Ko e Hā ʻOku Hoko ki he Tokoni ʻOfá?

HILI ʻa e ongo ʻohofi ʻi Sepitema 11, 2001, ʻi Kolo Niu ʻIoke mo Uāsingatoni, D.C., naʻe fakaofo moʻoni ʻa e tokoni ʻa e kakaí ki he kau maʻukovia ʻi he meʻa fakamamahí. Ko e ngaahi kautaha tokoní ne nau ngoto fuʻu ʻi he meʻaʻofa ko e $2.7 piliona ke tokoni ki hono tokangaʻi ʻa e ngaahi fāmili ʻo e faʻahinga ne maʻukoviá. ʻI he ʻohovale ʻi he lahi ʻo e maumaú, naʻe loto ai ʻa e kakai ʻi he feituʻu kotoa pē ke tokoni.

Kae kehe, naʻe vave ʻa e hoko ʻo loto-ʻingoʻingo ʻa e kakai ʻe niʻihi, ʻi he taimi naʻe eʻa ai ʻo pehē ko e ngaahi kautaha tokoni ʻiloá naʻa nau ngāuetaʻetotonuʻaki ʻa e ngaahi paʻanga tokoní. Naʻe lahi ʻa e ʻitá ʻi he līpooti ʻo pehē naʻe palani ha fuʻu kautaha tokoni lahi ʻe taha ke taʻofi ʻa e meimei vaeua ʻo e $546 miliona naʻá ne maʻú ʻo ngāueʻaki ia ki he ngaahi taumuʻa kehe. Neongo naʻe liliu ki mui ai ʻe he kautahá ʻa ʻene filí pea fai ha kole fakamolemole, naʻe pehē ʻe ha faiongoongo ʻe taha: “ʻOku sio ʻa e kau fakaangá ki he toe fakafoki ko eni naʻe hokó ʻoku fuʻu tōmui mo taʻefeʻunga ke ne toe fakafoki mai ʻa e falala” naʻá ne maʻu ki muʻa ʻi he ongo ʻohofí. Fēfē koe? Kuo vaivai nai ki muí ni ʻa hoʻo falala ki he ngaahi kautaha tokoní?

ʻAonga pe Taʻeʻaonga?

Ko e foaki ki he ngaahi kautaha tokoní ʻoku fai ʻa e vakai lahi ki ai ko ha ʻulungaanga lelei. Neongo ia, ʻoku ʻikai ke sio pehē ki ai ʻa e tokotaha kotoa. Laka hake ʻi he taʻu ʻe 200 kuo maliu atú, naʻe tohi ai ʻe he faʻu-ʻēsei Pilitānia ko Samuel Johnson: “ʻOkú ke fakapapauʻi lahi ange ʻokú ke failelei ʻi hoʻo totongi ʻa e paʻanga ki he faʻahinga ʻoku ngāué, ko e totongi ki heʻenau ngāué, ʻi he taimi ʻokú ke foaki ai ʻa e paʻangá ko ha meʻaʻofa peé.” ʻOku toumoua pehē mo e niʻihi ʻi he ʻahó ni, pea ko e ngaahi līpooti ʻo e ngaahi kautaha tokoni ʻa ia ʻoku nau ngāuehalaʻaki pe ngāuetaʻetotonuʻaki ʻa e ngaahi tokoní ʻoku ʻikai te ne poupouʻi ʻa e falala ʻa e kakaí. Vakai angé ki ha ongo fakatātā ʻe ua ki muí ni.

Ko ha talēkita ʻo ha kautaha tokoni fakalotu ʻi San Francisco naʻe fakanofo ia hili ʻa e pehē naʻá ne tohi moʻua ki heʻene kautahá ʻa hono tafa fakasanisaní pea ki hono moʻua kai falekai ko e $500 ʻi he uike, lolotonga ʻa e vahaʻa taimi ko e taʻu ʻe ua. ʻI Pilitānia, ko e kau fokotuʻutuʻu ʻo ha fuʻu feinga paʻanga he televīsoné, ne nau mā ʻi hono ʻiloʻi, mei he sovaleni ʻe 6.5 miliona ($10 miliona U.S. nai) ne ʻoatu ke tokoni ki hono langa ʻo e ngaahi ʻapi paea foʻou ʻi Lumēniá, ko e ngaahi fale tuʻunga māʻulalo pē ʻe 12 ne faifai pea langá, pea ko e fuʻu paʻanga ʻe laui kilu naʻe ʻikai fai ha fakamatala ia ki ai. Ko e ngaahi līpooti kovi hangē ko ení kuó ne fakatupunga totonu ʻa e kau foaki ʻe niʻihi ke nau hoko ai ʻo tokanga lahi ange fekauʻaki mo e lahi ʻo e paʻanga ʻoku nau tokoniʻakí pea ko e faí kia hai.

Foaki pe ʻIkai Foaki

Kae kehe, ko e meʻa pango ke fakaʻatā ʻa e ngaahi tōʻonga ʻa ha faʻahinga tāutaha tokosiʻi, pe ko ha ngaahi kautaha ke ne lōmia ʻetau tokanga moʻoni pea mo e manavaʻofa ki he niʻihi kehé. ʻOku pehē ʻe he Tohitapú: “Ko eni ia ʻa e toʻonga lotu ʻoku maʻa mo taʻe hano ʻuli ʻi he ʻafio ʻa e ʻOtua ko ʻetau Tamai, ʻa ʻete aʻahi ki he faʻahinga matuʻamate mo e kau uitou ʻi heʻenau mamahi.” (Semisi 1:27) ʻIo, ko e mātuʻaki tokanga ki he masivá mo e tukuhāusiá ko ha konga tefito ia ʻo e lotu faka-Kalisitiané.

Kae kehe, te ke fifili nai, ‘ʻOku totonu ke u hokohoko atu ʻa e foaki ki he kautaha tokoní, pe te u feinga pē ke tokoniʻaki ha ngaahi meʻaʻofa fakafoʻituitui ki he faʻahinga tāutahá?’ Ko e hā ʻa e faʻahinga foaki ʻoku ʻamanekina mai ʻe he ʻOtuá? Ko e kupu hoko maí ʻe lāulea ai ki he ongo fehuʻi ko ení.