Naʻa Nau Fakakoloa ʻEnau Moʻuí—ʻE Lava Nai Ke Ke Fai Pehē?
KO Marc, ko ha tokoua ʻi Kānata, naʻe ngāue ʻi ha kautaha ʻoku ngaohi ai ʻa e ngaahi meʻangāue fakakomipiuta fihi ʻa ia ʻoku ngāueʻaki ʻe he ngaahi kautaha ʻalu vavaá. Naʻá ne ngāue konga taimi pea hoko ko ha tokotaha tāimuʻa tuʻumaʻu. Ka naʻe tuʻuaki ange ʻe ha supavaisa kia Marc ha hiki lakanga—ko ha lakanga ngāue taimi-kakato mo ha vahe lahi fakaʻulia. Ko e hā e meʻa naʻe fai ʻe Marc?
Ko Amy, ko ha tuofefine ʻi he ʻOtu Motu Filipainí, naʻá ne ngāue ko ha tāimuʻa tuʻumaʻu lolotonga ʻa e fakaʻosiʻosi ʻo ʻene akó. Hili ʻa e maʻu tohi fakamoʻoni akó, naʻe tuʻuaki ange ai ha lakanga ngāue taimi-kakato ʻa ia naʻe fiemaʻu ki ai ʻa e taimi lahi ka naʻe sai ʻaupito ʻa e vahé. Ko e hā ʻa e fili naʻe fai ʻe Amy?
Naʻe fai ʻe Marc mo Amy ʻa e ongo fili kehekehe, pea ko e ola ʻo ʻena filí ʻoku fakahaaʻi ai ʻa e fakapotopoto ʻo e ekinaki naʻe ʻoange ki he kau Kalisitiane ʻi Kolinitō ʻo e kuonga muʻá. Naʻe tohi ʻe he ʻapositolo ko Paulá: “ʻIlonga . . . kinautolu ʻoku ngaueʻaki ʻa mamani, ke hange ʻoku ʻikai ko ʻenau meʻa ke ʻosiki.”—1 Kol. 7:29-31.
Ngāueʻaki ʻa e Māmaní kae ʻOua ʻe ʻOsiki
Ki muʻa ke tau sio ki he meʻa naʻe hoko kia Marc mo Amy, tau ʻuluaki vakai nounou angé ki he ʻuhinga ʻo e foʻi lea “mamani” (pe, koʹsmos ʻi he faka-Kalisí) ʻa ia naʻe ngāueʻaki ʻe Paula ʻi heʻene tohi ki he kau Kolinitoó. ʻI he konga Tohi Tapu ko iá, ʻoku ʻuhinga ʻa e koʹsmos ki he fokotuʻutuʻu fakaemāmani ʻoku tau moʻui aí—ʻa e sōsaieti fakalūkufua ʻo e faʻahinga ʻo e tangatá—pea ʻoku kau ki ai ʻa e ngaahi meʻa anga-maheni ʻoku hoko ko e konga ia ʻo e moʻui fakaʻahó, hangē ko e nofoʻanga, meʻakai mo e vala.a Ke maʻu ʻa e ngaahi meʻa fakaʻaho ko iá, ko e tokolahi taha ʻo kitautolú kuo pau ke tau ngāue. Ko e moʻoni, kuo pau ke tau ngāueʻaki ʻa e māmaní ke fakahokoʻaki hotau fatongia Fakatohitapu ke tokonaki maʻa kitautolu mo hotau fāmilí. (1 Tim. 5:8) Kae kehe, ʻi he taimi tatau, ʻoku tau ʻiloʻi “ʻoku fakaʻaʻau ke mole ʻa mamani.” (1 Sione 2:17) Ko ia ai, ʻoku tau ngāueʻaki ʻa e māmaní ki he lahi ʻoku fiemaʻú kae ʻikai ko hono “ʻosiki.”—1 Kol. 7:31.
