Ngaahi Fehuʻi mei he Kau Lautohí
Ko e hā naʻe fakaʻatā ai ʻa e kau tangata ʻIsilelí ke mali mo e kau fefine pōpula mulí neongo naʻe tuʻutuʻuni ʻi he Lao ʻa Mōsesé heʻikai ha femaliʻaki mo e kau muli?—Teutalonome 7:1-3; 21:10, 11.
Ko e ʻuhinga naʻe fakaʻatā ai ʻení naʻe fekauʻaki ia mo ha ngaahi tuʻunga makehe. Naʻe tuʻutuʻuni ʻe Sihova ki he kau ʻIsilelí ke fakaʻauha ʻa e ngaahi kolo ʻo e ngaahi puleʻanga ʻe fitu ʻi he fonua ko Kēnaní, ʻo tāmateʻi honau kau nofo kotoa aí. (Teutalonome 20:15-18) ʻI he tuʻunga ʻo e ngaahi puleʻanga kehé, ʻoku ngalingali ko e kakai lalahi naʻe hao pē nai aí ko e kau fefine tāupoʻou naʻe puke pōpulá. (Nomipa 31:17, 18; Teutalonome 20:14) Naʻe malava ki ha tangata ʻIsileli ke ne mali mo ha fefine pehē, ka ʻe fai pē ia kapau naʻe fakahoko ʻe he fefiné ʻa e ngaahi fiemaʻu pau.
ʻI he fekauʻaki mo e ngaahi sitepu naʻe fiemaʻu ke fakahoko ʻe ha fefine pehē, ʻoku pehē ʻe he Tohi Tapú: “Te ne fakatekefua, mo ngaohi hono ngeʻesinima; pea te ne huʻihuʻi hono kofu fakapopula. pea te ne nofo ʻi ho fale, ʻo tengihia ʻene tamai mo ʻene faʻe ʻo mahina katoa: pea hili ia pea te ke toki ʻalu ki ai, ʻo ke hoko ko hono husepaniti, pea te ne hoko ia ko ho uaifi.”—Teutalonome 21:12, 13.
Ko ha tāupoʻou pōpula ʻa ia naʻe fiemaʻu ʻe ha ʻIsileli ke mali mo ia naʻe pau ke ne tele hono ʻulú. Ko hono kosi ʻo e ʻulú ko ha fakahāhā ia ʻo e tengihia pe mamahi. (Aisea 3:24) Ko e fakatātaá, ʻi he taimi naʻe mole kotoa ai mei he pēteliake ko Siopé ʻene fānaú mo ʻene koloá, naʻá ne kosi hono ʻulú ko ha fakaʻilonga ʻo e tengihia. (Siope 1:20) Naʻe toe pau foki ki he fefine mulí ke ne ngaohi hono ngeʻesi-nimá, mahalo ‘ko hono tutuʻu hono ngeʻesi-nimá’ koeʻuhi kapau naʻe valivali ia, ʻe ʻikai ke hā fakatupu tokanga ai hono ongo nimá. (Teutalonome 21:12) Ko e hā ʻa e “kofu fakapopula” naʻe fiemaʻu ki he fefine pōpulá ke ne huʻihuʻí? Naʻe tōʻongaʻaki ʻe he kau fefine ʻo e ngaahi kolo pangani ko ia naʻe ʻamanaki ke ikunaʻí ke nau tui honau vala lelei tahá. Naʻa nau fai ʻeni ʻi he ʻamanaki ke leleiʻia mai ai honau kau puke fakapōpulá. Ko e teunga peheé naʻe pau ke huʻihuʻi ia ʻe ha fefine pōpula ʻi he tengihiá.
Ko ha fefine pōpula naʻe teu ke hoko ko ha uaifi ʻo ha tangata ʻIsileli te ne tengihia ʻi he māhina ʻe taha ʻa e faʻahinga naʻá ne ʻofa ai kuo nau maté. Ko e fakaʻauha ʻo e ngaahi kolo ikunaʻí naʻe pau ke fakaʻāuliliki ʻaupito ʻa ia ʻe ʻikai ke toe ʻi ai ʻa hono ngaahi fehokotaki fakafāmili mo fakasōsiale ki muʻá. Koeʻuhi ne ʻosi fakaʻauha ʻe he kau sōtia ʻIsilelí ʻa e ngaahi ʻīmisi ʻo hono ngaahi ʻotuá, ʻe ʻikai ke toe ʻi ai ʻa e ngaahi meʻa naʻe fai ki ai ʻene lotú. Ko e māhina ʻo e tengihiá naʻe toe hoko ia ko ha vahaʻa taimi ʻo e fakamaʻa ʻa ia ʻi he lolotonga iá ʻe fakaʻataʻatā ai ʻe ha fefine pōpula ʻa ia tonu mei he ngaahi tafaʻaki kotoa ʻo ʻene līʻoa fakalotu ki muʻá.
Neongo ia, naʻe kehe ʻa e tuʻungá ia ʻi he meʻa fekauʻaki mo e kau fefine mulí ʻi he tuʻunga fakalūkufuá. ʻI he tuʻunga ia ko iá, naʻe ngāueʻaki ki ai ʻa e tefitoʻi moʻoni ko ʻení: “ʻE ʻikai te ke femaliʻaki mo kinautolu; ʻe ʻikai te ke ʻatu ho ʻofefine ki hoʻona foha, pea ʻe ʻikai te ke toʻo hano ʻofefine maʻa ho foha.” (Teutalonome 7:3) Ko e hā ʻa e ʻuhinga ki he fakangatangata ko ʻení? ʻOku pehē ʻe he Teutalonome 7:4: “He te ne fakaafe ho foha mei he muimui kiate au ke nau tauhi ʻotua kehe.” Ko ia, ko e tapui ko ʻení naʻe fakataumuʻa ia ke maluʻi ʻa e kau ʻIsilelí mei he ʻuli fakalotú. Kae kehe, ko ha fefine muli ʻi he ngaahi tuʻunga ʻoku fakamatalaʻi ʻi he Teutalonome 21:10-13 naʻe ʻikai ke ʻi ha fakamanamana pehē ia. Naʻe mate kotoa hono fāmilí ʻoʻona, pea ko e ngaahi ʻīmisi naʻa nau fakafofongaʻi ʻa hono ngaahi ʻotuá naʻe fakaʻauha ia. Naʻe ʻikai haʻane fetuʻutaki ʻaʻana mo e kau fai ʻo e lotu loí. Naʻe fakaʻatā ha ʻIsileli ke mali mo ha muli naʻe ʻi he malumalu ʻo e ngaahi tuʻunga peheé.