“Taha Ia ʻo e Ngaahi ʻAho Lelei Taha ʻi Heʻeku Moʻuí”

“KO E loto-mafasiá ʻoku toutou līpooti lahi tahá, pea mahalo ko e palopalema fakaʻatamai mahuʻinga taha ia ki he toʻutupú,” ko e taukaveʻi ia ʻa e Beyondblue, ko ha kautaha fakapaʻanga ʻe he puleʻangá ʻi ʻAositelēlia. ʻOku fakahaaʻi ʻi he ngaahi fakatotoló ko e toʻutupu ʻAositelēlia nai ʻe toko 100,000 ʻoku nau puke ʻi he loto-mafasiá ʻi he taʻu taki taha.

ʻOku ʻikai hao ʻa e toʻutupu Kalisitiané mei he loto-mafasiá. Kae kehe, ko e tui kia Sihová, kuó ne tokoniʻi ai ʻa e tokolahi ʻo kinautolu ke nau ikuʻi ʻa e ngaahi ongoʻi taʻepaú pea ke ʻai ke lavameʻa ʻa honau tuʻunga talavoú. ʻI hono fakahoko iá, ʻoku nau fai ai ha tākiekina lelei ki he niʻihi kehé. ʻO anga-fēfē?

Fakakaukau angé ki he hokosia ʻa e taʻu 18 ko Claire. Ko ia mo ʻene faʻeé ʻokú na kau ki ha fakatahaʻanga ʻa e Kau Fakamoʻoni ʻa Sihová ʻi Melipoane. ʻI he taimi naʻe liʻaki ai ʻe he tamai ʻa Claire ʻa e fāmilí, naʻá ne hoko ai ʻo loto-mafasia. Ka ko ʻene tui ki heʻene Tamai fakahēvani ko Sihová, naʻe kei hokohoko atu pē ʻa ʻene mālohí. ʻI he ʻaho ʻe taha, naʻe ʻaʻahi ai ʻa e toketā fakafāmilí, ko Lydia, ki he ʻapi ʻo Claire ke vakaiʻi ʻa e faʻē ʻa Claire ʻa ia naʻe puke. Hili iá, naʻá ne fakahaaʻi anga-ʻofa ange te ne ʻave ʻa Claire ki he senitā faiʻanga fakataú. ʻI heʻena fonongá, naʻá ne ʻeke ange ai kia Claire pe naʻe ʻi ai hano sō. Naʻe fakamatalaʻi ange ʻe Claire ʻo pehē ʻi hono tuʻunga ko e taha ʻo e Kau Fakamoʻoni ʻa Sihová, naʻe ʻikai te ne faialea noaʻia mo e tamaiki tangatá. Naʻe ʻohovale ʻa e toketaá ʻi he meʻá ni. Naʻe fakamatalaʻi ange leva ʻe Claire ʻa e anga hono tokoniʻi ia ʻe he Tohi Tapú ke ne fai ʻa e ngaahi fili fakapotopoto ʻi he moʻuí. Fakaʻosí, naʻe tala ange ʻe Claire te ne ʻoange ki he toketaá ha tatau ʻo e tohi makatuʻunga ʻi he Tohi Tapú ʻa ē naʻá ne tokoniʻi lahi iá. Ko e tohí naʻe fakakaveinga ko e Questions Young People Ask​—Answers That Work.

ʻI he ʻaho ʻe tolu hili ʻene maʻu ʻa e tohí, naʻe telefoni ai ʻa Lydia ki he faʻē ʻa Claire ke tala ange ʻa ʻene fiefia lahi ʻi hono lau iá. Naʻá ne kole ange leva ha toe tatau ʻe ono maʻa hono ngaahi kaungāngāué. ʻI hono ʻoange ʻe Claire ʻa e ʻū tohí, naʻe fakamatala ange ʻa e toketaá ki he anga ʻo e maongo kiate ia ʻa e tui ʻa Claire. Naʻe tuʻuaki ange ʻe Claire ke ne ako Tohi Tapu mo ia, pea naʻe tali ia ʻe he toketaá.

ʻI ha ngaahi māhina, naʻe fai ai ʻe Claire ʻa e akó lolotonga ʻa e mālōlō kai hoʻatā ʻa e toketaá. Naʻe kole ange leva ʻe Lydia kia Claire pe te ne lea ʻi ha seminā ʻi he kaveinga fekauʻaki mo e loto-mafasia ʻa e toʻutupú. Neongo ʻa ʻene ilifiá, naʻe loto-lelei ki ai ʻa Claire. Naʻe maʻu ʻa e seminaá ʻe he kakai laka hake he toko 60. Ko e kau palōfesinale ʻe toko fā ʻi he moʻui lelei fakaʻatamaí​—ko e kakai lalahi kotoa​—naʻa nau lea ki he kau fanongó. Naʻe hoko leva ai ʻa e taimi ʻo Claire ke leá. Naʻá ne fakamamafaʻi ʻa e mahuʻinga ki he toʻutupú ke nau maʻu ha vahaʻangatae mo e ʻOtuá. Naʻá ne fakamatala ʻo pehē ʻoku tokanga lahi mai ʻa Sihova ko e ʻOtuá ki he toʻutupú pea ʻokú ne tokoniʻi ʻa e faʻahinga kotoa ʻoku hanga kiate ia ki ha tokoni mo e fakafiemālié. Tānaki atu ki ai, naʻá ne fakamatalaʻi ai ʻa ʻene tuipau ʻe fakangata ʻosi ʻe Sihova ʻa e faʻahinga kotoa ʻo e mahaki fakaesinó mo e fakaʻatamaí. (Aisea 33:24) Ko e hā naʻe hoko mei he faifakamoʻoni lelei ko ení?

“Naʻe haʻu ʻa e tokolahi kiate au ʻi he hili ʻa e fakatahá ʻo tala mai ʻa e maongo kia kinautolu ʻa e fanongo ki ha tokotaha kei siʻi ʻoku talanoa fekauʻaki mo e ʻOtuá,” ko e lea ia ʻa Claire. “Naʻá ku tufa ha tatau ʻe 23 ʻo e tohi Young People Ask. Naʻe ʻomai kiate au ʻe he tamaiki fefine ʻe toko tolu ʻi he kau fanongó ʻenau fika telefoní. Ko e taha ʻi he tamaiki fefiné ni ʻoku ako Tohi Tapu he taimí ni. Ko e taha ia ʻo e ngaahi ʻaho lelei taha ʻi heʻeku moʻuí.”