Tākiekina ʻa Sīsū ʻi Māmani Lahí
“KO E meʻa kotoa naʻe fakamatalaʻi ʻi he ngaahi kōsipelí fekauʻaki mo e meʻa naʻe leaʻaki ʻe Sīsuú, fakaeia pea ʻi he kakaí, naʻe mei lava pē ke ne leaʻaki ia ʻi ha houa ʻe ua,” ko e tohi ia ʻa e tokotaha liliu Tohi Tapu ko Edgar Goodspeed. “Neongo ia ko e kiʻi meʻa siʻisiʻi ko iá naʻe mātuʻaki fakaueʻiloto, mātuʻaki maongo pea mātuʻaki loloto ʻo pau ai ke pehē kuo ʻikai ha toe taha kehe te ne tākiekina lahi fau pehē ʻa e māmaní.”
ʻI he taimi naʻe fakakakato ai ʻe Sīsū Kalaisi ʻa ʻene ngāue fakafaifekau ʻi he māmaní ʻi he taʻu 33 T.S., naʻe ʻikai siʻi hifo ʻi he toko 120 nai ʻa e kau tangata mo e kau fefine ko hono kau muimuí. (Ngāue 1:15) ʻI he ʻahó ni, ko e kakai laka hake he toko ua pilioná ʻoku nau taukaveʻi ko e kau Kalisitiane kinautolu. Ko e laui teau miliona lahi ange ʻoku nau fakahaaʻi ko Sīsuú ko ha palōfita. Ko ʻene ngaahi akonakí kuó ne tākiekina anga-kehe moʻoni ʻa e faʻahinga ʻo e tangatá.
Ko e tākiekina ʻa Sīsū ʻi māmani lahí naʻa mo e kau taki ʻikai ko e Kalisitiané kuo nau fakahaaʻi ia. Ko e fakatātaá, naʻe tohi ʻe he lāpai Siu ko Hyman Enelow: “Kuo hoko ʻa Sīsū ko e tokotaha manakoa taha, lahi taha ʻa e ako ki aí, faitākiekina lahi taha ʻi he hisitōlia fakalotu ʻo e faʻahinga ʻo e tangatá.” Naʻe toe pehē ʻe Enelow: “Ko hai ʻe lava ke ne fakafuofua ʻa e tākiekina kotoa naʻe fai ʻe Sīsū ki he faʻahinga ʻo e tangatá? Ko e ʻofa naʻá ne fakahokó, ko e fakafiemālie naʻá ne faí, ko e lelei naʻá ne foakí, ko e ʻamanaki mo e fiefia naʻá ne ueʻí—ko e meʻa kotoa ko iá ʻoku taʻehanotatau ʻi he hisitōlia ʻo e tangatá. ʻI he lotolotonga ʻo e meʻa lahi mo lelei kuo ʻomai ʻe he matakali ʻo e faʻahinga ʻo e tangatá, kuo ʻikai ofi ha taha ai kia Sīsū ʻi he fakalūkufua ʻo e tuʻunga manakoá mo e faitākiekiná. Kuó ne hoko ko e tokotaha fakatoʻoaloto taha ʻi he hisitōliá.” Pea naʻe pehē ʻe he taki Hinitū ko Mohandas K. Gandhi: “ʻOku ʻikai te u ʻiloʻi ha taha kuó ne fai ha meʻa lahi ange maʻá e faʻahinga ʻo e tangatá ʻo laka ʻia Sīsū. Ko hono moʻoní, ʻoku ʻikai ha meʻa ʻe hala ʻi he lotu faka-Kalisitiané.” Kae kehe, naʻá ne tānaki mai: “Ko e palopalemá ʻoku ʻia kimoutolu ia kau Kalisitiané. ʻOku teʻeki ai te mou kamata ke moʻui ʻo fakatatau ki hoʻomou ngaahi akonakí tonu.”
ʻOku maʻu ʻe he Puleʻanga-Haʻa-Kalisitiané ha lēkooti lōloa ʻo e taʻelavameʻa ʻi he moʻui ʻo fakatatau ki he ngaahi akonaki ʻa Sīsuú. Ko Cecil John Cadoux, ko e faihisitōlia ʻo e lotu faka-Kalisitiané, naʻá ne pehē “ko e tupu māmālie mo tuʻumaʻu ʻi he kotoa ʻo e Siasí ʻi ha hehema ki he fakavaivai fakaeʻulungāangá” naʻá ne maʻu ʻa e “tokanga ʻa e kau taki Kalisitiane ʻi muʻa ʻi he . . . 140 T.S.” Naʻá ne pehē: “Ko e hōloa ko eni ʻo e mālohi ʻo e muʻaki tuʻunga fakaeʻulungāangá ʻe tokoni fakanatula ia ki he fai ki he ngaahi founga ʻa e māmaní.”
Ko e founga ko ení naʻe hoko ʻo ngaholo ia ʻi he senituli hono faá, ʻi hono tali ʻe ʻEmipola Konisitanitaine ʻo Lomá ʻa e lotu faka-Kalisitiané. “Kuo ʻikai taʻefakatokangaʻi ʻe he kau faihisitōliá, pea fakaʻiseʻisa ʻi he ngaahi tuʻunga ʻe niʻihi,” ko e tohi ia ʻa Cadoux, “ʻi he fakangaloku lahi fakaʻulia naʻe fai ʻe he Siasí ʻi heʻene fepikitaki mo Konisitanitainé.” Lolotonga ʻa e ngaahi senituli talu mei aí, kuo fakahoko ai ʻe he kau Kalisitiane lau peé ʻa e ngaahi ngāue fakapoʻuli lahi ʻoku taʻefakalāngilangiʻi ai ʻa e huafa ʻo Kalaisí.
Ko e ongo fehuʻi leva eni ʻoku fai ki ai ʻa e tokangá: Ko e hā naʻe akoʻi moʻoni ʻe Sīsuú? Pea ko e hā ʻa e tākiekina ʻoku totonu ke fai kia kitautolu ʻe heʻene ngaahi akonakí?
[Fakatātā ʻi he peesi 3]
“ʻOku ʻikai te u ʻiloʻi ha taha kuó ne fai ha meʻa lahi ange maʻá e faʻahinga ʻo e tangatá ʻo laka ʻia Sīsū.”—Mohandas K. Gandhi
[Fakatātā ʻi he peesi 3]
“Kuo ʻikai ha toe taha kehe kuó ne tākiekina lahi fau pehē ʻa e māmaní.”—Edgar Goodspeed
[Maʻuʻanga]
Culver Pictures