Pīkitai ki Hono Fakahāhā Atu ʻa Hoʻo ʻAmanakí ʻo ʻOua ʻe Toe Toumoua
1 Ko e Ako Taua Leʻó ko e founga tefito ia ʻoku tokonaki mai ai ki he kakai ʻa e ʻOtuá he ʻahó ni ʻa e “meʻakai [fakalaumālié] ʻi hono taimi totonu.” (Mt. 24:45) ʻOku tau maʻu ʻa e fakataha mahuʻingá ni mo e ongo taumuʻa tefito ʻe ua: Ke hoko ʻo langa hake fakalaumālie, pea ke ʻai ke fakahāhā atu ʻa ʻetau ʻamanakí ki he niʻihi kehé.—Hep. 10:23-25.
2 Ko e ʻAonga Kiate Kitautolú: ʻOku fakafuofua ko e vahe tolu pē ʻe taha ʻo e kau fanongó ʻi he lahi taha ʻo e ngaahi fakatahaʻangá ʻoku nau ako ki muʻa ʻa e lesoní. Ko e toe vahe tolu pē ʻe taha nai ʻoku nau kau ki hono fai ʻa e talí. Ko e meʻakai fakalaumālie mālohi ʻoku hā ʻi he Ako Taua Leʻó ʻoku ʻikai malava ke makupusi kakato ia ʻi he lolotonga ʻo e fakataha ko iá. ʻOku fie maʻu ke ke vaheʻi ha taimi ke ako ai ki muʻa ʻa e fakamatalá.
3 ʻI hono fai ʻa e teuteu ki he akó, te ke ʻilo nai ʻoku ʻaonga ke ʻuluaki lau pea fakakaukau fekauʻaki mo e ngaahi fehuʻi ʻoku ʻi he kiʻi puha ʻoku ofi ki he ngataʻanga ʻo e kupu akó. ʻE tokoni ʻeni ke fakahanga ʻa hoʻo tokangá ki he ngaahi meʻa tefito ʻe lave ki ai ʻi he lesoní.
4 ʻI he lolotonga ʻo e akó fanongo tokanga ki he meʻa ʻoku leaʻakí. Fanongo tokanga ki he ʻuluaki ngaahi fakamatala ʻa e faiakó; he ko e ngaahi fakamatalá ni ko e teuteu ia ki he ako ko iá. Te ne langaʻi nai ha ngaahi fehuʻi ʻe tolu pe fā ʻe maʻu ha tali ki ai, pe te ne toe fakamanatu ha ngaahi meʻa lalahi ʻe niʻihi mei he lesoni ʻo e uike kuo ʻosí ʻo kapau ko e lesoni ʻo e uike ní ko ha hoko atu ia ʻo e kaveinga tatau. Kapau ʻoku ʻi ai ha fakatonutonu fekauʻaki mo ʻetau mahino ʻo kau ki ha kikite faka-Tohitapu pe ko ha tefitoʻi moʻoni mei he Tohi Tapú, te ne fakahanga ki ai ʻetau tokangá. Ko hono moʻoní, kuo pau ke nounou ʻa e fakamatala ʻoku fai ʻe he toko taha faiakó, koeʻuhi ko e taumuʻa ʻe taha ʻo e akó ko hono ʻoatu ha faingamālie ki he fakatahaʻangá ke nau fakahāhā atu ai ʻenau ʻamanakí. Fanongo tokanga ʻi he lolotonga ʻo e tali ʻoku fai ʻe he niʻihi kehé ʻo fekauʻaki mo e meʻa kuo nau akó; ʻe tokoni ʻeni ke mālohi ange ai ʻa hoʻo tuí.
5 Fakahāhā Atu Hoʻo ʻAmanakí: ʻOkú ke fai maʻu pē ha ngaahi tali he lolotonga ʻo e akó? ʻOku lelei ange ha fakamatala ʻoku nounou mo fakahangatonu. (Fakafehoanaki mo Luke 21:1-4.) Ko ha fakamatala nounou mei he lotó ʻoku houngaʻia ai ʻa e kakaí kotoa. ʻOku totonu ke nounou mo fakahangatonu ʻa e ʻuluaki tali ki ha fehuʻi. ʻOku ʻai ai ʻe he meʻá ni ʻa e niʻihi kehé ke nau lave ki ha konga Tohi Tapu pe ke fakahanga ʻa e tokangá ki ha fakamatala fakaikiiki ʻi he palakalafí. ʻE malava ai ʻe he tokolahi ʻi he foungá ni ke nau fakahāhā atu ʻa ʻenau ʻamanakí. ʻOku totonu ke pau mo fakatupu langa hake maʻu pē ʻa e ngaahi tali ʻoku faí.
6 Kapau kuó ke toki kamata ke maʻu ʻa e akó pe ʻokú ke loto-siʻi ke fai ha tali, te ke loto nai ke ke kole ha tokoni ki he toko taha faiakó. Kole kiate ia ke ne sio mai kiate koe ʻi hoʻo hiki ho nimá ʻi he taimi ʻoku fai ai ha lave ki ha palakalafi ʻokú ke teuteu ke ke fai ha tali ai. Te ke lava nai ke ke pole ke lau ha konga Tohi Tapu ʻoku ʻikai hiki fakahangatonu mai pea mo fai ha kiʻi fakamatala nounou ki hono kaungá. Te ke hikiʻi nai ha kiʻi fakamatala ʻi he tafaʻakí ke tokoni kiate koe ke ke manatuʻi ʻa e meʻa ʻokú ke saiʻia ke ke leaʻaki ʻi hoʻo fai hoʻo talí. Kapau ko ha toko taha kei siʻi koe, manatuʻi ʻe talitali lelei mo fakahoungaʻi ʻa hoʻo ngaahi talí.—Mt. 21:16.
7 ʻOku mātuʻaki mahuʻinga ke tau fakahāhā atu ʻetau tuí, pea ʻoku tokonaki mai ʻe he Ako Taua Leʻó ha faingamālie lelei ke fai ai ia. ʻOku fakamatalaʻi eni ʻe he tohi ko e Qualified to Be Ministers ʻo pehē: “Tatau ai pē pe ko e hā ʻa e palōpalemá, ikuʻi ia pea fakamālohiʻi koe ke fai naʻa mo ha foʻi tali pē ʻe taha. Te ke tokoni atu ai ki he fakatahá, pea te ke ongoʻi lelei ange ai ʻo kapau naʻá ke fai ha tali.” (Peesi 99) Ko ia ai, fēfē ke ke fakaangaanga ke fai naʻa mo ha foʻi tali pē ʻe taha ʻi he Ako Taua Leʻo hono hoko maí pē?—Pal. 15:23.