“Ko Hoku Tokoni ʻOku Meia Sihova”

Fakaivimālohiʻi ʻa e Ngaahi Fāmilí ʻe he ʻIloʻi ʻo e ʻOtuá

KO E “ʻĀ ʻo Pēliní.” Ko e meʻa ia naʻe uiʻaki ʻe ha ongo meʻa mali ʻi ʻĀsenitina ha ʻā moʻoni naʻá na langa ke vahe ua ʻaki ʻa hona falé! Naʻe ʻi ai ʻena ngaahi faikehekehe naʻe ʻikai ala fakaleleiʻi; naʻá na fetāufehiʻaʻaki.

Ko hono pangó, he ʻoku ʻikai makehe ʻa e tuʻunga ʻo e ongo meʻa ko iá. ʻOku fakahohaʻasi ʻa e ngaahi fāmili lahi ʻe he fekeʻikeʻi, taʻemateaki mo e fakafili fakaʻaufuli. Ko e meʻa fakamamahi eni, koeʻuhi ko e fāmilí ko ha fokotuʻutuʻu ia naʻe fokotuʻu ʻe he ʻOtuá tonu. (Senesi 1:​27, 28; 2:​23, 24) Ko e meʻaʻofa fakaʻotua ko ení ko ha tuʻunga lelei ia ki hono fakahaaʻi ʻa e ʻofa lolotó. (Lute 1:9) ʻI hono fakahoko honau ngaahi fatongia kuo ʻomai ʻe he ʻOtuá, ʻe lava ke fakalāngilangiʻi ai ʻe he ngaahi mēmipa ʻo e fāmilí ʻa Sihova pea hoko ko ha tāpuaki ʻia kinautolu.a

Koeʻuhi ko e ʻOtuá naʻá ne kamata ʻa e fokotuʻutuʻu fakafāmilí, ʻoku fiemaʻu ke tau tuku ke tākiekina ʻe heʻene fakakaukaú ʻetau mahinoʻi ʻa e founga ʻoku totonu ke ngāueʻaki ʻe he ngaahi fāmilí. ʻOku tokonaki mai ʻe heʻene Folofolá ʻa e akonaki ʻaonga lahi kuo faʻufaʻu ke ne tokoniʻi ke lavameʻa ʻa e ngaahi fāmilí, tautefito ʻi he taimi ʻoku malanga hake ai ʻa e ngaahi polé. Ki he ngafa ʻo e ngaahi husepānití, ʻoku pehē ʻe he Tohi Tapú: “ʻOku totonu ke pehe foki ʻa e ʻofa ʻa e ngaahi husepaniti ki siʻonau ngaahi uaifi, he ko siʻonau sino kinautolu.” ʻI he taimi ʻoku fakahoko ai ʻe he husepānití ʻa e fiemaʻu ko ení, ʻoku fakafiefia ai ki hono uaifí ke “fakaʻapaʻapa ki hono husepaniti.”—Efeso 5:​25-29, 33.

Fekauʻaki mo e vā ʻi he vahaʻa ʻo e ngaahi mātuʻá mo ʻenau fānaú, naʻe tohi ʻe he ʻapositolo ko Paulá: “Ko kimoutolu ʻa e ngaahi tamai, ʻoua te mou fakaʻitaʻi hoʻomou fānaú, kae hanganaki tauhi hake kinautolu ʻi he akonaki mo e fakatonutonu-fakaʻatamai ʻa Sihová.” (Efeso 6:​4, NW) Ko e meʻá ni, ʻi he tafaʻaki ʻe tahá, ʻoku fakatupu ai ha ʻatimosifia fakafāmili māfana, ʻa ia ʻoku ʻai ai ke faingofua ange ki he fānaú ke nau talangofua ki heʻenau ongo mātuʻá.—Efeso 6:1.

