtuá] kuo ne fakamoui o ne ui akitautolu i he uiuiʻi maonioni, o ikai fakatatau moe tau gaahi gaue, ka oku fakatatau mo ene tuutuuni, moe aloofa.” (2 Timote 1:9, PM) ʻOku fakamāʻoniʻoniʻi ha tokotaha māʻoniʻoni koeʻuhi ko e ui ʻa Sihová, ʻo fakatatau ki he ʻofa maʻataʻatā ʻa e ʻOtuá, pea ʻi he fehoanaki mo ʻEne taumuʻá.
Ko e faʻahinga māʻoniʻoni ʻo e fakatahaʻanga Kalisitiané ko e faʻahinga ia ki ha “Fuakava Foʻou.” Ko e taʻataʻa kuo lilingi ʻo Sīsū Kalaisí ʻokú ne ʻai ke fakalao ai ʻa e fuakava ko ení pea fakamāʻoniʻoniʻi ai ʻa e faʻahinga ʻoku kau ki aí. (Hepelu 9:15; 10:29; 13:20, 24) ʻI he maʻa ʻi he vakai mai ʻa e ʻOtuá, ko kinautolú ko ha ‘kau taulaeiki maonioni, pea ʻoku nau o hake ae gaahi feilaulau fakalaumalie, oku aoga ki he Otuá ia Jisu Kalaisi.’—1 Pita 2:5, 9, PM.
Kole mo e Fakalaloa ʻa e Kau Sangató
ʻI he tui ko ia ko e “kau sangató” ʻe lava ke nau ʻomai ʻa e mālohi makehe ki he kau tuí, ʻoku fakalāngilangiʻi ai kinautolu ʻe he laui miliona ʻaki hono ngāueʻaki ʻa e ngaahi fakatātā fakalotu pe ʻi he kole kia kinautolu ʻi he tuʻunga ko e kau fakalaloa. Ko ha akonaki faka-Tohitapu eni? ʻI he Malanga he Moʻungá, naʻe akoʻi ʻe Sīsū ʻa hono kau muimuí ki he founga ke fakaofiofi ai ki he ʻOtuá, ʻi he pehē: “Ko ia ke pehe ni haʻamoutolu lotu: Ko ʻemau Tamai ʻoku ʻi Hevani, ke tapuhā ho Huafa.” (Mātiu 6:9) Ko e ngaahi lotú ʻoku fai totonu ia kia Sihova ko e ʻOtuá tokotaha pē.
ʻI ha feinga ke poupouʻi ʻa e fakalaloa ʻa e “kau sangató,” ʻoku lave ʻa e kau teolosia ʻe niʻihi ki he Loma 15:30 (PM), ʻa ia ʻoku tau lau: “Oku ou kole kiate kimoutolu, e kaiga, koeuhi ko ho tau Eiki ko Jisu Kalaisi, bea koeuhi koe ofa oe Laumalie, ke mou fekuki mo au i hoo mou gaahi lotu ki he Otua koeuhi ko au.” Naʻe fakalototoʻaʻi ʻe Paula ʻa e kau tui ko iá ke lotu kiate ia pe kole ʻi hono hingoá ʻi he fakaofiofi ki he ʻOtuá? ʻIkai. Lolotonga ʻoku fakalototoʻaʻi ʻi he Tohitapú ʻa e ngaahi lotu ʻoku fai maʻá e kau sangato moʻoní, pe faʻahinga māʻoniʻoní, ʻoku ʻikai ha feituʻu ʻe fekauʻi mai ai kitautolu ʻe he ʻOtuá ke tau lotu kia kinautolu pe fakafou ʻi he faʻahinga māʻoniʻoni ko iá.—Filipai 1:1, 3, 4.