ʻI he ueʻi ʻe he akonaki Fakatohitapu ke fakangatangata ki he lahi taha ʻe ala lavá ʻa hono ngāueʻaki ʻo e māmaní, kuo toe siviʻi ai ʻe he fanga tokoua mo e fanga tuofāfine tokolahi ʻa honau tuʻungá, fakasiʻisiʻi ʻa e taimi ngāué, pea ʻai ke faingofua ange ʻenau founga moʻuí. Hili hono fai iá, ʻikai fuoloa kuo nau ʻiloʻi ʻoku nau fakakoloa moʻoni ʻenau moʻuí koeʻuhi ko ʻenau vaheʻi ʻa e taimi lahi ange ke fakamoleki fakataha mo honau ngaahi fāmilí pea ʻi he ngāue ʻa Sihová. ʻIkai ko ia pē, ko ʻenau moʻui faingofuá ʻoku ʻai ai kinautolu ke nau fakafalala siʻisiʻi ange ai ki he māmaní kae lahi ange kia Sihova. ʻE lava nai ke ke fai pehē—ʻo fakafaingofuaʻi hoʻo moʻuí koeʻuhi ke ʻai ke laka ki muʻa ʻa e ngaahi meʻa e Puleʻanga ʻo e ʻOtuá?—Mt. 6:19-24, 33.
“Ongoʻi Ofi Ange kia Sihova ʻi ha Toe Taimi ki Muʻa”
Ko Marc, ʻa ia naʻe lave ki ai ʻi he kamatá, naʻá ne muimui ʻi he faleʻi ʻa e Tohi Tapú ke ʻoua ʻe ʻosiki ʻa e māmaní. Naʻe ʻikai te ne tali ʻa e hiki lakanga māʻolunga naʻe tuʻuaki ange kiate iá. Hili ha ngaahi ʻaho siʻi mei ai, naʻe ʻoange ai ʻe he supavaisa ʻa Marc ha vahe lahi ange ke tohoakiʻi ia ke ne tali ʻa e ngāue foʻoú. “Naʻe hoko ia ko ha ʻahiʻahi,” ko e lau ia ʻa Marc, “ka ne u toe talitekeʻi ia.” ʻOkú ne fakamatalaʻi ʻa hono ʻuhingá: “Ko au mo hoku uaifí, ko Paula, naʻá ma loto ke līʻoa ʻema moʻuí ki hono tauhi ʻa Sihova ki he kakato taha ʻe ala lavá. Ko ia ai, naʻá ma fakapapauʻi ke ʻai ke faingofua ʻema founga moʻuí. Naʻá ma lotu kia Sihova ki ha poto ke aʻusia ʻema taumuʻá pea fokotuʻu ha ʻaho pau ki hono ʻai kimaua ke ma ʻataʻatā ke ngāue maʻa Sihova ʻi he tuʻunga lahi ange.”
ʻOku pehē ʻe Paula: “Naʻá ku ngāue ʻaho tolu he uike ko ha sekelitali ʻi ha falemahaki pea maʻu mo ha vahe lelei. Naʻá ku toe hoko foki ko ha tāimuʻa tuʻumaʻu. Kae kehe, hangē ko Marc, naʻá ku loto ke ʻai au ke u ʻataʻatā ke ngāue kia Sihova ʻi ha feituʻu pē naʻe lahi ange ai ʻa e fiemaʻu ki ha kau fanongonongo ʻo e Puleʻangá. Ka, ʻi heʻeku fakahū ʻeku tohi fakafisí, naʻe pehē ai ʻe hoku supavaisá kuó u feʻunga ke maʻu ha lakanga ko e sekelitali pule ʻa ia naʻe toki ʻatā mai. Ko e ngāue fakasekelitali vahe māʻolunga taha ia ʻi he falemahakí, ka naʻá ku pīkitai pē ki heʻeku fili ke fakafisí. ʻI he taimi ne u tala ange ai ki he supavaisá ʻa e ʻuhinga ʻo e ʻikai ke u tohi ki he lakangá, naʻá ne fakaongoongoleleiʻi au koeʻuhi ko ʻeku tuí.”