Ko e ngaahi poini naʻe lave ki ai ki muʻá ʻoku fakatātaaʻi ai ʻa e faleʻi lelei ʻa e Tohi Tapú ki he moʻui fakafāmilí. ʻI hono ngāueʻaki ʻa e ngaahi tefitoʻi moʻoni fakaʻotuá, ʻoku maʻu ai ʻe he tokolahi ʻa e fiefia ʻi ʻapi. Ko e fakatātaá, ko e ongo meʻa ʻi ʻĀsenitina naʻe lave ki ai ʻi he kamatá. Hili ʻena ako Tohi Tapu mo e Kau Fakamoʻoni ʻa Sihová feʻunga mo e māhina ʻe tolu, naʻá na fakatou kamata ai ke ngāueʻaki ʻa ʻene akonaki fakapotopotó ʻi he nofo malí. Naʻá na ngāue mālohi ke fakaleleiʻi ʻa e fetuʻutakí, ke hoko ʻo kaungāongoʻi ki heʻena ngaahi fiemaʻú taki taha, pea ke na hoko ʻo faʻa fakamolemole. (Palovepi 15:22; 1 Pita 3:7; 4:8) Naʻá na ako ke mapuleʻi ʻena ʻitá pea ke hanga ki he ʻOtuá ki ha tokoni ʻi he taimi naʻe hā ngali ʻikai mapuleʻi ai ʻa e ngaahi meʻá. (Kolose 3:19) ʻIkai fuoloa naʻe toʻo ʻa e “ʻĀ ʻo Pēliní”!

Lava ke Langa Hake ʻe he ʻOtuá ha Fāmili

Ko e ʻilo mo ngāueʻaki ʻa e ngaahi tuʻunga ʻa e ʻOtuá ʻe lava ke ne fakaivimālohiʻi ha fāmili ke ne matuʻuaki ʻa e ngaahi tengé. ʻOku mātuʻaki mahuʻinga eni, he naʻe kikiteʻi ko e fokotuʻutuʻu fakafāmilí te ne hokosia ha ʻohofi kakaha ʻi hotau ʻahó. Naʻe tomuʻa tala ʻe Paula ʻa e movete lolotonga ʻi he tuʻunga fakaʻulungāangá pea mo e sōsaieti fakaetangatá. Naʻá ne pehē ʻe fakaʻilongaʻiʻaki ʻa e “ngaahi ʻaho fakaʻosí” ʻa e taʻemateaki, ko e mole ʻa e “ʻofa fakanatulá,” mo e talangataʻa ki he mātuʻá, naʻa mo e ʻi he lotolotonga ʻo e faʻahinga “ʻoku nau maʻu ha faʻahinga anga-līʻoa fakaʻotua.”—2 Timote 3:​1-5, NW.

Ko e feinga ke fakahōifuaʻi ʻa e ʻOtuá ʻe lava ke tokoni ia ki hono fakafepakiʻi ʻa e ngaahi ola fakatupu maumau pehē ʻi he fāmilí. Kuo ʻiloʻi ʻe he ngaahi fāmili lahi ʻoku fiemaʻu ha fakaleleiʻanga fakalaumālie ke tokoniʻi kinautolu ke nau fakafepakiʻiʻaki ʻa e ngaahi faingataʻa lahi ʻoku nau fehangahangai mo iá. Kapau ʻoku holi ʻa e ngaahi mēmipa he fāmilí ke tauhi maʻu ha vahaʻangatae lelei mo e ʻOtuá, ʻoku fiemaʻu ʻo hiliō he meʻa kotoa ke nau ngāueʻaki ʻa e ngaahi tefitoʻi moʻoni Fakatohitapú pea ʻiloʻi “ka ʻikai langa ʻe Sihova ʻa e fale, ko e ongosia ʻa e kau langa ko e kulanoa pe.” (Sāme 127:1) Ko e lavameʻa lahi taha ʻi hono pouaki ʻa e fiefia ʻi he fāmilí ʻoku hoko mai ia ʻi hono fakamuʻomuʻa ʻa e ʻOtuá ʻi he moʻui fakafāmilí.—Efeso 3:​14, 15.

Naʻe ʻiloʻi ʻe ha tangata ko Dennis ʻi Hauaiʻi ʻa e moʻoni ʻo e meʻa ko iá. Neongo naʻe taku ko ha Kalisitiane ia, naʻe hoko ʻa e lea koví mo e fuhú ko ʻene founga moʻuí ia. Hili ʻene ngāue ʻi he kau taú, naʻá ne hoko ai ʻo toe fakaaoao mo fonu tāufehiʻa ange. “Naʻá ku fuhu maʻu pē,” ko ʻene manatú ia. “Naʻe ʻikai te u tokanga ki he meʻa naʻe hoko kiate aú, pea naʻe ʻikai te u ilifia ki he maté. Naʻe hokohoko atu ʻa e lea koví mo e fuhú. Ko hoku uaifí, ʻa ia ko e taha ia ʻo e Kau Fakamoʻoni ʻa Sihová, naʻá ne fakalototoʻaʻi au ke u ako Tohi Tapu.”

