Ko Hono Fakaʻuhingaʻi ʻa e Ngaahi Fakaʻilongá ko ha Meʻa Mafatukituki!
“ʻI he ʻuluaki taimí naʻá ku fakakaukau ai ko e langa ʻulu pē ʻa homa foha ko Andreas. Ka naʻá ne taʻefiefiekai pea naʻe māʻolunga ʻa hono mofí. Naʻe fakaʻaʻau ʻo kovi ange ʻa e langa ʻulú, pea naʻá ku hoko ai ʻo hohaʻa. ʻI he foki mai ki ʻapi ʻa hoku husepānití, naʻá ma ʻave ʻa Andreas ki he toketaá. Naʻá ne sivi ʻa e ngaahi fakaʻilonga ʻo e mahakí pea ʻave ʻa Andreas he taimi pē ko iá ki he falemahakí. Naʻe mafatukituki ange ʻa e palopalemá ia ʻi ha langa pē ʻo e ʻulú. Naʻe maʻu ʻe Andreas ʻa e mofi ʻutó. Naʻe faitoʻo ia pea naʻe vave ʻa ʻene toe saí.”—Gertrud, ko ha faʻē ʻi Siamane.
KO E hokosia ʻa Gertrud ʻoku ngalingali maheni mo ia ʻa e ngaahi mātuʻa tokolahi. ʻOku nau fakasio ki he ngaahi fakaʻilonga ʻoku fakahaaʻi ai pe ʻoku puke nai ʻenau kiʻi tamá. Neongo ko e puke kotoa pē ʻoku ʻikai mafatukituki, heʻikai lava ke tukunoaʻi ʻe he ngaahi mātuʻá ʻa e ngaahi fakaʻilonga ʻo e mahamahaki ʻi heʻenau fānaú. Ko hono fakasio ʻa e ngaahi fakaʻilongá pea fai ha ngāue feʻungamālié ʻe ʻi ai hono ola lelei. Ko ha meʻa mafatukituki ia.
ʻOku hoko eni ʻi he ngaahi meʻa kehe tuku kehe ʻa e moʻui leleí. Ko ha tuʻunga fehoanakimālie ʻe taha ko e fakatamaki ʻi he peau kula ʻi Tīsema 2004 ʻi he ngaahi feituʻu takatakai ʻi he ʻŌseni ʻInitiá. Ko e ngaahi kautaha fakapuleʻanga ʻi he ngaahi feituʻu hangē ko ʻAositelēlia mo Hauaiʻí naʻa nau ʻiloʻi ʻa e fuʻu mofuiké ʻi he fakatokelau ʻo Sumatra pea nau tomuʻa ʻiloʻi ʻa e fakatuʻutāmaki ʻe lava ke hoko ʻi he hili iá. Neongo ia, naʻe ʻikai ha ngaahi kautaha fetuʻutaki ki he kakai ʻi he ngaahi ʻēlia fakatuʻutāmakí ke nau maʻu pe tali ai ha fakatokanga. Ko hono olá, naʻe mole ai ʻa e moʻui laka hake he toko 220,000.
Ngaahi Fakaʻilonga Mahuʻinga Lahi Ange
ʻI he taimi naʻe ʻi māmani ai ʻa Sīsū Kalaisí, naʻá ne ʻoange ki heʻene kau fanongó ha lēsoni ʻi hono fakasio ʻa e ngaahi fakaʻilongá pea mo ngāue ʻo fakatatau ki ai. Naʻá ne talanoa fekauʻaki mo ha meʻa ʻoku mahuʻinga mamaʻo ange. ʻOku fakamatala ʻe he Tohi Tapú: “Pea ʻalu atu kiate ia ʻa e kau Falesi mo e kau Satusi, ko hono ʻahiʻahiʻi, ʻo nau tala ke ne fakaʻaliʻali kiate kinautolu ha fakaʻilonga mei langi. Ka ka tali ʻe ia ʻo ne pehe kiate kinautolu, Tokaange ha efiafi ʻoku mou pehe, ʻE ʻafua, he ʻoku kulokula ʻa e langi. Pea tokaange ha pongipongi ʻoku mou pehe, ʻE ʻalotamaki ʻa e ʻaho ni, he ʻoku kulokula kae fetautauʻi ʻa e langi. ʻOku mou vavanga [pe fakaʻuhinga] koā ki he mata ʻo e langi; ka ko e ngaahi fakaʻilonga kuonga ʻoku ʻikai te mou lava.”—Mātiu 16:1-3.
ʻI he lave ki he “ngaahi fakaʻilonga kuonga,” naʻe fakahaaʻi ai ʻe Sīsū ko ʻene kau fanongo Siu ʻi he ʻuluaki senitulí naʻe totonu ke nau lāuʻilo ʻo fekauʻaki mo e fakavavevave ʻo e taimi ʻa ia naʻa nau moʻui aí. Ko e fokotuʻutuʻu ʻo e ngaahi meʻa faka-Siú naʻe vave ke ne hokosia ha fakatamaki ʻa ia te ne uesia kinautolu kotoa. ʻI ha ngaahi ʻaho siʻi ki muʻa heʻene pekiá, naʻe lea ai ʻa Sīsū ki heʻene kau ākongá ʻo fekauʻaki mo e toe fakaʻilonga ʻe taha—ko e fakaʻilonga ʻo ʻene ʻi aí. Ko e meʻa naʻá ne leaʻaki ʻi he taimi ko iá ʻoku mātuʻaki mahuʻinga ia ki he tokotaha kotoa ʻi he ʻahó ni.