Naʻe Fakalototoʻaʻi ʻa e Niʻihi Kehé ʻe Heʻene Tuí
ʻI HONO fāʻeleʻi mai ʻo Silvia ʻi Tīsema 1992, naʻá ne hā ngali ko ha kiʻi taʻahine moʻui lelei ʻaupito. Ka ʻi heʻene taʻu uá, naʻe sivi ai ʻo ʻiloʻi kuo moʻua ʻa Silvia ʻi he mahaki ʻo e kelení, ʻa ia ʻoku ʻikai lava ʻo faitoʻo pea ʻokú ne ʻai ʻe ia ke fakalalahi ʻa e ngaahi palopalema ʻi he mānavá mo e fakamolū meʻakaí. Ke fekuki mo hono mahakí, ʻoku folo ai ʻe Silvia ʻa e foʻi ʻakau ʻe 36 he ʻaho kotoa pē, mānava kasa pea toe fai ki ai ʻa e faitoʻo fotofota. Koeʻuhi ko e ngāue ko ia ʻo hono maʻamaʻá ʻoku peseti pē ia ʻe 25 ʻi hono fakahoa atu ki he tuʻunga ʻoku totonu ke ʻi aí, kuo pau ai ke ne ngāueʻaki ha hina ʻosikena ʻoku toʻotoʻo holo, ʻo aʻu ki he taimi ʻokú ne mavahe ai mei ʻapí.
“Neongo ia, ʻoku fakaofo ʻa e anga ʻo e fekuki ʻa Silvia mo hono mahakí,” ko e lau ia ʻa ʻene faʻeé, ko Teresa. “Mālō mo ʻene ʻilo ʻo fekauʻaki mo e Tohi Tapú, kuó ne maʻu ai ha tui mālohi. Ko e tui ko iá ʻokú ne tokoniʻi ai ia ke ne fekuki mo hono mamahí mo e taʻefiemālié. ʻOkú ne manatuʻi maʻu pē ʻa e talaʻofa ʻa Sihova fekauʻaki mo ha māmani foʻoú, ʻa ia ʻe faitoʻo ai ʻa e kau puke kotoa pē.” (Fakahā 21:4) ʻI he ngaahi taimi ʻoku ongoʻi loto-siʻi ai ʻa hono fāmilí, ko e malimali loto-falala ko ia ʻa Silvia ʻokú ne fakalototoʻaʻi kinautolu. ʻOkú ne tala ange ki heʻene ongo mātuʻá mo hono tuongaʻané: “Ko e moʻui ʻi he māmani foʻoú te ne solova ʻa e kotoa ʻo hotau faingataʻaʻia he lolotonga ní.”
ʻOku vahevahe atu maʻu pē ʻe Silvia ʻa e ongoongo lelei ʻo e Folofola ʻa e ʻOtuá ki he niʻihi kehé, pea ko e kakai ʻokú ne talanoa mo iá ʻoku nau ʻiloʻi ʻa e tapua atu mei hono fofongá ʻa e fiefiá mo e nēkeneká. Ko e faʻahinga ʻi he fakatahaʻanga Kalisitiane ʻi he ʻOtu Motu Kānelí ʻa ia ʻokú ne maʻu fakataha aí, ʻoku nau toe fiefia lahi moʻoni ʻi he fanongo ki heʻene ngaahi talí pea mo e sio ki heʻene kau ki he ngaahi fakatahá. Pea ʻi he hili ʻa e fakataha taki taha, ʻoku saiʻia ʻa Silvia ke nofo ʻi he Fale Fakatahaʻangá ke talanoa ai mo hono ngaahi tokoua mo e tuongaʻane Kalisitiané. Ko hono natula fakakaumeʻa mo fiefiá kuo ueʻi ai ʻa e tokotaha kotoa pē ʻi he fakatahaʻangá ke nau ʻofaʻi ia.
ʻOku pehē ʻe heʻene tamaí, ko Antonio: “ʻOku akoʻi mai ʻe Silvia kiate kimautolu ha lēsoni mātuʻaki mahuʻinga. Neongo ʻa e ngaahi palopalemá, ko e moʻuí ko ha meʻaʻofa ia mei he ʻOtuá, pea ʻoku totonu ke tau fakahoungaʻi ia.” Hangē ko Silvia, ko e kau sevāniti kotoa ʻa e ʻOtuá, ʻa e talavou mo e taʻumotuʻa, ʻoku nau tatali loto-vēkeveke ki he taimi ʻa ia ʻe “ʻikai ha nofo ai te ne pehe, ʻOku ou mahaki.”—Aisea 33:24.
[Fakatātā ʻi he peesi 31]
ʻOku lau ʻe Silvia ha veesi ʻi he Tohi Tapú kae puke ʻe heʻene faʻeé ʻa e foʻi hina ʻosikená