Ngaahi Fehuʻi mei he Kau Lautohí
ʻOku totonu ke fakaʻehiʻehi ha Kalisitiane mei he ngaahi inu mo e meʻakai ʻoku ʻi ai ʻa e kefiní?
ʻOku ʻikai taʻofi ʻe he Tohi Tapú ʻa hono maʻu ʻe ha Kalisitiane ʻa e kofí, tií, lauʻiʻakaú pea mo e ʻū inu kasa melie ʻoku ʻi ai ʻa e kefiní. Kae kehe, ʻoku ʻomai ʻi he Tohi Tapú ʻa e ngaahi tefitoʻi moʻoni ʻa ia ʻe lava ke tokoniʻi ai kitautolu ke tau fai ʻa e ngaahi fili fakapotopoto. Tau ʻuluaki lāulea angé ki he ʻuhinga ʻoku fakaʻehiʻehi ai ʻa e kakai ʻe niʻihi mei he ngaahi inu mo e meʻakai ʻa ia ʻoku ʻi ai ʻa e kefiní.
Ko e ʻuhinga lahi ʻe taha, he ʻoku vakai nai ki he kefiní ko ha faitoʻo feliliuaki tōʻonga, ʻa ia ʻoku ʻi ai hono mālohi ke ueʻi ʻa e ʻatamaí. ʻOku toe lava ke hoko ia ʻo fakatupu maʻunimā. Ko ha tohi maʻuʻanga fakamatala ki he kau tala-vaí ʻoku pehē ai: “Ko hono maʻu taimi lōloa mo lahi ʻa e kefiní ʻe fakatupunga nai ai ʻa e ongonoa ki ha faitoʻo, fakafalala ki ai mo e maʻunimā. Ko e ngaahi fakaʻilonga fakaesino ʻi he tuku hono ngāueʻakí hangē ko e langa ʻulu, ʻiteʻita, manavasiʻi, loto-moʻua mo e ninimó ʻe hoko nai ia ʻi hono taʻofi fakafokifā ʻa hono maʻu ʻo e kefiní.” Ko e puke ʻi he tuku hono ngāueʻaki ʻo e kefiní kuo fai e lāulea ke fakakau ia ʻi he Diagnostic and Statistical Manual of Mental Disorders, fakataha mo e ngaahi puke kehe ʻi he tuku hono ngāueʻaki ʻo ha faitoʻó. Ko ia ai, ʻoku mahinongofua ʻa e lava ke hohaʻa nai ʻa e kau Kalisitiane ʻe niʻihi koeʻuhi ʻoku nau loto ke fakaʻehiʻehi mei hano maʻunimā pea ʻoku nau holi ke fakahāhā ʻa e mapuleʻi-kitá.—Kaletia 5:23.
ʻOku tui ʻa e niʻihi ʻoku lava ke uesia ʻe he kefiní ha moʻui lelei ʻa ha taha pe ko ha kiʻi tama teʻeki fanauʻi. Ko e kau Kalisitiané kuo pau ke nau ʻofa ki he ʻOtuá ʻaki e ‘kotoa ʻo honau laumālié,’ ko ia ʻoku ʻikai te nau fai ai ha meʻa ʻe mutukia ai ʻenau moʻuí. Pea koeʻuhi ʻoku toe fekauʻi ke nau ʻofa ki honau kaungāʻapí, ʻoku nau fakamamaʻo mei he ngaahi meʻa ʻa ia ʻe fakatupu maumau nai ki ha kiʻi tama teʻeki fanauʻi.—Luke 10:25-27.
ʻOku fiemaʻu pau ʻa e tokanga ko ia ki he moʻui leleí? ʻOku ʻi ai ha fekīhiaki fekauʻaki mo e fehokotaki ʻa e ngaahi mahaki kehekehe mo hono maʻu ʻo e kefiní. ʻOku aʻu ʻo līpooti ʻe he kau fakatotolo ʻe niʻihi ʻo pehē ko e kofí ʻoku fakatupu moʻui lelei. ʻI he 2006, naʻe līpooti ai ʻi he makasini Time ʻo pehē: “Ko e muʻaki ngaahi fakatotoló naʻe pehē ai [ko e kefiní] ʻe fakatupunga nai ai ʻa e kanisā ʻi he tangamimí, toto māʻolunga mo e ngaahi mahaki kehe. Ko e fekumi ki mui ange maí kuo ʻikai ngata pē ʻi heʻene fakataʻeʻaongaʻi ʻa e lahi taha ʻo e ngaahi taukaveʻi ko iá ka kuo toe ʻiloʻi ai ʻa e ngaahi ʻaonga lahi ʻe niʻihi. ʻOku hā ʻoku maʻu ʻe he kefiní ha tuʻunga fakaemaluʻi ki he maumau ʻa e ʻaté, mahaki Parkinson, suká, loto-ngalongaló, makamaka ʻi he ʻahú, loto-mafasiá pea aʻu nai ki he ngaahi kanisā kehe.” ʻI hono ngāueʻaki ʻo e kefiní, naʻe līpooti ʻe ha makasini ongoongo: “Ko e kií—ʻoku mahino—ko e maʻu fakafuofua.”
Ko e Kalisitiane taki taha ʻoku totonu ke ne fai ha fili fakafoʻituitui ʻo makatuʻunga ʻi heʻene mahinoʻi ʻa e fakamatala fakamuimui ʻoku ala maʻu fekauʻaki mo e kefiní pea ʻi he ngaahi tefitoʻi moʻoni Fakatohitapu ʻa ia ʻoku hā ngali fekauʻaki mo iá. Ko e fakatātaá, ko ha Kalisitiane ʻa ia ʻoku ʻamanekina ke ne hoko ko ha faʻē te ne fili nai ke fakaʻehiʻehi mei hono maʻu ʻa e kefiní lolotonga ʻene feitamá kapau ʻokú ne fakamulituku ʻaki ʻe lava ke uesia ai ʻene kiʻi tama teʻeki fanauʻí. Kapau ʻoku ʻiloʻi ʻe ha Kalisitiane ko hono tuku hono maʻu tuʻumaʻu ʻo e kefiní ʻokú ne ʻai ia ke ne ʻiteʻita pe kiʻi puke, ʻe faleʻi nai kiate ia ke ne fakaʻehiʻehi fakataimi mei he kefiní. (2 Pita 1:5, 6) Ko e kau Kalisitiane kehé ʻoku totonu ke nau tokaʻi ha fili pehē, ʻo ʻoua ʻe vilitaki atu ʻenau fakakaukaú.
Ko e hā pē ʻa e fili ʻokú ke fai fekauʻaki mo e ngaahi inu mo e meʻakai ʻoku ʻi ai ʻa e kefiní, manatuʻi ʻa e naʻinaʻi ʻa Paulá: “Pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pe ke ongoongolelei ai ʻa e ʻOtua.”—1 Kolinito 10:31.