Līpooti ʻa e Kau fanongonongo ʻo e Puleʻangá
Mētali Naʻe Foaki ki ha Fale Fakatahaʻanga
KO E Potungāue ʻo e ʻĀtakaí ʻi Finilaní naʻá ne fakaʻilongaʻi ʻa e taʻu 2000 ko e “Taʻu ʻo e Palaniʻi Fakalelei ʻa e Funga Fonuá.” Ko e taha ʻo e kau fokotuʻutuʻu ngāué naʻá ne pehē ko e “taumuʻa ʻo e kaveinga palaniʻi fakalelei ʻa e funga fonuá ki he taʻú ke fakamanatuʻi kia kitautolu kotoa ʻa e tākiekina ʻoku fai ʻe he ngaahi ʻātakai lanu matá ki heʻetau moʻui fakaʻahó pea ki heʻetau leleí.”
ʻI Sanuali 12, 2001, naʻe aʻu ai ha tohi mei he Kautaha ʻo e Ngaahi Ngāueʻanga Palani Fakalelei ʻo e Funga Fonuá ʻi Finilaní ki he ʻōfisi vaʻa ʻo e Kau Fakamoʻoni ʻa Sihova ʻi Finilaní. Naʻe fakamatala ʻi he tohí ko e Fale Fakatahaʻanga ʻo e Kau Fakamoʻoni ʻa Sihová ʻi Tikkurila kuo foaki ki ai ʻa e taha ʻo e ngaahi mētali ki he kaveinga palaniʻi fakalelei ʻa e funga fonuá ki he taʻú koeʻuhi ko e tisaini tuʻu-ki-muʻa ʻo hono ngaahi ʻātakaí, pea mo hono ngoue naʻe palaniʻi fakaleleí. Naʻe tānaki atu ʻi he tohí ʻo pehē “ko e fōtunga fakalūkufua ʻo hono kelekelé, fakatouʻosi ʻi he faʻahitaʻu māfaná mo e momokó, ʻoku lelei, fakaʻofoʻofa fakaeʻaati, pea ʻi he tuʻunga māʻolunga.”
Naʻe foaki ʻa e mētalí ki he Kau Fakamoʻoni ʻa Sihová ʻi he Hōtele Rosendahl ʻi Tampere, Finilani, ʻi ha kātoanga naʻe kau ki ai ʻa e kau palōfesinale mo e kau tangata pisinisi ʻe toko 400. Ko e Kautaha ʻo e Ngaahi Ngāueʻanga Palani Fakalelei ʻo e Funga Fonuá ʻi Finilaní naʻá ne toe tuku atu ia ki he ngaahi mītiá, ʻa ia ʻoku pehē ai: “ʻI he ngaahi tapa kehekehe ʻo e fonuá, ko e ngaahi Fale Fakatahaʻanga ʻo e Kau Fakamoʻoni ʻa Sihová ʻoku meimei palani fakaʻofoʻofa maʻu pē ia. Ko e tokangaʻi ʻo e ʻātakaí ʻoku meimei langaʻi ai ʻa e mahuʻingaʻia ʻa e faʻahinga ʻoku nau fefonongaʻakí. Ko e Fale Fakatahaʻanga ʻi Tikkurila ko e fakatātā ia ʻe taha ʻo ha ngoue fisifisimuʻa fakalūkufua. Ko e falé mo e kelekele fakalahi atu ki aí ʻokú na fakaʻaliʻali ʻa e tuʻunga nonga mo mafamafatatau.”
ʻI Finilani ʻoku ʻi ai ʻa e Fale Fakatahaʻanga ʻe 233, ko e lahi aí ʻoku takatakaiʻi ia ʻe he ngaahi ngoue fakaʻofoʻofa. Kae kehe, ko e meʻa ʻokú ne ʻai ʻa e ngaahi feituʻú ni ke fakaʻofoʻofa moʻoní ko ʻenau hoko ko ia ko e ngaahi senitā ʻo e lotu moʻoní mo e ako Tohitapú. Ki he Kau Fakamoʻoni ʻa Sihova laka hake he toko ono milioná takatakai ʻi he māmaní, ko ha Fale Fakatahaʻanga—fokotuʻu lelei pe feʻunga—ko ha feituʻu ia ʻoku manakoaʻi lahi. Ko e ʻuhinga ia ʻoku nau vēkeveke ai ke tokangaʻi lelei mo tokangaʻi anga-ʻofa iá. Ko e ngaahi matapā ʻo e Fale Fakatahaʻangá ʻoku ʻatā ia ki he tokotaha kotoa ʻi ho koló!