Akoʻi Hoʻo Fānaú Ke Nau Fai ha Ngaahi Tali

ʻOKU manatuʻi ʻe Perla mei Mekisikou, ʻi heʻene kei siʻí, naʻe tokoniʻi ia ʻe heʻene fineʻeikí ke ne teuteu ha ngaahi tali nounou ki he Ako Taua Leʻo. ʻI he taimí ni ʻoku ʻi ai ʻa ʻene kiʻi tamasiʻi taʻu nima. ʻOku anga-fēfē ʻene tokoniʻi iá? “Kuo pau ke u ʻuluaki teuteu. ʻI heʻeku teuteú, ʻoku ou fakasio ha palakalafi ʻe malava ke mahinoʻi ʻe heʻeku tamasiʻí, ha palakalafi ko ē ʻe malava ke ne fakamatala ʻi heʻene lea pē ʻaʻaná. Hili iá, ʻokú ma hangataha ki he palakalafi ʻokú ne ui ko ‘ʻeku palakalafí.’ ʻOku ou kole ange ki ai ke ne fakamatalaʻi ia ʻo ngāueʻaki ʻa e ngaahi fakatātā fakaʻahó. Hili iá, ʻokú ma toutou ʻahiʻahiʻi leva ʻa e talí. ʻOkú ma ngāueʻaki ha meʻa ʻoku hangē ha foʻi maiká koeʻuhi ke ne ʻilo ʻa e founga ke puke ai ia ʻi he taimi ʻe tali aí. ʻOku ou fiefia ʻaupito he ʻoku teʻeki ai ke ʻi ai ha fakataha ʻe taha ʻe taʻetali pe taʻehikinima ai. ʻI he taimi lahi tahá, ʻokú ne ʻalu ki he tokotaha faiakó ki muʻa ke kamata ʻa e fakatahá ʻo tala ange ʻa e palakalafi ko ia ʻe tali aí.”

Ko Jens, ko ha tokotaha mātuʻa ʻi ha kulupu lea faka-Hinitī, ʻa ia ʻoku ʻi ai hono ongo foha ʻe toko ua, ʻokú na taʻu ua mo e taʻu fā. ʻI he taimi ʻokú ne teuteu ai mo hono uaifí mo ʻena ongo tamaikí ki he fakatahá, ʻoku nau ngāueʻaki ha founga naʻe ako ʻe Jens mei heʻene ongo mātuʻá. ʻOkú ne pehē: “ʻOkú ma fili ʻa e ngaahi konga ʻi he fakamatalá ʻe malava ke mahinoʻi ʻe he ongo tamaikí. ʻOkú ma feinga leva ke ʻoange kiate kinaua ha vakai fakalūkufua ki he tuʻunga leá pe ko e poini tefito ʻo e kupú, pea ʻi he hili iá ʻokú ma ʻeke ange leva kiate kinaua ʻa e ngaahi fehuʻi ʻokú ma fakakaukau ke na tali ʻi he fakatahá. ʻI he taimi lahi ʻokú ma ʻohovale ʻi he ngaahi tali ʻokú na fai ʻi ha founga fakanatula ʻaupito. Ko e anga ʻo ʻena fakamatalá ʻoku tapua moʻoni mai ai ʻa e meʻa ʻokú na mahinoʻí. Ko hono olá, ʻoku hoko ai ʻa ʻena talí ko ha fakahīkihiki moʻoni kia Sihova pea mo ha fakahāhaaʻi fakafoʻituitui ʻo ʻena tuí.”