Kae kehe, kuo fakanofo ʻe he ʻOtuá ha Fakalaloa ki heʻetau ngaahi lotú. “Ko au pe ko e Hala, pea mo e Moʻoni mo e Moʻui,” ko e lea ia ʻa Sīsū Kalaisí. “ʻOku ʻikai haʻu ha taha ki he Tamai ka ʻi heʻene fou ʻiate au.” Naʻe toe pehē ʻe Sīsū: “ʻIlonga ha meʻa te mou kole ʻi hoku hingoa, te u fai ia, koeʻuhi ke fakalangilangiʻi ʻa e Tamai ʻi he ʻAlo. Neongo pe ko e hā ha meʻa te mou kole meiate au ʻi hoku hingoa, te u fai ia.” (Sione 14:6, 13, 14) ʻOku lava ke tau falala ki he loto-lelei ʻa Sihova ke fanongo ki he ngaahi lotu ʻoku fai ʻi he huafa ʻo Sīsuú. ʻI he fekauʻaki mo Sīsuú, ʻoku pehē ʻe he Tohitapú: “ʻOku ne mafai ke fakamoʻui opeope ʻa kinautolu ʻoku haʻu ki he ʻOtua ʻiate ia, ko ʻene moʻui maʻu ai pe ke hufekina [pe fakalaloa] kinautolu.”—Hepelu 7:25.
Kapau ʻoku loto-lelei ʻa Sīsū ke fakalaloa maʻatautolu, ko e hā ʻoku faʻa kole ai ki he “kau sangató” ʻi he lotu ʻa e kau lotu ʻi he Puleʻanga-Haʻa-Kalisitiané? ʻI heʻene tohi The Age of Faith, ʻoku fakatotoloʻi ai ʻe he faihisitōlia ko Will Durant ʻa e tupuʻanga ʻo e tōʻongá ni. Lolotonga hono ʻiloʻi naʻe ilifiaʻi ʻa e ʻOtua Māfimafi-Aoniú pea naʻe hā ngali faingofua ange ʻa e hū ia kia Sīsuú, ʻoku pehē ʻe Durant: “Naʻe ʻikai meimei fakatoʻotoʻa ha taha ke lea hangatonu kia [Sīsū] hili ia hono mātuʻaki tukunoaʻi fakaʻaufuli ʻa ʻEne Ngaahi Malanga he Moʻungá. Naʻe hā ngali fakapotopoto ange ke tuku atu ʻete lotú ki ha sangato ʻa ia ʻoku fakapapauʻi ʻa ʻene ʻi hēvaní, pea ke kole ʻa ʻene fakalaloa kia Kalaisí.” ʻOku totonu ʻa e ngaahi loto-hohaʻa ko ení?
ʻOku akoʻi kitautolu ʻe he Tohitapú ʻo pehē fakafou ʻia Sīsū ʻoku lava ke tau maʻu ʻa e “abaabagofua [“tauʻatāina ke lea,” NW] ai e tau hu malohi atu i he tui[pau]” ʻi he lotu ki he ʻOtuá. (Efeso 3:11, 12, PM) ʻOku ʻikai fuʻu mamaʻo pe mavahe ʻa e ʻOtua Māfimafi-Aoniú mei he faʻahinga ʻo e tangatá ke fanongo mai ki heʻetau ngaahi lotú. Naʻe lotu ʻa e tokotaha-tohi-saame ko Tēvitá ʻi he tuipau: “Akoe oku ke ogoʻi ae lotu, e aʻu atu kiate koe ae kakai kotoabe.” (Sāme 65:2, PM) ʻI he ʻikai tuku mai ʻa e mālohi fakafou ʻi he ngaahi fakatātā fakalotu ʻo e “kau sangato” kuo maté, ʻoku huaʻi mai ʻe Sihova ʻa hono laumālie māʻoniʻoní ki he faʻahinga ʻoku kole kiate ia ʻi he tuí. Naʻe fakaʻuhinga ʻa Sīsū: “Kapau ʻoku mou ʻilo ke foaki meʻaʻofa lelei ki hoʻomou fanau, neongo ko e faʻahinga kovi kimoutolu: huanoa ʻa e Tamai ʻi he langi ʻene foaki ʻa e Laumālie Māʻoniʻoni kiate kinautolu ʻoku kole kiate ia.”—Luke 11:13.
Ko e Ngafa ʻo e Faʻahinga Māʻoniʻoní
Ko e faʻahinga māʻoniʻoni ʻa ia naʻe fai ki ai ʻa e ngaahi tohi ʻa Paulá ʻa ia naʻa nau mate ʻi he laui senituli kuohilí pea naʻe pau ke nau maʻu, ʻi ha taimi, ʻa e “kalauni ʻo e moʻui,” ko ha toetuʻu ki hēvani. (Fakahā 2:10) Ko e kau lotu ʻa Sihova ko e ʻOtuá ʻoku nau ʻiloʻi ko e fakalāngilangiʻi ʻo e kau sangato moʻoni ko ení ʻoku taʻefakatohitapu pea ʻoku ʻikai ʻomai ai ʻa e maluʻi mei he puké, ngaahi fakatamaki fakanatulá, fetōʻaki fakaʻekonōmiká, taʻumotuʻá, pe ko e maté. Ko ia ai, te ke ʻeke nai, ‘ʻOku tokanga moʻoni mai kia kitautolu ʻa e faʻahinga māʻoniʻoni ʻa e ʻOtuá? ʻOku totonu ke tau ʻamanekina ke nau ngāue mai maʻatautolu?’
