ʻI he Tokoni mei he Tohi Tapú, Naʻá Ne Talitekeʻi ʻa e ʻAhiʻahí
ʻOku lahi fau ʻa e ʻahiʻahí ʻi he māmani he ʻaho ní. Ko e pouaki ʻa e ngaahi tuʻunga ʻa e Tohi Tapú ʻoku ʻikai faingofua. Hangē ko ení, ko ha pole nai ia ke tokanga ki he akonaki ʻa e Tohi Tapú: “Hola pe mei he fai feʻauaki.”—1 Kolinito 6:18.
Ko e taha ʻo e Kau Fakamoʻoni ʻa Sihová, ʻa ia te tau ui ko Sepesitieni, naʻá ne ngāue ki ha kautaha Sikenitinēvia ʻi Pōlani. Naʻe pau ke ne faitau mālohi ke tauhi maʻu ʻa ʻene anga-tonú.
Naʻe hoko ʻa Sepesitieni ʻo ʻiloa ko e taha ʻo e Kau Fakamoʻoni ʻa Sihová. Ko hono kau pulé, ʻi heʻenau fakamahuʻingaʻi ʻa ʻene faʻa ngāué mo e ʻulungāanga leleí, naʻa nau fakapaleʻi ia ʻaki ʻa e ngaahi monū kehekehe. Kae kehe, naʻe iku ʻo hā mahino, ko e ngaahi monū ko ení naʻe kau ki ai ʻa e ngaahi fakataha fakapisinisí ʻa ia naʻe kau ki ai ha fakafiefia ala fehuʻia.
Naʻe vave ʻa e kamata ke maʻu ʻe Sepesitieni ʻa e ngaahi veiveiua. “ʻOku ʻiloʻi ʻe hoku pulé ko e taha au ʻo e Kau Fakamoʻoni ʻa Sihová. Ko e ʻuhinga ia ʻokú ne falala ai mo fakafalala mai kiate aú. Kapau te u fakafisi ke kau ki ai, ʻe mole ʻa ʻeku ngāué, ʻa ia naʻe mātuʻaki faingataʻa ke maʻú. Fēfē kapau te u hoko pē ko ha tokotaha mamata?”
Naʻe ʻiloʻi leva ʻe Sepesitieni ʻa e meʻa lahi ange. Naʻe ʻamanekina ia ke ne “tokangaʻi” ʻa e kau kasitomā mulí ʻaki hono ʻomai ʻa e “tamaiki fefine” ki he ngaahi taumuʻa ʻulungāanga taʻetaau ke feohi mo kinautolu ʻi he efiafí. Ko e hā te ne faí?
Naʻe fakapapauʻi ʻe Sepesitieni ke ne fakamanatu ki hono pulé fekauʻaki mo ʻene fakakaukau ki he ʻulungāanga taʻetāú makatuʻunga he Tohi Tapú. Naʻe vave ʻa e hoko ʻo hā mahino naʻe ʻikai feʻungamālie mo ia ʻa Sepesitieni pea ʻe pau ke ne liʻaki ʻa ʻene ngāué. Naʻá ne maʻu ha ngāue foʻou mo ha vahe māʻulalo ange ka naʻe ʻikai ʻi ai ha ngaahi ʻahiʻahi pehē. ʻOkú ne maʻu he taimí ni ha konisēnisi maʻa.
Ko e hā te ke faí kapau ʻe tenge koe ʻe ha taha ke ke kau pe talitali lelei ʻa e ʻulungāanga taʻetāú? Te ke loto-lelei ke fai ha liliu lahi? Ko e meʻa ia naʻe fai ʻe Siosifa ʻo e kuonga muʻá, hangē ko ia ʻoku līpooti ʻi he Senesi 39:7-12.