ʻOku Fiemaʻu ʻa e Faleʻi Leleí?

ʻI he ʻahó ni, ʻoku tui ʻa e tokolahi ʻoku nau maʻu ʻa e malava ke ʻiloʻi ʻa e leleí mei he koví pea ʻoku nau maʻu ʻa e totonu ke fai ha meʻa pē ʻoku nau loto ki ai. ʻOku pehē ʻe he niʻihi ʻoku meimei ala tali ʻa e meʻa kotoa pē, kehe pē ʻokú ne ʻai ha taha ke ne ongoʻi lelei. Ko e nofo malí mo e moʻui fakafāmilí, ʻa ia kuo fuoloa ʻa e vakai ki ai ko e faʻunga tefito ia ʻo e sōsaieti fakaetangatá, ʻoku uesia lahi fakaʻulia.​—Senesi 3:5.

Vakai angé kia Velonika,a ʻa ia ʻoku nofo ʻi Mekisikou. ʻOkú ne fakamatala: “Taimi nounou ki muʻa ʻi he fakamanatu ʻa e taʻu hono 15 ʻo ʻema nofo malí, naʻe tala mai ai ʻe hoku husepānití naʻe ʻi ai ʻene faingāmeʻa mo ha fefine ʻe taha. Naʻá ne pehē koeʻuhi naʻe kei siʻi ange ʻa e fefiné ni pea naʻá ne ʻai ia ke ne ongoʻi lelei ange, ʻe ʻikai te ne liʻaki ia. Naʻá ku ʻohovale ʻi he fakakaukau atu ko hoku kaumeʻa lelei tahá ē ʻe ʻikai te ne toe ʻi hoku tafaʻakí ke feʻao mo au. Naʻá ku faʻa fakakaukau au ko e mate ʻa e faʻahinga ʻoku tau ʻofa aí ʻa e tupuʻanga lahi taha ʻo e mamahí. Ka kiate au, naʻe toe faingataʻa ange ʻa e tonó koeʻuhi he naʻe ʻikai ke ngata pē ʻi he mole meiate au ʻa e tokotaha ʻa ia naʻá ku ʻofa loloto aí ka naʻá ne hokohoko atu ʻi hono fai ʻa e ngaahi meʻa ʻokú ne fakamamahiʻi aú.”

Ko hono hokó ko e tuʻunga ʻo ha tangata taʻu 22 ʻa ia kuo ʻosi vete pea ʻoku ʻi ai hono foha ka ʻoku ʻikai te ne loto-lelei ke tali ʻa hono ngaahi fatongia ʻi he tuʻunga ko ha tamaí. ʻOkú ne ʻamanekina ʻa ʻene faʻeé ke ne tokangaʻi ia pea mo hono fohá. Kapau ʻoku ʻikai ke loto-tatau ʻa e faʻeé mo ʻene ngaahi fiemaʻú kotoa, ʻokú ne hoko ai ʻo tōlili pea leakoviʻi ia, ʻo hangē tofu pē ha kiʻi leka ʻulungāanga koví. ʻOku ongoʻi masiva tokoni ʻa ʻene faʻeé ʻi he fehangahangai mo e tōʻonga kovi peheé.

ʻOku ʻikai ko ha ngaahi tuʻunga makehe eni. Ko e māvae fakalaó mo e veté ʻoku fakautuutu ia ʻi he feituʻu kotoa pē. ʻOku sio ʻa e fānau tokolahi ki he taha ʻo ʻenau ongo mātuʻá ʻoku mavahe mei ʻapi ke kamata ha moʻui foʻou. Kuo mole mei he fānau ʻe niʻihi ʻa e tokaʻi kotoa ʻo e niʻihi kehé, ʻo kau ai ʻenau ongo mātuʻá, pea nau kau ʻi he tōʻonga ʻa ia naʻe ʻikai meimei ʻi ai ha ala fakaʻuta atu ki ai ʻi he kuohilí. Ko e ʻahiʻahiʻi ʻo e fehokotaki fakasinó, ngāuekoviʻaki ʻa e faitoʻo kona tapú, ngaahi ʻohofi ʻe he toʻutupú mo e fakapoongi ʻo e kau faiakó pe ngaahi mātuʻá ʻe he fānaú kuo hoko ia ko e meʻa anga-maheni ʻi he ngaahi fonua lahi. Pea kuó ke fakatokangaʻi nai ko hono tauhi hake ʻo e fānaú mo e nofo malí ʻoku ʻikai ko e ongo malaʻe pē ia ʻoku fehangahangai mo e ngaahi faingataʻá ʻi he māmani ʻo e ʻaho ní.

ʻI heʻetau sio tonu ʻi he ngaahi meʻa ko eni ʻoku hokó, ʻoku tau fifili nai ai pe ko e hā kuo hoko ki he sōsaietí. Kapau ʻoku ʻiloʻi moʻoni ʻe he kakaí ʻa e leleí mei he koví, ko e hā ʻoku kei taʻefakaleleiʻi ai ʻa e ngaahi palopalema lahi? ʻOku ʻi ai ha fiemaʻu ki ha faleʻi lelei? ʻOku ʻi ai ha matavai ʻo e faleʻi ʻaonga peheé, ko ha faleʻi kuo fakamoʻoniʻi ʻoku alafalalaʻanga? Neongo ʻoku pehē ʻe he tokolahi ʻoku nau tui ki he ʻOtuá mo ʻene Folofola kuo tohí, ʻoku ʻikai hā ngali tākiekina ʻe he meʻá ni ʻenau ngaahi filí. Ka ko e hā ʻa e ngaahi ʻaonga ʻoku lava ke tau maʻu ʻi he taimi ʻoku tau kumi ai pea maʻu ʻa e faleʻi mei he ʻOtuá? Tau lāulea ki he meʻa ko iá ʻi he kupu hoko maí.

[Fakamatala ʻi lalo]