ʻOku ʻi Ai ha Meʻamoʻui ʻAtamaiʻia ʻi Tuʻa​—Ka ko Hai?

ʻI ʻIulope, ʻoku hū ai ha fineʻeiki ki ha fale lotu, ʻokú ne toʻo ha losalio, pea tūʻulutui anga-fakaʻapaʻapa ʻi muʻa ʻi ha ʻīmisi ʻo Mele. ʻI ʻAfilika, ʻoku huaʻi ai ʻe ha fāmili ha sini ʻi ha veʻe faʻitoka ʻo ha kāinga ʻoku tokaʻi. ʻI he ʻOtu ʻAmeliká, ʻoku ʻaukai mo fakalaulauloto ai ha kiʻi talavou, ʻi he ʻamanaki ke fetuʻutaki mo e tokotaha ʻokú ne tui ko hono ʻāngelo tauhi. ʻI ʻĒsia, ʻoku tutu ai ʻe ha taulaʻeiki ha ngaahi pepa lanu kehekehe ko ha feilaulau ki he ngaahi laumālie ʻo e fanga kuí.

KO E HĀ e meʻa ʻoku faitatau ai ʻa e kakai ko ení? ʻOku nau tui kotoa ʻoku ʻi ai ʻa e ngaahi meʻamoʻui ʻatamaiʻia ʻi he nofoʻanga laumālié ʻa ia ʻe lava ke fetuʻutaki ki ai pea ʻoku nau maʻu ʻa e malava ke tākiekina lahi ʻa e moʻui ʻa e tangatá. Ko hono moʻoní, ko e tui ko ení ʻoku ʻikai ke foʻou pe fakaʻohovale. Ko e meʻa ʻoku fakaʻohovalé ko e ʻi ai ko ia ʻa e ngaahi fakakaukau fepakipaki lahi fau fekauʻaki mo ia ʻoku nofo ʻi he nofoʻanga laumālié.

ʻOku lotu ʻa e kau Mosilemí ki he ʻOtua ʻe taha—ʻAla.a ʻOku pehē ʻe he kakai ʻi he Puleʻanga-Haʻa-Kalisitiané ko e ʻOtuá ko ha Tolu-Tahaʻi-ʻOtua, ʻoku faʻuʻaki ʻa e ʻOtua ko e Tamai, ʻOtua ko e ʻAlo, mo e ʻOtua ko e Laumālie Māʻoniʻoni. ʻOku tui ʻa e kau Hinituú ki he ʻi ai ʻa e ngaahi ʻotua mo e ngaahi ʻotua-fefine laka hake ʻi he afé. ʻOku pehē ʻe he kakai ʻe niʻihi ko e ngaahi laumālié ʻoku nau nofo ʻi ha fanga manu pau, ngaahi ʻakau, ngaahi maka, mo e ngaahi vaitafe. Lolotonga iá ʻoku tākiekina ʻa e niʻihi ʻe he ngaahi tohi, ngaahi faiva, mo e ngaahi polokalama televīsone fekauʻaki mo e kau ʻāngelo mo e fanga tēmeniō, fanga tēvolo mo e fanga kiʻi faʻahikehe pauʻu, ngaahi ʻotua mo e ngaahi ʻotua-fefine.

Hangē pē ko e ʻi ai ʻa e ngaahi fakakaukau fepakipaki kehekehe lahi fekauʻaki mo e ngaahi ʻotua mo e ngaahi tuʻunga-ʻotuá, ʻoku toe ʻi ai ʻa e ngaahi fakakaukau fepakipaki kehekehe lahi fekauʻaki mo e founga ke fetuʻutaki ai mo kinautolú. ʻOku tala mai kia kitautolu ʻe he fakaʻuhinga leleí ʻoku ʻikai lava ke tonu ʻa e founga fetuʻutaki kotoa pē. Fakakaukau ki ai ʻi he founga ko ení: Ki muʻa ke tau fai ha telefoni, ʻoku fiemaʻu ke tau ʻilo ʻa e tokotaha ʻoku tau tā ki aí pea ʻoku fiemaʻu ke tau tuipau ko e tokotaha ko iá ʻoku ʻi ai moʻoni pea te ne tali mai ʻetau telefoní. Ke feinga ke fetuʻutaki ki ha tokotaha taʻemoʻoni ʻe hoko ia ʻo taʻeʻaonga. Ka ko e toe kovi angé, ke fetuʻutaki ki ha tokotaha kākā ʻe lava ke hoko ia ʻo fakatuʻutāmaki.

Ko ia, ko hai moʻoni leva ʻoku nofo ʻi he nofoʻanga laumālié? ʻOku ʻikai ke tali pē ʻe he Tohi Tapú ʻa e fehuʻi ko ení ka ʻoku toe fakamatala ai ki he tokotaha ke fetuʻutaki ki aí pea mo e tali ke ʻamanekina mei aí. Hokohoko atu ʻa e lautohí. Te ke ʻohovale nai ʻi he meʻa ʻoku fakahaaʻi ʻe he Tohi Tapú.

[Fakamatala ʻi lalo]