Naʻe Loi ʻa Pita mo ʻAnanaia​—Ko e Hā ʻa e Lēsoni ʻe Lava Ke Tau Akó?

Hangē ko ia ʻokú ke ʻiló ko e loí ko e meʻa ʻokú ke leaʻaki ʻa ia ʻokú ke ʻiloʻi ʻoku ʻikai ke moʻoni. Kuó ke leaʻaki ha loi?—a Naʻa mo e kakai lalahi ʻoku ʻofa ki he ʻOtuá ʻoku nau loi. Mahalo pē ʻokú ke ʻilo fekauʻaki mo ha tokotaha ʻi he Tohi Tapú naʻe pehē. Ko hono hingoá ko Pita, ko e taha ʻi he kau ʻapositolo ʻe toko 12 ʻa Sīsuú. Tau fanongo angé ki he talanoa fekauʻaki mo e ʻuhinga naʻe loi aí.

Hili hono puke ʻa Sīsuú, ʻoku ʻave ia ki he ʻapi ʻo e taulaʻeiki lahí. Kuo fakalaka atu he tuʻuapoó. ʻOku aʻu ʻa Pita ki he lotoʻā ʻo e ʻapi ʻo e taulaʻeikí kae ʻikai fakatokangaʻi. ʻI he maama ʻo ha afi, ko e kaunanga ʻa e taulaʻeiki lahí naʻá ne taki ʻa Pita ki lotó ʻokú ne fakatokangaʻi ia. “Ko koe foki naʻá ke ʻia Sīsū,” ko ʻene leá ia. ʻI he ilifia ʻa Pitá ʻokú ne fakaʻikaiʻi.

ʻOku pehē ʻe he Tohi Tapú ki mui ai, “naʻe fakatokangaʻi atu ia ʻe ha taʻahine ʻe taha.” Peá ne pehē: “Ko e tangatá ni naʻe ʻia Sīsū.” ʻOku toe fakaʻikaiʻi ia ʻe Pita. Pea ʻi he hili ha taimi siʻi ʻoku toe haʻu ha niʻihi kia Pita ʻo pehē: “Ko e moʻoni ko e taha foki koe ʻo kinautolu.”

ʻOku ilifia ʻa Pita. Ko ia ko hono tuʻo tolú ʻokú ne loi ʻo pehē: “ʻOku ʻikai te u ʻilo ʻa e tangatá!” Pea ʻuʻua leva ha moa. ʻI he hanga ʻa Sīsū kia Pitá pea manatuʻi ʻe Pita ʻi ha ngaahi houa siʻi ki muʻa naʻe tala ange ʻe Sīsū kiate ia: “Ki muʻa ke ʻuʻua ha moá, te ke fakafisingaʻi au ʻo tuʻo tolu.” ʻOku tangi mamahi ʻa Pita. ʻOkú ne fuʻu loto-mamahi!

ʻE lava ke hoko ha meʻa pehē kiate koe? —Mahalo pē ʻokú ke ʻi he akó pea fanongo ki he talanoa ʻa e tamaiki akó fekauʻaki mo e Kau Fakamoʻoni ʻa Sihová. “ʻOku ʻikai ke nau salute ki he fuká,” ko e lea ia ʻa ha tokotaha. “ʻOku ʻikai ke nau tau maʻa honau fonuá,” ko e tānaki mai ia ʻa ha tokotaha. ʻOku toe pehē ʻe ha tokotaha, “Ko e moʻoni ʻoku ʻikai ko ha kau Kalisitiane kinautolu koeʻuhi ʻoku ʻikai ke nau kātoangaʻi ʻa e Kilisimasí.” Pea tafoki atu leva ha taha kiate koe ʻo ʻeke atu, “Ko e taha koe ʻo e Kau Fakamoʻoni ʻa Sihová?” Ko e hā te ke leaʻakí?—

ʻOku fiemaʻu ke ke mateuteu ke ʻoatu ha tali lelei ki muʻa ke hoko ha meʻa pehē. Naʻe ʻikai ke mateuteu ʻa Pita. ʻI he hoko mai ʻa e tengé naʻá ne loi! Kae kehe, naʻe fuʻu loto-mamahi ʻi he meʻa naʻá ne faí pea naʻe fakamolemoleʻi ia ʻe he ʻOtuá.

