“Kuo Hoko ʻo Moʻoni ʻEku Misí”

ʻI he taʻu ʻe 15 kuohilí naʻe ngāue ai ʻa Emilia ko ha tāimuʻa tuʻumaʻu. Kae kehe, naʻe pau ke ne taʻofi ʻene ngāue taimi-kakató. ʻI he ngaahi taʻu ki muí ni maí, kuó ne faʻa fakakaukauloto ai ki he taimi fakafiefia taha ko ia ʻo ʻene moʻuí, pea naʻá ne toe loto ke fakalahi ʻene kau ʻi he ngāue fakafaifekaú.

Kae kehe, ko e ngāue fakamāmani ʻa Emilia naʻe toʻo atu ai ʻa e taimi lahi ʻaupito, pea ko e fakafaingataʻaʻiaʻangá ni naʻá ne kaihaʻasia ʻene fiefiá. ʻI he taimi ʻe taha, ʻi he ʻao ʻo hono ngaahi kaungāngāué, naʻá ne totoʻe ai: “Pehē ange mai ʻoku ou ngāue pē ʻi ha ngaahi houa siʻi ange!” Naʻe fanongo ai heni hono pule ngāué peá ne fakaofiofi kiate ia ʻo ʻeke pe naʻe moʻoni ia. Naʻe fakapapauʻi ange ʻe Emilia naʻe moʻoni ia. Kae kehe, ke ʻai ia ke malavá naʻe fiemaʻu ke tali ia ʻe ha talēkita koeʻuhí he ko e founga ngāue ʻa e kautahá naʻe fiemaʻu ha tukupā kakato mei he kotoa ʻo e kau ngāué. Naʻe teuteu ʻa hotau tuofefiné ki he fakataha mo e talēkitá pea lotu ki ha nonga mo e loto-toʻa.

Lolotonga ʻa e fakatahá, naʻe kole anga-fakapotopoto mo loto-toʻa ange ai ʻe Emilia ke holoki ʻa ʻene ngaahi houa ngāué. Naʻá ne fakamatalaʻi ʻokú ne ngāueleleiʻaki ʻa hono taimi mālōloó ke tokoniʻi ʻa e niʻihi kehé: “Ko e taha au ʻo e Kau Fakamoʻoni ʻa Sihová, pea ʻoku ou tokoniʻi fakalaumālie ʻa e kakaí. ʻI he ngaahi ʻahó ni ko e tōʻonga fakaeʻulungaanga ʻo e tokolahi ʻoku ololalo. ʻOku fiemaʻu kia kinautolu ha ngaahi tefitoʻi moʻoni mo e ngaahi tuʻunga māʻalaʻala, pea ko e poto ʻoku ou vahevahe mei he Tohi Tapú ʻoku mātuʻaki mahuʻinga ia kia kinautolu. ʻOku ʻikai te u loto ke hanga ʻe heʻeku ngaahi ngāue he ʻosi ʻa e ngaahi houa ngāué ʻo fakasiʻisiʻi ai ʻa e anga ʻo ʻeku ngāue ʻi hení, ka te u saiʻia ke maʻu ha taimi ʻatā lahi ange ke tokoniʻi ʻa e kakaí. Ko e ʻuhinga ia ʻoku ou fiemaʻu ai ke fakasiʻisiʻi ʻa ʻeku ngaahi houa ngāué.”

Naʻe fanongo lelei ʻa e talēkitá peá ne pehē naʻá ne fakakaukau he taimi ʻe taha ke fai ha ngāue ʻofa. Naʻá ne tala ange leva: “Ko e ngaahi ʻuhinga kuó ke ʻomaí, ʻoku ou ongoʻi kuo pau ke u loto-tatau mo hoʻo kolé. Ka ʻokú ke ʻiloʻi te ke maʻu ai ha paʻanga siʻisiʻi?” Naʻe pehē ʻe Emilia naʻá ne ʻiloʻi pea kapau ʻoku fiemaʻu, te ne fakafaingofuaʻi ʻene moʻuí. Naʻá ne toe pehē: “Ko ʻeku taumuʻa mahuʻinga tahá ko hono fai ha meʻa ʻoku fakanonga moʻoni maʻá e kakaí.” Naʻe tala ange ʻe he talēkitá: “ʻOku ou mālieʻia ʻi he faʻahinga ʻoku nau līʻoa taʻesiokita atu honau taimí ki he niʻihi kehé.”

Kuo teʻeki ai ke fakangāueʻi ʻe he kautahá ha taha kuo faifai ange peá ne maʻu ha ngaahi tuʻunga tali lelei pehē. ʻOku fakaʻatā he taimí ni ʻa Emilia ke ngāue ʻi he ʻaho pē ʻe fā ʻi he uike. ʻI heʻene ʻohovale lahí, naʻe hiki ʻene vahé, pea naʻá ne maʻu ʻa e meʻa lahi tatau mo ia ki muʻá! ʻOkú ne pehē: “Kuo hoko ʻo moʻoni ʻeku misí, pea ʻoku malava ke u toe tāimuʻa tuʻumaʻu!”

Kuó ke fakakaukau fekauʻaki mo hono feʻunuʻaki ho ngaahi tuʻungá ke hū pe toe hū ki he ngāue tāimuʻá?

[Fakamatala ʻi he peesi 32]

Naʻe tala ange ʻe he talēkitá: “ʻOku ou mālieʻia ʻi he faʻahinga ʻoku nau līʻoa taʻesiokita atu honau taimí ki he niʻihi kehé”