ʻIkai fuoloa mei ai, naʻe maʻu ai ʻe Marc mo Paula ha vāhenga-ngāue ke ngāue ko ha ongo tāimuʻa makehe ʻi ha kiʻi fakatahaʻanga ʻi ha feituʻu mavahe ʻi Kānata. Ko e hā ʻa e ola ʻo ʻena hiki ko iá? ʻOku pehē ʻe Marc: “Hili hono liʻaki ha ngāue vahe lelei ʻa ia ne u fai ʻi he meimei vaeua ʻo ʻeku moʻuí, naʻá ku manavasiʻi, ka naʻe faitāpuekina ʻe Sihova ʻema ngāue fakafaifekaú. ʻOkú ma ongoʻi ʻa e fiefia lahi fakaʻulia ʻoku maʻu mei hono vahevahe atu ʻa e ngaahi meʻaʻofa fakalaumālié ki he niʻihi kehé. Naʻe toe fakakoloa ʻe he ngāue taimi-kakató ʻa ʻema nofo malí. ʻOku fakatefito ʻema ngaahi fetalanoaʻakí ʻi he ngaahi meʻa ʻoku mahuʻinga moʻoní—ʻa e ngaahi meʻa fakalaumālié. ʻOkú ma ongoʻi ofi ange kia Sihova ʻi ha toe taimi ki muʻa.” (Ng. 20:35) ʻOku tānaki mai ʻe Paula: “ʻI haʻo liʻaki hoʻo ngāué mo e ngaahi fiemālie ʻo ha ʻapi kuó ke anga ki ai, kuo pau ke tuku hoʻo falalá kotoa kia Sihova. Naʻá ma fai ia, pea naʻe faitāpuekina kimaua ʻe Sihova. Ko e siʻi fanga tokoua mo e fanga tuofāfine ʻi he fakatahaʻanga ne ma foʻou ki aí naʻa nau ʻai ke ma ongoʻi ʻoku ʻofaʻi mo fiemaʻu kimaua. ʻOkú ou ngāueʻaki he taimí ni ʻa e ivi naʻá ku ngāueʻaki ʻi heʻeku ngāue ki muʻá ke tokoniʻi fakalaumālie ʻa e kakaí. ʻOku hulu fau ʻa ʻeku fiefia ke ngāue ʻi he vāhenga-ngāué ni.”
‘Maʻu e Meʻa Kotoa kae ʻIkai Fiefia’
Ko Amy, ʻa ia naʻe lave ki ai ʻanenai angé, naʻá ne fili ha ʻalunga kehe. Naʻá ne tali ʻe ia ʻa e lakanga māʻolunga taimi-kakato naʻe tuʻuaki ange kiate iá. ʻOku pehē ʻe Amy: “ʻI he ʻuluaki taʻú, naʻá ku kei longomoʻui pē ʻi he ngāue fakafaifekaú ka naʻe aʻu ki he tuʻunga ko e hiki māmālie ʻa e tokangataha ʻeku moʻuí mei he ngaahi meʻa ʻo e Puleʻangá ki he hikihiki lakanga ʻi he ngāue paʻangá. Naʻe ʻomai ʻa e ngaahi tuʻuaki hiki lakanga fakatauele pea ne kamata ke u fakamoleki hoku iví ʻi he feinga ke kaka ki ʻolungá. ʻI he ʻalu ke lahi ange ʻa e ngaahi fatongia ʻi he ngāué, naʻá ku fakamoleki ai ʻa e taimi siʻisiʻi ange ʻi he ngāue fakafaifekaú. Faifai pē, ʻo ʻikai ke u kei ʻalu he malangá.”
ʻI he sioloto atu ki he taimi ko iá, ʻoku pehē ʻe Amy: “ʻI he tuʻunga fakapaʻangá, naʻá ku maʻu ʻa e meʻa kotoa. Naʻe lahi ʻeku fefolauʻakí pea ʻaluʻalu ʻea pē ʻi he ongoongoa naʻe maʻu mei hoku lakanga māʻolungá. Neongo ia, naʻe ʻikai ke u fiefia. Neongo hono maʻu ʻa e paʻangá, naʻe lahi ʻeku palopalemá. Naʻá ku fifili pe ko e hā ʻa e meʻa naʻe halá. Naʻe faai atu pē ʻou fakatokangaʻi ko e tulitāupaua ki he ngāue ʻi he māmani ko ʻení, naʻá ku mei ‘he ai mei he tuí.’ Ko hono nunuʻá, hangē tofu pē ko e meʻa ʻoku tala mai ʻe he Folofola ʻa e ʻOtuá, ne u tofanga ʻi he ‘gaahi mamahi lahi.’”—1 Tim. 6:10, PM.
