Sīsū Kalaisi​—Ko ʻEne Pōpoakí mo Koe

“Kuo u haʻu koeʻuhi ke nau maʻu moʻui, pea ke nau maʻu ʻo lahi ʻaupito.” —SIONE 10:10.

NAʻE haʻu ʻa Sīsū Kalaisi ki he māmaní ʻi hono ʻuhinga tefitó ke foaki atu, ʻo ʻikai ke maʻu mai. Fakafou ʻi heʻene ngāue fakafaifekaú, naʻá ne foaki ai ha meʻaʻofa mahuʻinga taʻehanotatau ki he faʻahinga ʻo e tangatá—ko ha pōpoaki naʻe fakahaaʻi ai ʻa e moʻoni fekauʻaki mo e ʻOtuá mo Hono finangaló. Ko e faʻahinga ʻoku nau tali ʻa e pōpoaki ko iá ʻoku lava ke nau maʻu ha moʻui lelei ange he taimí ni, ʻo hangē ko ia ʻoku lava ke fakamoʻoniʻi ʻe he laui miliona ʻo e kau Kalisitiane moʻoní.a Ka ko e uho ʻo e pōpoaki naʻe malangaʻi ʻe Sīsuú ʻa e meʻa mahuʻinga taha ʻi he ngaahi meʻaʻofá kotoa—ko e moʻui haohaoa naʻá ne foaki maʻatautolú. Ko ʻetau lelei taʻengatá ʻoku fakatuʻunga ia ʻi heʻetau tali ʻoku fai ki he tafaʻaki tefito ko eni ʻo ʻene pōpoakí.

Meʻa Naʻe Foaki ʻe he ʻOtuá mo Kalaisí Naʻe ʻiloʻi ʻe Sīsū naʻe pau ke ne pekia ʻi ha pekia fakamamahi ʻi he nima ʻo hono ngaahi filí. (Mātiu 20:17-19) Neongo ia, ʻi heʻene lea ʻiloa ʻoku maʻu ʻi he Sione 3:16, naʻá ne pehē ai: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” Naʻe toe pehē ʻe Sīsū naʻá ne haʻú “ke foaki ene moui koe huhui oe toko lahi.” (Mt. 20:28, PM) Ko e hā naʻá ne pehē ai ʻe foaki ʻene moʻuí kae ʻikai toʻó?

ʻI hono ueʻi ʻe he ʻofa hulu faú, naʻe fai ai ʻe he ʻOtuá ha tokonaki ki he faʻahinga ʻo e tangatá ke fakahaofi mei he angahala tukufakaholó mo hono ngaahi nunuʻá—ko e taʻehaohaoa mo e mate. Naʻe fai eni ʻe he ʻOtuá ʻaki hono fekau mai ʻa hono ʻAlo tofu-pē-taha-ne-fakatupú ki he māmaní ke ne pekia ʻi ha pekia fakaefeilaulau. Naʻe fai loto-lelei ki ai ʻa Sīsū, ʻo foaki ʻene moʻui haohaoa fakaetangatá koeʻuhi ko kitautolu. Ko e tokonakí ni, naʻe ui ko e huhuʻí, ʻa e meʻaʻofa lahi taha ʻa e ʻOtuá ki he faʻahinga ʻo e tangatá.b Ko ha meʻaʻofa ia ʻoku lava ke taki atu ki he moʻui taʻengatá.

Meʻa ʻoku fiemaʻu ke ke faí Ko e huhuʻí ko ha meʻaʻofa ia kiate koe fakafoʻituitui? ʻOku fakatuʻunga pē ia ʻiate koe. Ke fakatātaaʻi: Sioloto atu ʻoku ʻoatu kiate koe ʻe ha taha ha kofukofu meʻaʻofa. Ko hono moʻoní, ʻoku ʻikai hoko ia ko hoʻo meʻaʻofa kae ʻoua ke ke ala atu ʻo tali ia. ʻI he founga meimei tatau, ʻoku ʻoatu ʻe Sihova ʻa e huhuʻí kiate koe, ka ko e meʻaʻofá ni ʻoku ʻikai ʻaʻau fakafoʻituitui ia kae ʻoua ke ke ala atu ʻo tali. Anga-fēfē?

Naʻe pehē ʻe Sīsū ko e faʻahinga ʻoku “tui pikitai” kiate iá te nau maʻu ʻa e moʻui taʻengatá. ʻOku kau ki he tuí ʻa e founga ʻo hoʻo moʻuí. (Semisi 2:26) Ko e tui pīkitai kia Sīsuú ʻoku ʻuhinga iá ko hono ʻai hoʻo moʻuí ke fehoanakimālie mo e ngaahi meʻa naʻá ne leaʻaki mo faí. Ke fai iá, kuo pau ke ke ʻiloʻi lelei ʻa Sīsū mo ʻene Tamaí. “Ko eni ia ʻa e moʻui taʻengata,” naʻe pehē ʻe Sīsū, “ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.”—Sione 17:3.

ʻI he taʻu nai ʻe 2,000 kuohilí, naʻe vahevahe atu ai ʻe Sīsū Kalaisi ha pōpoaki naʻá ne liliuʻi ʻa e moʻui ʻa e kakai ʻe laui miliona ʻi he māmaní. Te ke saiʻia ke ʻilo lahi ange fekauʻaki mo e pōpoakí mo e founga ʻe lava ke ke maʻu ʻaonga mei ai mo e faʻahinga ʻokú ke ʻofa aí, ʻo ʻikai ʻi he taimí ni pē, kae aʻu ʻo taʻengata? ʻE fiefia ʻa e Kau Fakamoʻoni ʻa Sihová ke tokoniʻi koe.

Ko e ngaahi kupu hokó ʻe ʻai ke ke maheni ange ai mo Sīsū Kalaisi, ʻa e tangata naʻá ne malangaʻi ha pōpoaki ʻa ia ʻe lava ke ne liliuʻi ʻa hoʻo moʻuí ʻo taʻengata.

[Fakamatala ʻi lalo]