ʻOkú Ke Manatuʻi?
Kuó ke lau fakalelei ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:
ʻE lava fēfē ke tau tāmateʻi ʻa e afi ʻo e lea taʻemapuleʻí?
ʻOku totonu ke tau sivisiviʻi hotau lotó tonu. ʻI he ʻikai fakaangaʻi ha tokouá, ko e hā ʻoku ʻikai ʻanalaiso ai ʻa e meʻa ʻoku tuʻu nai mei mui ʻi ha fakakaukau peheé? Te tau fakaangaʻi nai ia ʻi ha ʻuhinga ko hono ʻai kitautolu ke tau hā lelei ange? ʻIkai ko ia pē, ko e hoko ʻo fakaangá ʻe lava ke ne ʻai ke kovi ange ha tuʻunga faingataʻa.—8/15, peesi 21.
ʻI he fakaofiofi mai ʻa e ʻaho ʻo Sihová, ko e hā ʻa e ngaahi meʻa ʻoku kei toe ke hoko maí?
ʻE talaki ʻa e “Melino mo e malu!” ʻE ʻohofi pea fakaʻauha ʻe he ngaahi puleʻangá ʻa Pāpilone ko e Lahi. ʻE ʻi ai mo ha ʻohofi ʻo e kakai ʻa e ʻOtuá. ʻE hoko ʻa e tau ʻo ʻĀmaketoné, hoko mai ai hono lī ʻo Sētane mo ʻene kau tēmenioó ki he luo taʻehanotakelé.—9/15, peesi 4.
ʻOku tau maʻu ʻaonga fēfē mei he ʻikai ʻiloʻi ʻa e taimi ʻe hoko mai ai ʻa e ngataʻangá?
Ko e ʻikai ʻiloʻi ʻa e ʻaho pe houa tofu peé ʻoku fakaʻatā ai kitautolu ke fakaeʻa ʻa e meʻa ʻoku ʻi hotau lotó. ʻOku ʻomai ai ʻa e faingamālie ke ʻai ʻa e loto ʻo e ʻOtuá ke fiefia. ʻOku fakalototoʻaʻi ai kitautolu ke tuli ki ha moʻui feilaulauʻi-kita pea tokoniʻi ai kitautolu ke tau falala kakato ange ki he ʻOtuá mo ʻene Folofolá. ʻIkai ko ia pē, ʻoku fakaʻatā ai ʻa e ngaahi fili lolotongá ke ne sivi kitautolu.—9/15, peesi 24-25.
Ko e hā ʻe lava ai ke tau tui ki he ngaahi mana ʻoku lēkooti ʻi he Tohi Tapú?
Naʻe faʻa fakahoko ia ʻi he ngaahi feituʻu kakaí, ʻo ʻikai ʻi ha feituʻu fakapulipuli. Naʻe fakaʻilongaʻi ʻaki ʻene faingofuá, ʻo ʻikai ke ʻi ai ha ngaahi naunau makehe. Naʻe fakahoko ia ke ʻoatu ai ʻa e lāngilangí ki he ʻOtuá, ʻo ʻikai ki he tangatá. Naʻe fakahoko ʻa e ngaahi mana kehekehe, pea ko e kau fakafepaki ʻo e taimi ko iá naʻe ʻikai ke nau fehuʻia ʻene hokó. Ko e ngaahi ʻuhinga eni ke tau falala kakato ai ki he lēkooti ʻa e Tohi Tapú fekauʻaki mo e ngaahi maná.—10/1, peesi 7-8.
Naʻe haʻu mei fē ʻa e ngaahi maka mahuʻinga ʻi he sifa-fatafata ʻo e taulaʻeiki lahi ʻo ʻIsilelí?
Ko e haʻa tuʻi ʻIsipite ʻo e kuonga muʻá ko kinautolu pē naʻa nau puleʻi e ngaahi maka koloa naʻe maʻu hake ʻi he ngaahi vahefonua naʻa nau puleʻí. Fakatatau ki he fakamatala Fakatohitapu ʻi he tohi ʻEkisotó, ko e kau ʻIsilelí naʻa nau mātuʻaki vete ʻa e kau ʻIsipité ʻo ʻenau ngaahi meʻa mahuʻingá ʻi he taimi naʻa nau mavahe ai mei he fonuá. Ko ia ai, ʻoku malava ke pehē naʻe maʻu ʻe he kau ʻIsilelí mei ʻIsipite ʻa e ngaahi maka naʻe ngāueʻaki ki he sifa-fatafata ʻo e taulaʻeiki lahí.—10/1, peesi 18.
Ko e hā ʻoku hohaʻa ai ʻa Sihova fekauʻaki mo hono fakaʻataʻatā hono huafá?
ʻI he Tohi Tapú, ko e “hingoa” ʻoku faʻa ʻuhingá ko e ongoongo. ʻOku pehē ʻe ha tohi maʻuʻanga fakamatala ʻe taha ko e huafa ʻo e ʻOtuá ʻoku ʻuhingá ki he “meʻa ʻoku ʻiloʻiʻaki iá—ko hono fakahaaʻi ʻo ia tonu; ʻokú ne toe fakafofongaʻi ʻa hono ongoongó pea hoko atu ai ʻa hono lāngilangí.” Ko e huafa ʻo Sihová ʻoku kau ki ai hono ongoongó. ʻOkú ne fehiʻa ʻi he fakamaau taʻetotonú pea ʻokú ne manavaʻofa ki hono kau maʻukoviá. ʻI he taimi ʻoku taukaveʻi ai ʻe he faʻahinga ʻo e tangatá ʻoku fakatupunga ʻe he ʻOtuá ʻa e ngaahi meʻa tonu ko ē ʻokú ne fehiʻa aí, ʻoku nau fakameleʻi ai ʻa hono ongoongó. Ko ia ʻoku nau taʻefakaʻapaʻapaʻi ai pe talakaaʻi hono huafá.—10/1, peesi 21.
Ko hai ʻoku fakafofongaʻi ʻe he “ngaahi foʻi fetuʻu ʻe fitu” ʻi he nima toʻomataʻu ʻo Sīsuú ʻoku lave ki ai ʻi he Fakahā 1:16, 20?
ʻOku nau fakafofongaʻi ʻa e kau ʻovasia pani ʻe he laumālié ʻi he ngaahi fakatahaʻangá, pea ko ia ai, ʻi hono fakalahi atú, ko e kau ʻovasiá kotoa.—10/15, peesi 14.
Naʻe fakahāhā fēfē ʻe Sīsū ʻa e ʻulungaanga anga-fakatōkilalo ʻoku lave ki ai ʻi he ʻAisea 50:4, 5?
ʻOku pehē ʻe he ongo veesi ko iá ko e tokotaha ʻokú ne maʻu “ʻa e ʻelelo ʻo e tama ako” ʻe ‘ʻikai te ne foki ki tuʻa.’ Naʻe fakahāhā ʻe Sīsū ha ʻulungaanga anga-fakatōkilalo, ʻo tokanga lelei ki he meʻa naʻe akoʻi kiate ia ʻe heʻene Tamaí. Naʻe vēkeveke mo loto-lelei ʻa Sīsū ke ako meia Sihova, ʻo siofi lelei ʻa e anga-fakatōkilalo ʻa e ʻOtuá ʻi hono fakahāhā ʻa e meesi ki he faʻahinga angahalaʻia ʻo e tangatá.—11/15, peesi 11.