Naʻe fakahaaʻi ʻi ha tuʻunga tuʻu-ki-muʻa ʻa e faʻahinga māʻoniʻoní ʻi ha kikite naʻe hiki ʻe Taniela. ʻI he senituli hono ono K.M., naʻá ne mamata ai ki ha vīsone fakaueʻiloto, ko hono fakahokó ʻoku aʻu mai ki hotau ʻahó ni. Naʻe haʻu mei he tahí ʻa e ngaahi fuʻu manu fakamanavahē ʻe toko fā ʻoku nau fakatātaaʻi ʻa e ngaahi puleʻanga fakaetangatá, ʻa ia ʻoku ʻikai lava ke nau fakalato ʻa e ngaahi fiemaʻu moʻoni ʻa e faʻahinga ʻo e tangatá. Naʻe kikite leva ʻa Taniela: “Ka e lavaʻi ae buleaga e he kakai maonioni ae Fugani Maoluga, bea te nau maʻu ae buleaga o lauikuoga, io, ke taegata bea taegata.”—Taniela 7:17, 18.
Naʻe fakahaaʻi ʻe Paula ʻa e “tofiʻa, ʻa ia ʻoku maʻu ʻe he kau maʻoniʻoni,” ko e hoko ʻo kaungāʻea mo Kalaisi ʻi hēvani. (Efeso 1:18-21) Ko e taʻataʻa ʻo Sīsuú naʻá ne fakaʻatā ʻa e hala ki he faʻahinga māʻoniʻoni ʻe toko 144,000 ke nau toetuʻu ai ki he lāngilangi fakahēvaní. Naʻe fakahaaʻi ʻe he ʻapositolo ko Sioné: “Oku monuia mo maonioni ia oku ne kau i he uluaki toetuu: e ikai ikuna akinautolu e he mate agaua, ka te nau hoko koe kau taulaeiki ae Otua mo Kalaisi, bea te nau bule mo ia i he taʻu e taha afe.” (Fakahā 20:4, 6, PM; Fakahā 14:1, 3) ʻI he vīsoné, naʻe fanongo ai ʻa Sione ki ha fuʻu hōsitē ʻo e ngaahi meʻamoʻui fakahēvaní ʻoku nau hiva ʻi he ʻao ʻo Sīsū kuo fakalāngilangiʻí: “Naʻa ke fakatau kakai maʻa e ʻOtua ʻaki ho taʻataʻa mei he matakali fulipē mo e lea, mo e faʻahinga mo e puleʻanga; pea naʻa ke ngaohi kinautolu ko e puleʻanga mo e ngaahi taulaʻeiki: pea te nau Hau ʻi mamani.” (Fakahā 5:9, 10) He fakafiemālie moʻoni ko ia! Ko Sihova ko e ʻOtuá tonu kuó ne filifili lelei ʻa e kau tangata mo e kau fefine ko ení. ʻIkai ngata aí, kuo nau ngāue faitōnunga ʻi he māmaní, ʻo fehangahangai mo e meimei palopalema kotoa kuo hokosia ʻe he tangatá. (1 Kolinito 10:13) Ko ia ai, ʻoku lava ke tau tuipau, ko e faʻahinga māʻoniʻoni ko eni kuo toetuʻú, pe ko e kau sangató, te nau hoko ko e kau pule faimeesi mo kaungāongoʻi, ʻo fakakaukauʻi hotau ngaahi vaivaiʻangá mo hotau ngaahi ngataʻangá.
