Kuó Ke Vaheʻi ha Taimi ki he Ako Tohi Tapú?
ʻI HE taʻu kuo ʻosí, naʻe fanongonongo ai ʻe he Kulupu Pulé ha feʻunuʻaki ki he taimi-tēpile fakataha ʻa e fakatahaʻangá ʻa ia ʻoku fakaʻatā ai ʻa e taimi lahi ange ki he ako Tohi Tapú mo e fetalanoaʻaki ʻi he tuʻunga ko ha fāmilí. Kapau ko ha ʻuluʻi fāmili koe, fakapapauʻi ʻoku fai ha ako Tohi Tapu fakafāmili mohu ʻuhinga mo tuʻumaʻu mo ho uaifí pea mo e fānaú. Ko e ngaahi hoa mali ʻoku ʻikai haʻanau fānaú te nau saiʻia ke ngāueʻaki ʻa e taimi ko ení ke ako Tohi Tapu fakataha ai. Ko e fanga tokoua mo e fanga tuofāfine ʻoku ʻikai hanau ngaahi fatongia fakafāmilí ʻe malava ke nau ngāueleleiʻaki ʻa e taimi ko ení ki he ako Tohi Tapu fakafoʻituitui.
Kuo fakahaaʻi ʻe he tokolahi ʻa e houngaʻia ki he fokotuʻutuʻu ki hono maʻu ha efiafi Lotu Fakafāmilí. Ko e fakatātaá, ko Kevin, ko ha mātuʻa ia, ʻa ia naʻá ne tohi: “Ko e lea ‘māloó’ ʻoku ʻikai kei mālohi feʻunga ia ke fakahaaʻi ai ʻa e anga ʻo ʻemau ongoʻi ʻi he fakatahaʻangá. ʻI he tuʻunga ko e kau mātuʻá, kuo mau lāulea ki he founga ʻo ʻemau ngāueʻaki ʻa e pō ʻataá ke fai tonu ai ʻa e meʻa kuo kole mai ʻe he Kulupu Pulé—ke ako mo homau fāmilí.”
Ko Jodi, ʻa ia ko hono malí ko ha mātuʻa, naʻá ne tohi: “ʻOku ʻi ai ʻema tamaiki fefine ʻe toko tolu, taʻu 15, 11 mo e taʻu 2. Naʻa mau toki hiki ki ha fakatahaʻanga lea tuhutuhu. ʻOku fiemaʻu ʻa e taimi mo e feinga lahi ke teuteu ai ki he kotoa ʻo e ngaahi fakatahá. ʻI he taimí ni, he feʻunuʻaki ko ení, ʻoku mau maʻu ai ha toe efiafi ʻoku mau lava ke tokangataha ai ki he lotu fakafāmilí!”
Ko John mo JoAnn ko ha ongo meʻa mali ia ʻokú na ngāue ko ha ongo tāimuʻa tuʻumaʻu, naʻá na tohi: “Naʻe faʻa ʻikai ke hokohoko ʻema ako Tohi Tapu fakafāmilí koeʻuhi naʻe pau ke ma fakahū holo ia ʻi he ngaahi ngāue kehekehe ʻa e fakatahaʻangá. Ko e fokotuʻutuʻu foʻou ko ení ko ha meʻaʻofa ia meia Sihova ʻokú ne fakaivifoʻou fakalaumālie kimaua—kapau ʻokú ma ngāueʻaki ʻa e taimí ki he meʻa naʻe fiemaʻu ki aí.”
Ko Tony, ko ha tokotaha teʻeki mali ia ʻi hono taʻu 20 tupú, ʻokú ne vaheʻi ʻa e efiafi Tūsité ko hono pō ako fakafoʻituitui ia. ʻOkú ne ngāueʻaki ʻa e ngaahi taimi kehe ʻo e uiké ke teuteu ai ki he ngaahi fakataha ʻa e fakatahaʻangá. Kae kehe, ʻoku pehē ʻe Tony, “ʻOku ou fakatuʻotuʻa tautefito ki he Tūsité.” Ko e hā hono ʻuhingá? “Ko e efiafi ko iá ko hoku taimi makehe ia mo Sihova.” ʻOku fakamatala ʻa Tony: “ʻOku feʻunga mo e houa ʻe ua, ʻa ʻeku ako ʻa e ngaahi kaveinga ʻoku ʻai ʻo mālohi ange ai hoku vahaʻangatae mo Sihova. Ko hono maʻu ʻa e taimi lahi ange ki he akó ʻoku ou ʻatā ai ke fakalaulauloto ki he ngaahi veesi Tohi Tapu ʻoku ou laú.” Ko e hā hono olá? “Ko e akonaki ʻa Sihová ʻoku ʻalu hifo ʻo nofo loloto ange ʻi hoku lotó ʻi he taimi ki muʻá.” ʻE lava ke ne ʻomai ha fakatātā? “ʻI he tohi Insight, naʻá ku lau ai fekauʻaki mo e kaumeʻa ʻa Tēvita mo Sionatané. Naʻá ku ako ʻa e meʻa lahi mei he ʻulungaanga taʻesiokita ʻo Sionatané. Ko ʻene faʻifaʻitakiʻangá naʻe tokoniʻi ai au ke u sio ke toe māʻalaʻala ange ki he meʻa ʻoku ʻuhinga ki ai ʻa e kaumeʻa moʻoní. ʻOku ou fakatuʻotuʻa atu ki hono ʻilo ʻa e ngaahi meʻa mahuʻinga lahi ange pehē ʻi he ngaahi pō Tūsité!”
ʻOku ʻikai ha veiveiua, ko e kau sevāniti kotoa ʻa Sihová te nau maʻu ʻaonga lahi mei hono ngāueleleiʻaki ʻa e taimi lahi ange ʻa ia ʻoku ala maʻu he taimí ni ki he ako Tohi Tapu mohu ʻuhingá mo e lotu fakafāmilí.