Lavameʻa—ʻOku Anga-Fēfē Hoʻo Fakafuofuaʻi Iá?

ʻI HE vakai kiate ia ʻa e niʻihi ko e tokotaha fefakatauʻaki lavameʻa taha ia ʻi Niu ʻIoke ʻi he kotoa ʻo e hisitōliá, naʻe ʻiloa ʻa Jesse Livermore ʻi heʻene fai ʻa e ngaahi fili fakapotopoto ʻi he pisinisí. Ko hono olá, naʻá ne tānaki ai ʻa e koloa lahi. Naʻá ne tui ʻa e ngaahi suti tuitui nima lelei tahá, nofo ʻi ha fuʻu fale loki 29, pea heka mo ʻene fakaʻuli ʻi ha fuʻu kā Rolls-Royce ʻuliʻuli.

Naʻe muimui ʻa Tēvitaa ʻi ha ʻalunga meimei tatau. ʻI heʻene hoko ko e tokoni palesiteni mo e pule lahi ʻo ha fuʻu kautaha ʻaati, naʻe ʻamanaki ai ke ne hoko ko ha palesiteni fakapotungāue ʻo e kautahá. Naʻe tohoakiʻi ia ʻe he koloá mo e ongoongoá. Kae kehe, naʻe fai ʻe Tēvita ha fili fakafoʻituitui naʻe iku ai ʻo ne fakafisi. “ʻOku ou ʻiloʻi ʻe au heʻikai ʻaupito ke u toe maʻu ha ngāue ʻi ha tuʻunga māʻolunga,” ko e lau ia ʻa Tēvitá. ʻOkú ke pehē nai naʻe fai ʻe Tēvita ha fili fehālaaki?

ʻOku tui ʻa e tokolahi ko e lavameʻá ʻoku kau ki ai ʻa hono maʻu ʻa e koloá, manakoá, pe tuʻu-ki-muʻá. Kae kehe, ko e faʻahinga ʻoku nau lakalakaimonū fakamatelié ʻoku nau kei hokosia pē nai ʻa e ongoʻi ngeʻesi mo e ʻikai ha ʻuhinga mo e taumuʻa ʻi he moʻuí. Naʻe hā mahino ko e tuʻunga ia ʻo Livermore. Neongo ʻa ʻene koloaʻiá, naʻá ne moʻui ʻi he tuʻunga mamahi, fakatamaki mo e faingataʻa lahi. Naʻá ne hokosia ʻa e loto-mafasia, ngaahi nofo mali taʻelavameʻa, pea ʻikai vāofi mo hono ngaahi fohá. Fakaʻosí, hili e mole lahi ʻa ʻene koloá, naʻe tangutu ai ʻi he ʻaho ʻe taha ʻa Livermore ʻi he pā ʻo ha hōtele fakaʻofoʻofa ʻo tangilāulau ʻi heʻene molé. Naʻá ne ʻota ha inu, toʻo hake ʻene kiʻi tohi takafi letá, pea fai ha tohi fakamāvae ki hono uaifí. ʻI he ʻosi ʻa ʻene inú, naʻá ne manga atu ai ki ha kiʻi loki tukuʻanga vala naʻe ulo siʻisiʻi ai e māmá ʻo ne toʻo ai ʻa ʻene moʻuí.

Lolotonga ko e ngaahi tupuʻanga ʻo e taonakitá ʻoku hā mahino ʻoku lahi, ko e hokosia ko ení ʻoku fakamoʻoniʻi ai ʻa e moʻoni ʻo e fakamatala ʻa e Tohi Tapú: “Ko kinautolu kuo pau honau loto ke koloaʻia, . . . kuo nau hokohokaʻi ʻaki ʻa kinautolu ʻa e ngaahi mamahi lahi.”—1 Timote 6:​9, 10.

ʻE lava ke pehē ko e faʻahinga ʻoku nau fakafuofuaʻi ʻa e lavameʻá ʻaki ʻa e koloá, lakangá, pe tuʻu-ki-muʻá ʻoku nau ngāueʻaki ha tuʻunga ʻoku fehālaaki? ʻOkú ke fakakaukau hifo ʻokú ke lavameʻa? Ko e hā hono ʻuhingá? Ko e hā ʻa e tuʻunga ʻokú ke ngāueʻaki ke fakapapauʻiʻakí? Ko e hā ʻokú ne tākiekina ʻa hoʻo vakai ki he lavameʻá? Ko e kupu hokó ʻoku sivisiviʻi ai ʻa e akonaki alafalalaʻanga kuó ne ʻai ke malava ai ʻa e laui miliona ʻo lavameʻá. Tau sio angé ki he founga te ke lava ai mo koe foki ʻo lavameʻá.

[Fakamatala ʻi lalo]