ʻAi ʻa e Fakalaulaulotó ko ha Meʻa Fakafiefia
KI HE kakai ʻe niʻihi ko e foʻi fakakaukau ʻo e fakalaulaulotó ʻoku fuʻu lahi fau nai. Te nau vakai nai ki he fakalaulaulotó ko ha ngāue faingataʻa ʻa ia ʻoku fiemaʻu ki ai ʻa e tokangataha fakamākukanga. Ko e faʻahinga peheé te nau toe ongoʻi halaia nai ʻi hono liʻaki ʻa e fakalaulaulotó, tautefito ʻi he taimi ʻoku nau lau ai ʻo kau ki hono mahuʻingá. (Filipai 4:8) Kae kehe, ko e fakakaukauloto fakalongolongo ki he ngaahi moʻoni kuo tau ako ʻo kau kia Sihová, ki hono ngaahi ʻulungāanga fakaʻofoʻofá, ki heʻene ngaahi lavameʻa fakaofó, ki heʻene ngaahi fiemaʻú mo ʻene taumuʻa lāngilangiʻiá ʻe lava pea ʻoku totonu ke hoko ko ha founga fakafiefia ʻaupito ia ke fakamoleki ai ʻa e taimí. Ko e hā hono ʻuhingá?
Ko Sihova ko e ʻOtuá ko e Tokotaha-Pule Aoniu ia ʻo e ʻunivēsí pea ʻokú ne femoʻuekina ʻi he ngāue ki hono fakahoko ʻa ʻene taumuʻa lahí. (Sione 5:17) Ka neongo ʻokú ne femoʻuekina, ʻokú ne tokanga mai ki he ngaahi fakakaukau ʻa ia ʻoku ʻikai ke leaʻaki ʻe he tokotaha lotu taki taha. Naʻe ʻiloʻi ʻe he tokotaha-tohi-saame ko Tēvitá ʻa e meʻá ni peá ne tohi ʻi he malumalu ʻo e fakamānavaʻi fakaʻotuá ʻo pehē: “ʻE Sihova, kuo ke hakule au, ʻo ʻiloā. Ko ʻeku nofo hifo mo tuʻu hake ʻoku ke ʻilo, ʻoku ke vavanga ki heʻeku fakakaukau kei mamaʻo.”—Sāme 139:1, 2.
ʻE ʻuluaki fakakaukau hala nai ha tokotaha ki he ngaahi lea ko ia ʻa e tokotaha-tohi-sāmé. Te ne fakaʻuhinga nai, ‘Neongo ʻoku “mamaʻo” ʻa e ʻOtuá, ʻokú ne fakatokangaʻi ʻa e fakakaukau kovi kotoa pē ʻoku haʻu ki hoku ʻatamaí.’ Ko e moʻoni, ko ha lāuʻilo ki he meʻa ko iá ʻoku ʻaonga ia kia kitautolu. ʻOku lava ke tokoniʻi ai kitautolu ke tau faitau mo e ngaahi fakakaukau halá, pea ʻi he taimi ʻoku tau maʻu ai ʻa e ngaahi fakakaukau peheé, ke tau fakahaaʻi ia ki he ʻOtuá, ʻo falala-pau te ne fakamolemoleʻi kitautolu ʻo makatuʻunga ʻi heʻetau tui ki he feilaulau huhuʻi ʻa Sīsuú. (1 Sione 1:8, 9; 2:1, 2) Kae kehe, ʻi he taimi tatau, ʻoku totonu ke tau manatuʻi ʻoku sivisiviʻi ʻe Sihova ʻa ʻene kau lotú ʻi ha founga lelei. ʻOkú ne tokanga mai ʻi he taimi ʻoku tau fakakaukau loto-houngaʻia ai kiate iá.
Te ke ʻeke nai, “ʻOku fakatokangaʻi moʻoni nai ʻe Sihova ʻa e ngaahi fakakaukau lelei kotoa ʻa e laui miliona ʻo ʻene kau lotú?” ʻIo ʻokú ne fakatokangaʻi moʻoni. Naʻe fakamamafaʻi ʻe Sīsū ʻa e mahuʻingaʻia ʻa Sihova ʻiate kitautolú ʻi heʻene pehē ʻoku fakatokangaʻi ʻe Sihova naʻa mo e fanga kiʻi misí, peá ne toki tānaki mai: “ʻOku mou mahuʻinga [ange] ʻi ha fanga misi tokolahi.” (Luke 12:6, 7) ʻOku ʻikai lava ke fakakaukau ʻa e fanga misí ʻo kau kia Sihova. Ko ia kapau ʻokú ne tokanga mai kia kinautolu, huanoa ange ai ʻa e pau ke ne tokanga mai kia kitautolu pea fiefia ʻi he fakakaukau fakaʻotua ʻo e tokotaha taki taha ʻo kitautolú! ʻIo, ʻi he hangē ko Tēvitá, ʻe lava ke tau lotu ʻi he falala-pau: “ʻE Sihova, ke hoko lelei ki ho ʻao ʻa e . . . fakakaukau ʻa hoku loto, ʻa e ʻAfiona ko hoku Moʻunga mo hoku Koeli!”—Sāme 19:14.
Ko e fakamoʻoni lahi ange ʻoku tokanga moʻoni mai ʻa Sihova ki he fakalaulauloto ʻa ʻene kau lotu mateakí ʻoku maʻu ia ʻi he ngaahi lea fakamānavaʻi ʻa e palōfita ko Malakaí. ʻI he lea ʻo kau ki hotau ʻahó, naʻá ne tomuʻa tala: “Toki fealeleaʻaki ʻa kinautolu naʻe ʻapasia kia Sihova: pea naʻe tokanga ki ai ʻa Sihova, ʻo ne fakafanongo, pea naʻe fai ʻa e tohi fakamanatu ke feʻao mo ia, koeʻuhi ko e kakai ʻoku ʻapasia kia Sihova, mo tokaʻi [pe fakakaukau ki] hono huafa.” (Fakaʻītali ʻamautolu; Malakai 3:16) Ko hono fakamanatuʻi kia kitautolu ʻoku hanganaki “tokanga” mai ʻa Sihova ʻi he taimi ʻoku tau fakakaukau ai ʻo fekauʻaki mo iá ʻe lava ke ne ʻai moʻoni ai ʻa e fakalaulauloto fakaʻotuá ko ha meʻa fakafiefia. Ko ia ai, fakatauange ke tau fakaongo atu ʻa e ngaahi lea ʻa e tokotaha-tohi-sāmé ʻa ia naʻá ne tohi: “Pea u fakakaukau ki hoʻo fai kotoa pe, ʻo fakalaulauloto ki hoʻo ngaahi ngaue.”—Sāme 77:12.