ʻUluaki Tuliʻi, Toki Tali Lelei

ʻI HA ngaahi taʻu he kuohilí, naʻe hiki ai ʻa Santiago mo hono uaifí, ko Lourdes, ki he kolo fakaʻofoʻofa ko Huillcapata, ʻi Pelū, ke vahevahe ʻa e pōpoaki ʻo e ʻamanaki ʻa e Tohi Tapú ki he kakai ʻi aí. Kae kehe, naʻe vave ʻa e aʻu atu ki ai ʻa ha pātele mei Cuzco ʻo ne fakatahatahaʻi kotoa mai ʻa e kau nofo ʻi he koló. Naʻe fakatokanga ange ʻa e pātelé kiate kinautolu ko e ʻi ai ʻa e Kau Fakamoʻoni ʻa Sihová ʻe hoko ai kia kinautolu ha mala fakatupu mate mo ha sinou lahi ʻa ia te ne tāmateʻi ʻa ʻenau fanga pulú pea maumauʻi ʻenau ngoué.

Naʻe tākiekina ʻa e tokolahi ʻe he “kikite” ko ení, pea laka hake ʻi ha vaeuaʻi taʻu, naʻe ʻikai ke tali ʻe ha taha ʻi he koló ʻa e fakaafe ʻa Santiago mo Lourdes ke ako ʻa e Tohi Tapú. Naʻe tuliʻi ʻe ha ʻōfisa fakakolo ko hono hingoá ko Miguel, ko e kōvana lafitaní, ʻa Santiago mo Lourdes ʻi he loto halá, ʻo tolomakaʻi kinaua. Ka naʻá na fakamelino mo anga faka-Kalisitiane maʻu pē.

Ne aʻu ki he taimi, naʻe tali lelei ai ʻe he niʻihi ʻo e kakai ʻo e koló ha ako Tohi Tapu. Naʻa mo Miguel naʻá ne liliu ʻa ʻene tōʻongá. Naʻá ne kamata ke ako mo Santiago, taʻofi ʻene inu ʻo fuʻu hulú, peá ne hoko ko ha tokotaha fakamelino. Naʻe faai atu pē ʻo tali lelei ʻe Miguel, ko hono uaifí, mo e toko ua ʻo ʻene tamaiki fefiné ʻa e moʻoni ʻo e Tohi Tapú.

ʻI he ʻahó ni, ʻoku ʻi ai ha fakatahaʻanga lakalakaimonū ʻo e Kau Fakamoʻoni ʻa Sihová ʻi he koló ni. ʻOku fiefia ʻa Miguel he ko e lahi taha ʻo e ngaahi foʻi maka naʻá ne toloʻaki ʻa Santiago mo Lourdes naʻe ʻikai tau ia ʻia kinaua, pea ʻokú ne fakamālōʻiaʻi ʻa e ongo meʻá ʻi heʻena faʻifaʻitakiʻanga lelei ʻo e anga-fakamelinó.

[Fakatātā ʻi he peesi 32]

Ko e anga-fakamelino ʻa Santiago mo Lourdes (ʻi ʻolungá) naʻe fakatupunga ai ke liliu ʻa e tōʻonga ʻa Miguel (taupotu ki toʻomataʻú)