Naʻe ʻOfaʻi Ia ʻe he ʻOtuá pea ʻe Hono Ngaahi Kaungāmeʻá

ʻOKU ʻikai ha taha he ʻahó ni te ne ʻiloʻi ʻa hono hingoá. ʻOku ʻiloa ia he taimí ni ʻi he hingoa pē ʻo ʻene tamaí, ʻa Sēfita. Tau sio angé ki he Tohi Tapú ʻo ako ai fekauʻaki mo e toko ua ko kinauá. Te tau ʻiloʻi ai ko e ʻofefine ʻo Sēfitá naʻe ʻofaʻi fakatouʻosi ʻe he ʻOtuá mo hono ngaahi kaungāmeʻá.

ʻE lava ke tau lau ʻa e talanoa fekauʻaki mo Sēfita mo hono ʻofefiné ʻi he Tohi Tapú ʻi he Fakamaau vahe 11. Koeʻuhi ko Sēfitá ko ha sevāniti faitōnunga ʻa e ʻOtuá, ʻoku ʻikai ha veiveiua naʻá ne fetalanoaʻaki maʻu pē mo hono ʻofefiné ki he Tohi Tapú.

Naʻe moʻui ʻa Sēfita ki muʻa ke kole ʻe he kakai ʻa e ʻOtuá, ko e kau ʻIsilelí, ha tuʻi fakaetangata ke pule mai kia kinautolu. Ko Sēfitá ko ha tangata mālohi ia fakataha mo e pōtoʻi ʻi he taú. Ko ia naʻe kole ʻe he kau ʻIsilelí kiate ia ke ne taki kinautolu ki he kau ʻĀmoní, ko ha fonua kaungāʻapi ʻa ia naʻa nau faitau mo e kau ʻIsilelí.

Naʻe fiemaʻu ʻe Sēfita ʻa e tokoni ʻa e ʻOtuá ke ne ikunaʻi ʻa e kau ʻĀmoní, ko ia naʻá ne fai ai ha palōmesi. Naʻe pehē ʻe Sēfita kapau ʻe foaki ange ʻe Sihova ke ne ikuna, te ne foaki kia Sihova ʻa e ʻuluaki tokotaha ʻe hū mai ki tuʻa mei hono falé ʻi heʻene foki ki ʻapí. Ko e tokotaha ko iá te ne ngāue ʻi he toenga ʻo ʻene moʻuí ʻi he tāpanekale ʻo e ʻOtuá—ko e feituʻu ʻa ia naʻe lotu ai ʻa e kakaí ki he ʻOtuá ʻi he ngaahi ʻaho ko iá. ʻOkú ke ʻiloʻi pe ko hai naʻe ʻuluaki hū mai ki tuʻá?—a

ʻIo, ko e ʻofefine ʻo Sēfitá! Naʻe loto-mamahi ʻaupito ʻa Sēfita. Naʻe toko taha pē ʻa ʻene fānaú. Ka kuó ne fai ha palōmesi kia Sihova pea kuo pau ke ne fai ki ai. ʻI he taimi pē ko iá, naʻe pehē ange ʻe hono ʻofefiné: “ʻAlā, kuo mafaʻa koā ho fofonga kia Sihova? peʻi fai kiate au, ʻo fakatatau ki he meʻa kuo hū atu mei ho fofonga.” Naʻá ne kole leva ke tuku ia ke ne nofo toko taha ʻi he māhina ʻe ua koeʻuhi ke lava ʻo ne ʻalu ai ki he ʻotu moʻungá ʻo tengihia. Ko e hā naʻá ne loto-mamahi aí? Koeʻuhí ʻi he fai ki he fuakava ʻa ʻene tamaí, te ne tukuange ai ʻa ʻene totonu ke mali pea maʻu fānaú. Naʻa mo ia, naʻe ʻikai te ne fakakaukau ki heʻene ngaahi holí tonu ko e meʻa mahuʻinga tahá ia. Naʻá ne loto ke talangofua ki heʻene tamaí pea ke mateaki kia Sihova. ʻOkú ke fakakaukau naʻá ne ʻai ʻa Sihova mo ʻene tamaí ke na fiefia?—

Ko ia naʻe tuku atu ai ʻe Sēfita ʻa hono ʻofefiné ke ne mavahe ʻi he māhina ʻe ua mo hono ngaahi takanga fefiné. ʻI heʻene foki maí, naʻe fakahoko ʻe heʻene tamaí ʻa ʻene fuakavá ʻaki hono ʻave ia ki he tāpanekale ʻo e ʻOtuá ʻi Sailó ʻi he toenga ʻo ʻene moʻuí. ʻI he taʻu kotoa pē, naʻe ʻalu ai ʻa e kau finemui ʻo ʻIsilelí ki Sailo ʻo fakalototoʻaʻi ʻa e ʻofefine ʻo Sēfitá.

ʻOkú ke ʻiloʻi ha fānau ʻoku nau talangofua ki heʻenau ongo mātuʻá pea ʻofa kia Sihova?— ʻOku lelei ke hoko ʻo maheni lelei ange mo e fānau ko iá pea ke hoko ko honau kaumeʻa. Kapau ʻokú ke faʻifaʻitaki ki he ʻofefine ʻo Sēfitá pea talangofua mo mateaki, te ke maʻu ʻa e ngaahi kaungāmeʻa lelei. Te ke ʻai ai hoʻo ongo mātuʻá ke na fiefia, pea ʻe ʻofa foki ʻa Sihova ʻiate koe.