Ko ʻAnanaia ko ha ākonga ʻa Sīsū he kuonga muʻá, naʻe loi foki mo ia. Ka naʻe ʻikai ke fakamolemoleʻi ia ʻe he ʻOtuá pe ko hono uaifí ʻa Sāfaila. Naʻá ne loto-taha mo hono husepānití ke na loi. Tau sio angé ki he ʻuhinga naʻe ʻikai ke fakamolemoleʻi ai ʻe he ʻOtuá ʻa ʻAnanaia mo Sāfailá.

ʻI he ʻaho ʻe hongofulu hili ʻa e mavahe ʻa Sīsū mei he kau ʻapositoló pea foki ki hēvani ki he ʻOtuá, ko e kakai ʻe toko 3,000 naʻe papitaiso ʻi Selusalemá. Ko e tokolahi kuo nau haʻu mei he ngaahi feituʻu mamaʻo ke fakamanatu ʻa e Kātoanga ʻo e Penitekosí, pea ʻi he hili ʻenau hoko ko e kau ākonga ʻa Sīsuú, ʻoku nau loto ke nofo fuoloa atu ke ako lahi ange fekauʻaki mo ʻenau tui foʻoú. Ko ia ko e niʻihi ʻo e kau ākonga ʻa Sīsuú naʻa nau ngāueʻaki ʻenau paʻanga pē ʻanautolu ke tauhiʻaki ʻa e faʻahinga ko iá.

Ko ʻAnanaia mo hono uaifí naʻá na fakatau ha konga ʻapi ke maʻu ha paʻanga ke tokoni ki he kau papitaiso foʻoú. ʻI he ʻomi ʻe ʻAnanaia ʻa e paʻangá ki he kau ʻapositoló, ʻokú ne tala ange ko e kotoa ena ʻo e meʻa naʻe fakataú. Ka ʻoku ʻikai ko ia! ʻOkú ne tauhi maʻana ha konga ʻo e paʻangá! ʻOku ʻai ʻe he ʻOtuá ke ʻilo ʻe Pita ʻa e meʻá ni, ko ia naʻe tala ange ʻe Pita kia ʻAnanaia: “Kuó ke loi, ʻo ʻikai ki he tangatá, ka ki he ʻOtuá.” ʻI he meʻa ko iá, naʻe tō ʻa ʻAnanaia ʻo mate! ʻI he hili mei ai ʻa e houa ʻe tolu nai naʻe hū mai hono uaifí. Naʻe ʻikai ke ne ʻilo ki he meʻa naʻe toki hoko ki hono husepānití, naʻe loi foki mo ia pea tō ʻo mate.

Ko ha lēsoni mālohi ē ko eni: Ko hono tala ʻa e moʻoní ʻoku mahuʻinga! ʻIo ʻoku fiemaʻu kotoa ke tau ako mei ai! Kae kehe, te tau fai kotoa ʻa e ngaahi fehālaaki, tautefito ʻi heʻetau kei siʻí. ʻIkai ʻokú ke fiefia ʻoku ʻofa ʻa Sihova ʻiate koe pea te ne fakamolemoleʻi koe hangē ko ia naʻá ne fai kia Pitá?—Kae manatuʻi, ʻoku fiemaʻu ke tau lea moʻoni. Pea kapau te tau loi ko e hala lahi ia, ʻoku fiemaʻu ke tau kole, ʻio ʻo kōlenga ki he ʻOtuá ke fakamolemoleʻi kitautolu. Ko e meʻa ia kuo pau naʻe fai ʻe Pitá pea naʻe fakamolemoleʻi ia. Kapau te tau feinga mālohi ke ʻoua ʻe toe loi, ʻe fakamolemoleʻi foki kitautolu ʻe he ʻOtuá!