Naʻe talitekeʻi ʻe Dennis ʻa e ngaahi feinga ʻa hono uaifí. Kae kehe, naʻe fakavaivaiʻi ʻe hono ʻulungāanga faka-Kalisitiané ʻa ʻene fakakaukau ʻikai leleí. Naʻe faifai pē ʻo ʻalu ʻa Dennis ki ha fakataha faka-Kalisitiane mo hono uaifí mo e fānaú. Hili iá, naʻe kamata ha ako Tohi Tapu mo Dennis, pea naʻá ne fai ha fakalakalaka lelei. Naʻá ne liʻaki ha tōʻonga ʻo e ifi fuoloa ʻi he taʻu ʻe 28 pea tuku ʻene feohi mo e ngaahi kaumeʻa ʻa ia naʻa nau kau ki he ngaahi meʻa kotoa naʻá ne feinga ke ikuʻí. ʻI heʻene fakamālō kia Sihová, naʻe fakamatala ʻa Dennis: “Naʻe hoko ʻo lelei ange ʻa ʻeku moʻui fakafāmilí. Naʻa mau ō fakafāmili ki he ngaahi fakatahá pea ʻi he ngāue fakafaifekaú. Naʻe ʻikai kei ilifia ʻeku ongo tamaikí ʻiate au, he naʻá ku ako ke mapuleʻi ʻa ʻeku ʻitá pea tuku hono ngāueʻaki ʻa e lea koví. Naʻe lava ke mau talanoa pea fiefia ʻi he ngaahi fetalanoaʻaki Fakatohitapú. Ka ne taʻeʻoua ʻa e moʻoni Fakatohitapú, ʻe ʻikai te u ʻi heni he ʻahó ni; naʻá ku mātuʻaki ʻitangofua.”

ʻE lava ke maʻu ʻe he ngaahi fāmilí ʻa e fiefia ʻi he taimi ʻoku nau ngāue mālohi ai ke fai ʻa e finangalo ʻo Sihová. Kuo hā mei he meʻa naʻe hokosiá naʻa mo hono ngāueʻaki ʻe ha mēmipa ʻe taha ʻo ha fāmili ʻa e ngaahi tefitoʻi moʻoni Fakatohitapú, ʻoku lelei ange ai ʻa e ngaahi meʻá ʻi he ʻikai taʻefai ia ʻe ha tahá. Ko hono langa hake ha fāmili Kalisitiané ko ha ngāue faingataʻa, ʻoku fiemaʻu ki ai ʻa e pōtoʻi mo e taimi. Ka ko e ngaahi mēmipa ʻo e ngaahi fāmili ko iá ʻoku nau maʻu ʻa e fakapapau ʻe fakapaleʻi ʻe Sihova ʻenau ngaahi ngāue langá ʻaki ʻa e lavameʻa. ʻE lava ke nau fakaongo atu ʻa e ngaahi lea ʻa e tokotaha-tohi-sāmé: “Ko hoku tokoni ʻoku meia Sihova.”—Sāme 121:2.

[Fakamatala ʻi lalo]

[Fakamatala ʻi he peesi 9]

“ʻOku tauhingoa ki ai [ʻOtuá] ʻa e ngaahi famili kotoa pe ʻi langi mo mamani.”—EFESO 3:15

[Puha ʻi he peesi 8]

ʻOKU KOLOAʻAKI ʻE SIHOVA ʻA E FOKOTUʻUTUʻU FAKAFĀMILÍ

“Naʻe tapuakiʻi ʻakinaua ʻe he ʻOtua, pea naʻe folofola kiate kinaua ʻe he ʻOtua, ʻo pehe, Mo fakatupu, mo fakatokolahi, mo fakafonu ʻa mamani.”—Senesi 1:28.

“Oku monuia akinautolu kotoabe oku manavahe kia Jihova; . . . E tatau ho unoho moe vaine oku faa fua i ho vee fale.” —Sāme 128:​1, 3, PM.