ʻOku Totonu Ke Tau Tautapa ki he Kau ʻĀngeló ki ha Tokoni?
ʻOKU totonu ke tautapa ki he kau ʻāngeló ʻi he ngaahi taimi ʻo e faingataʻá? ʻOku fakakaukau pehē ʻa e kakai tokolahi. Ko hono moʻoní, ʻoku pehē ʻe he New Catholic Encyclopedia: “ʻOku lotu ha tokotaha ki he . . . kau ʻāngeló . . . ka ʻi he ʻuhinga pē ke nau fakalaloa nai ʻi he ʻao ʻo e ʻOtuá maʻatautolu.” ʻOku totonu ke tau tautapa ki he kau ʻāngeló ke nau fakalaloa maʻatautolu?
ʻOku ʻomai ʻe he Folofola ʻa e ʻOtuá ʻa e hingoa ʻo e toko ua pē ʻi he kau ʻāngelo faitōnunga ʻa e ʻOtuá, ko Maikeli mo Kepaleli. (Taniela 8:16; 12:1; Luke 1:26; Siutasi 9) Koeʻuhi ʻoku lave ki he ongo hingoá ni ʻi he Tohi Tapú, ʻoku tau ʻiloʻi ko e ʻāngelo taki taha ko ha tokotaha laumālie makehe ia fakataha mo ha hingoa, ʻo ʻikai ko ha ivi pe mālohi pē taʻefekauʻaki mo ha taha. Neongo ia, naʻe fakafisi ʻa e kau ʻāngelo kehé ke fakahā honau hingoá. Hangē ko ení, ʻi he taimi naʻe kole ai ʻa Sēkope ki ha ʻāngelo ʻa ia naʻe ʻaʻahi ange kiate ia ke ne fakahā hono hingoá, naʻá ne fakafisi ke fai pehē. (Senesi 32:29; Fakamaau 13:17, 18) ʻOku ʻikai ha lisi ʻo e ngaahi hingoa ʻo e kau ʻāngeló ʻe ʻomai ʻi he Tohi Tapú, ko ia ʻoku taʻofi ai ʻa e tangatá mei hono fai ha tokanga tōtuʻa kia kinautolu.
ʻOku ʻi he lotolotonga ʻo e ngaahi fatongia ʻo e kau ʻāngeló ʻa hono fakahoko ʻo e ngaahi pōpoaki mei he ʻOtuá ki he tangatá. Ko hono moʻoní, ko e muʻaki ongo foʻi lea faka-Hepelū mo faka-Kalisi naʻe liliu ko e “ʻāngeló” ʻoku ʻuhinga fakafoʻilea ia ko e “talafekau.” Kae kehe, ʻoku ʻikai ke ngāue ʻa e kau ʻāngeló ko e kau fakalaloa ʻa ia ʻoku nau ʻoatu ʻa e ngaahi lotu ʻa e tangatá ki he taloni ʻo e Fungani Māʻolungá. Kuo fakapapauʻi ʻe he ʻOtuá ko e ngaahi lotú ke fai kiate ia ʻi he huafa ʻo hono ʻAló, ʻa Sīsū Kalaisi, ʻa ia naʻá ne pehē: “ʻIlonga ha meʻa te mou kole mei he Tamai ʻi hoku hingoa ke ne ʻatu ia.”—Sione 15:16; 1 Timote 2:5.
Ko Sihova ko e ʻOtuá ʻoku ʻikai ʻaupito te ne fuʻu femoʻuekina ke fanongo mai kia kitautolu kapau ʻoku tau fakaofiofi totonu kiate ia. ʻOku ʻomai ʻe he Tohi Tapú ʻa e fakapapau ko ení: “ʻOku ofi leva ʻa Sihova ki he kakai kotoa ʻoku tautapa kiate ia; ʻakinautolu ʻoku fai moʻoni ʻenau tautapa.”—Sāme 145:18.