Ko e hā naʻe fai ʻe Amy? ʻOkú ne fakamatala: “Naʻá ku kole ki he kau mātuʻá ke tokoniʻi au ke toe fakaake ʻeku moʻui lelei fakalaumālié pea kamata maʻu ʻa e ngaahi fakatahá. ʻI he lolotonga ʻo ha hiva ʻe taha, naʻe kamata ke u tangi. Ne u manatua ʻa e lahi ʻo ʻeku fiefiá ʻi he lolotonga ʻo e taʻu ʻe nima naʻá ku kau ai ʻi he utu-taʻú ʻi he tuʻunga ko ha tāimuʻá, neongo naʻá ku masiva fakamatelie ʻi he taimi ko iá. Naʻá ku ʻiloʻi naʻe pau ke tuku ā hono fakamoleki hoku taimí ʻi he tuli ki he paʻangá kae fakamuʻomuʻa ʻa e ngaahi meʻa ʻo e Puleʻangá. Naʻá ku tali fiemālie ha lakanga māʻulalo ange ʻi he ngāué, ʻa ia naʻe pau ke holo ai ʻeku vahé ʻaki ʻa e peseti ʻe 50, pea toe kamata kau atu ʻi he ngāue fakamalangá.” ʻOku fakamatala fiefia ʻa Amy: “Naʻá ku maʻu ʻa e fiefia ʻo e ngāue ko ha tāimuʻá ʻi ha ngaahi taʻu siʻi. ʻI he taimi ní, ʻoku ou ongoʻi ʻa e fiemālie moʻoni ʻa ia naʻe ʻikai ʻaupito ke u hokosia ʻi he taimi naʻá ku fakamoleki ai ʻa e lahi taha hoku taimí ʻi he ngāue maʻá e māmaní.”
ʻE lava ke fengaʻunuʻaki ho tuʻungá pea ʻai ke faingofua hoʻo founga moʻuí? Kapau te ke ngāueʻaki ʻa e taimi ʻoku ala maʻú ke laka ki muʻa ai ʻa e ngaahi meʻa ʻo e Puleʻangá, ʻe fakakoloa foki ai ʻa hoʻo moʻuí.—Pal. 10:22.
[Fakamatala ʻi lalo]
a Sio ki he Insight on the Scriptures, Voliume 2, peesi 1207-8.
[Fakatātā ʻi he peesi 19]
ʻE lava ke fengaʻunuʻaki ho tuʻungá pea ʻai ke faingofua hoʻo founga moʻuí?
[Fakatātā ʻi he peesi 19]
“Kuó U ʻOsi Manako ʻAupito Ai Au!”
Ko David, ko ha tokotaha mātuʻa Kalisitiane ʻi ʻAmelika, naʻá ne fakaʻamu ke ne kau fakataha mo hono uaifí mo e fānaú ʻi he ngāue taimi-kakató. Naʻe malava ke ne fokotuʻutuʻu ha ngāue konga taimi ʻi he kautaha naʻá ne ngāue aí, peá ne kamata ngāue ko ha tāimuʻa tuʻumaʻu. Naʻe fakakoloa ʻe he liliu ko iá ʻa ʻene moʻuí? ʻI ha ngaahi māhina ki mui ai, naʻe tohi ʻa David ki hano kaungāmeʻa: “ʻOku ʻikai ha meʻa ʻe toe fakafiemālie ange ka ko e hoko ʻo kau kakato ʻi he ngāue ʻa Sihová fakataha mo hoto fāmilí. Naʻá ku pehē moʻoni ʻe au ʻe mahili atu ha taimi kae lava ke u toki anga ki he tāimuʻá, ka kuó u ʻosi manako ʻaupito ai au! ʻOku fakaivifoʻou moʻoni.”
[Fakatātā ʻi he peesi 18]
Marc mo Paula ʻi he ngāue fakafaifekaú