Ko ha ʻAʻahi Naʻá Ne Fakatupunga ha Liliu Fakaʻaufuli
“NAʻE ʻikai ke u kei lava ʻo tali ke fai mou talanoa ange ki hoku fāmilí ʻa e ongo ‘ʻāngelo’ naʻe fekauʻi ʻe he ʻOtuá ke na haʻu kiate aú.” Ko e tohi ia ʻa ha tangataʻeiki ʻa ia naʻe ʻaʻahi ki ai ha ongo finemui ʻa ia ko e ongo Fakamoʻoni ʻa Sihova. ʻI he ngaahi uike siʻi ki muʻa ke fai ʻa e ʻaʻahí, naʻe mole atu ai ʻi he maté ʻa hono uaifi taʻu 45. Naʻá ne loto-mamahi ʻaupito. Ko ʻene tamaiki lalahí naʻa nau fakafiemālieʻi ia, ka naʻa nau nofo mamaʻo kinautolu. Naʻe ʻikai hano ngaahi kaumeʻa pe kaungāʻapi kuo nau haʻu ʻo ʻaʻahi ange kiate ia.
“ʻOku ʻikai ke u lotu au ki he ʻOtuá he ʻoku ʻikai ke u kei ongoʻi ofi au kiate ia,” ko e tala ange ia ʻe he tangatá ki he ongo finemuí ʻi he taimi naʻá na ʻaʻahi atu ai ki aí. Kae kehe, naʻá na ongoʻi lahi ʻa e tuʻunga ʻo e tangatá pea tuku ai ʻiate ia ha kiʻi tuleki ʻoku makatuʻunga ʻi he Tohi Tapú ʻa ia ʻoku fakakaveinga Ko e Hā ʻa e ʻAmanaki ki he Ngaahi ʻOfaʻanga Kuo Mate? Naʻá ne lau ia ʻi he efiafi ko iá peá ne maʻu ai ʻa e fiemālie.
ʻI ha taimi nounou mei ai, naʻe toe foki atu ʻa e ongo finemui Kalisitiané. Naʻá na manatuʻi ʻa e tuʻunga ʻo ʻene loto-mamahí ʻi he ʻuluaki ʻaʻahí pea ko ʻena haʻu eni ke sio pe ʻokú ne fēfē. Naʻe tohi ki mui ʻe he tangatá: “Naʻá ku ʻohovale ʻaupito ʻi he tokanga mai kiate au ha ongo ua ʻa ia naʻe ʻikai ʻaupito haʻamau maheni pea naʻá na tokanga mai ki heʻeku moʻuí.” Naʻe fakalototoʻaʻi ia ʻe he ngaahi fakamatala naʻá na vahevahe ange mei he Tohi Tapú. Naʻe tala ange ʻe he ongo finemuí te na toe ʻaʻahi ange. Naʻe fiefia ʻa e tangataʻeikí pea naʻe ueʻi ai ia ke ne tohi ʻa e fakamatala naʻe lave ki ai ʻi ʻolungá, ʻi haʻane tohi naʻe lī ki he Fale Fakatahaʻanga ʻo e Kau Fakamoʻoni ʻa Sihová ʻi honau feituʻú.
Ki muʻa ke ne hiki ki ha feituʻu ʻoku ofi ange ai ki he taha ʻo ʻene fānaú, naʻe maʻu ʻe he tangatá ni ʻa e fakataha faka-Kalisitiane ʻa e Kau Fakamoʻoni ʻa Sihová pea kai fakataha ʻi ha houa kai pea mo e fāmili ʻo e taha ʻo e ongo finemui Kalisitiané. Naʻá ne tohi: “Kuó u hiki au mei he feituʻu ne u nofo aí, ka ko e ongo finemuí pea mo homou siasí te u manatuʻi maʻu pē ʻi hoku lotó pea mo ʻeku ngaahi lotú. ʻIo, ʻoku ou lotu au he taimí ni, pea ʻoku ou faʻa fai ia. Kuó u fai ʻe au ha liliu fakaʻaufuli. Naʻe kaunga lahi ki ai ʻa homou ongo finemuí, pea te u kei houngaʻia taʻengata ai pē ʻi he meʻa naʻá na faí.”