Faingataʻaʻia Fakaesino—Kae Vēkeveke ke Ngāue
ʻI HOʻO ʻuluaki fetaulaki mo Leonardo, heʻikai nai te ke vakai kiate ia ko ha tokotaha ngāue langa. ʻOku ʻikai te ne ngāueʻaki ha taha ʻo hono ongo nimá, he naʻe mole ia ki muʻa ʻi ha fakatuʻutāmaki ʻi he ngāué. Kae kehe, neongo ʻa ʻene faingataʻaʻia fakesinó, naʻe ngāue mālohi ʻa Leonardo ʻi ha faiʻanga langa ʻi Acajutla, ʻEli Salavatoa, hangē ko ia ʻoku lava ke ke sio ki ai ʻi he taá.
Koeʻuhi ke kau ʻi he ngāue langa ko iá, naʻe faʻu ai ʻe Leonardo ʻa ʻene ngaahi meʻangāue pē ʻaʻana. ʻOkú ne fakahū ʻa hono kaunima lalo toʻomataʻú ʻi ha mētale fuopotopoto ʻoku fakapipiki ki he kau ʻo ha sāvolo ʻo tata pōtoʻi ʻaki ʻa e kelekelé ki ha saliote. ʻI he ongo kau ʻoku puke aí, naʻá ne fakapipiki ki ai ha ngaahi foʻi mama koeʻuhi ke lava ai ʻo ne teke ʻa e salioté. Ko e hā naʻá ne ueʻi ia ke ne kau ai ʻi he ngāue ko ení?
Naʻe loto ʻa Leonardo ke kau ʻi hono langa ʻo ha Fale Fakatahaʻanga, pe faiʻanga lotu maʻá e fakatahaʻanga ʻo e Kau Fakamoʻoni ʻa Sihova ʻi he feituʻú. Naʻe lahi ʻene ngaahi ʻuhinga ke kalofanga ai mei he ngāue langá. Naʻá ne ngāue fakamāmani taimi-kakato, naʻá ne faingataʻaʻia fakesino, pea naʻá ne ʻosi ngāue ʻi heʻene fakatahaʻangá ko ha sevāniti fakafaifekau. Neongo ia, naʻá ne loto ke fai ʻa e meʻa naʻá ne malavá ke ne toe ngāue ai ki he ʻOtuá ʻi he faiʻanga langá.
ʻOkú ke maʻu ʻa e laumālie tatau ʻi he tauhi ki he ʻOtuá? ʻI he ʻikai ngāueʻaki ʻa ʻene faingataʻaʻia fakesinó ko ha kalofangá, naʻe ngāueʻaki ʻe Leonardo ʻa ʻene mafai fakakaukaú ke faʻu ʻene ngaahi meʻangāue pē ʻaʻana koeʻuhi ke lava ai ʻo ne fai ʻa e ngāue ʻa ia naʻe mei ʻikai malava ke ne faí. Naʻá ne tauhi ki he ʻOtuá ʻaki ʻa e ‘kotoa ʻo hono ʻatamaí.’ (Mātiu 22:37) Pe ʻoku nau faingataʻaʻia fakesino pe ʻikai, ko e kau ngāue ʻoku kau ʻi he langa ʻo e ngaahi Fale Fakatahaʻanga ʻo e Kau Fakamoʻoni ʻa Sihová ʻi he kotoa ʻo e māmaní ʻoku nau maʻu ha laumālie fie ngāue. Ko ʻenau ngaahi fakatahá ʻoku ʻatā ia ki he kakaí, pea ʻoku talitali lelei koe ke ke kau ki ai.