Ngaahi Tāpuaki ʻi he Malumalu ʻo e Pule ʻa e Puleʻangá
Ko e founga-pule ʻa e Puleʻangá kuo vavé ni ke ne toʻo mei he māmaní ʻa e fulikivanú mo e faingataʻá kotoa. ʻI he taimi ko iá, ʻe ʻunuʻunu ofi ange ai ʻa e tangatá ki he ʻOtuá ʻi ha toe taimi ki muʻa. Naʻe tohi ʻe Sione: “Pea ongo mai ha fuʻu leʻo mei he taloni, ʻoku ne pehē, Ko eni, ko e tapanekale ʻo e ʻOtua, ʻoku tuʻu mo e kakai. Pea ʻe nofo hono Sikaina mo kinautolu, pea te nau nofo ko hono kakai; pea ʻe nofo ʻe he ʻEne ʻAfio, ko e ʻOtua ʻoku kau maʻanautolu, ʻio, ko honau ʻOtua.” ʻE ʻomai ʻe he meʻá ni ʻa e ngaahi tāpuaki taʻefaʻalaua ki he faʻahinga ʻo e tangatá, he ʻoku hoko atu ʻa e kikité: “Te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”—Fakahā 21:3, 4.
Ko ha taimi fakafiefia ia ʻe hokó! Ko e ngaahi ola ʻo e tuʻunga-pule haohaoa ʻa Kalaisi Sīsū pea mo e faʻahinga māʻoniʻoni ʻe toko 144,000 ʻoku toe fakamatalaʻi ia ʻi he ngaahi lea ko eni ʻoku lēkooti ʻi he Maika 4:3, 4: “[Ko Sihova] te ne fakamaau ʻa e vahaʻa ʻo e ngaahi kakai lahi, pea te ne sivi ʻa e meʻa ʻa e ngaahi puleʻanga kaukaua ʻo fai atu ki he mamaʻo; pea te nau tuki huotoho ʻaki ʻenau ngaahi heleta, mo e ngaahi hele ʻauhani ʻaki honau tao: ʻe ʻikai ofa ha heleta ʻe ha puleʻanga ki ha puleʻanga, pea ʻe ʻikai kei fai ha akotau. Ka te nau nofo taki taha ʻi hono lolo vaine, pea ʻi hono lolo fiki; ʻo ʻikai mafakahohaʻa kinautolu ʻe ha taha—he kuo folofola ki ai ʻa e fofonga ʻo Sihova Sapaoti.”
Ko e fakaafe ke kau ʻi he ngaahi tāpuaki ko iá ʻoku ʻomai ia ʻe he faʻahinga māʻoniʻoní. ʻI hono fakatātaaʻi ʻaki ha taʻahine malí, ʻoku hokohoko lea ʻa e kau sangato moʻoní: “Haʻu”! ʻOku hoko atu ʻa e konga tohí: “Bea mo ia oku fieinua, ke haʻu ia. Bea ko ia oku loto ki ai, ke ne too taetotogi eia ae vai oe moui.” (Fakahā 22:17, PM) Ko e hā ʻoku kau ʻi he “vai oe moui”? ʻI he lotolotonga ʻo e ngaahi meʻa kehé, ko e ʻilo totonu ki he ngaahi taumuʻa ʻa e ʻOtuá. ʻI he lotu ki he ʻOtuá, naʻe pehē ʻe Sīsū: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.” (Sione 17:3) Ko e ʻilo ko ení ʻoku ala maʻu ia fakafou ʻi he ako tuʻumaʻu ʻa e Tohitapú. He fiefia ē ʻe lava ke tau maʻú he ʻi he fakafou ʻi he Folofola ʻa e ʻOtuá ʻe lava ke tau ʻilo ai ʻa e ʻiloʻanga moʻoni ʻo e faʻahinga māʻoniʻoní pea ako ki he founga te ne ngāueʻaki ai kinautolu ki he ʻaonga taʻengata maʻá e faʻahinga ʻo e tangatá!
[Fakatātā ʻi he peesi 4]
Naʻe fai ʻe Paula ʻa e ngaahi tohi fakamānavaʻi ki he kau sangato moʻoní
[Fakatātā ʻi he peesi 4, 5]
Naʻe hoko ʻa e kau ʻapositolo loto-tōnunga ʻa Sīsuú ko e kau sangato moʻoni, pe faʻahinga māʻoniʻoni
[Fakatātā ʻi he peesi 6]
ʻE lava ke tau lotu ʻi he tuipau ki he ʻOtuá fakafou ʻia Sīsū Kalaisi
[Fakatātā ʻi he peesi 7]
Ko e kau sangato kuo toetuʻú, pe faʻahinga māʻoniʻoní, te nau hoko ko e kau pule manavaʻofa ki he māmaní