Puha Fehuʻi

◼ ʻOku totonu ke toe pulusi ʻa e ngaahi tohi ʻa e Sōsaietí naʻe ʻosi pulusi ki muʻá ke tufaki ki he niʻihi kehe?

Faai mai ʻi he ngaahi taʻu, kuo pulusi ʻe he Sōsaietí ha ngaahi tohi lahi ʻaupito ʻoku lave ki he meimei tafaʻaki kotoa ʻo e ʻilo ki he Tohitapú. Ko kinautolu kuo nau toki ako ʻa e moʻoní ʻi he ngaahi taʻu ki mui ni maí ʻoku nau pehē kuo ʻikai te nau maʻu ʻa e ngaahi ʻaonga mei he ngaahi tohi naʻe pulusi ʻe he Sōsaietí ʻi he kuo hilí ka ʻoku ʻikai ke kei maʻu ia ʻi he Sōsaietí. Kuo feinga lahi ʻa e tokolahi ke maʻu ha ngaahi tatau ʻo e ngaahi tohi motuʻa angé, pea ko e niʻihi kuo nau fai pē ʻe kinautolu ke toe maʻu ha ngaahi tohi ʻa e Sōsaietí pea maʻu ia ʻi ha ngaahi founga kehekehe. Kuo kau ki ai ʻa hono toe pulusi ʻo e ngaahi tohí pea pehē ki he ngāueʻaki ʻo e komipiutá. ʻI he taimi ʻe niʻihi, kuo fai ʻa e meʻa ko ʻení ke maʻu ai ha tupu fakaepaʻanga.

Ko e “tamaioʻeiki” angatonú ʻokú ne ʻiloʻi ʻa ʻetau ngaahi fiemaʻu fakalaumālié pea ʻoku nau fai ʻa e ngaahi tokonaki ʻi he “taimi totonu.” (Mātiu 24:45) ʻI ha ʻi ai ha fiemaʻu ke toe pulusi ʻa e ngaahi tohi naʻe ʻosi pulusí, ʻoku fai ʻe he Sōsaietí ha ngaahi fokotuʻutuʻu ke fai pehē. Ko e fakatātā, ko e ngaahi voliume ʻo e Ko e Taua Leʻo mei he 1960 ki he 1985 kuo ʻosi toe pulusi ia pea alamaʻu ʻe he tokotaha kotoa pē. Kaekehe, ʻi he feinga ʻa ha niʻihi ke nau fai pē ʻe kinautolu ʻa hono toe pulusi mo tufaki ʻa e ngaahi tohí, ʻe lava ke hoko ai ʻa e ngaahi palopalema.

ʻOku hoko ʻa e faingataʻaʻia lahi ʻaupito ʻi hono toe pulusi mo tufaki ʻa e ngaahi tohi ko ʻení ke maʻu ai ha tupu fakaepaʻanga. Naʻe pehē ʻe he Puha Fehuʻi ʻi Sune 1977 ʻi he Ko ʻEtau Ngāue Fakafaifekau ʻo e Puleʻanga: “ʻOku lelei taha ke ʻoua ʻe fakaʻaongaʻi ʻa e ngaahi feohi fakateokalatí ke fakalanga pe tuʻuaki ai ʻa hono fakatau ʻo ha ngaahi koloa pe ko ha ngaahi ngāue fakakomēsiale ʻi he Kingdom Hall, ʻi he ngaahi ako ʻa e fakatahaʻangá pe ngaahi fakataha ʻa e kakai ʻa Sihová. ʻE tokoni ʻeni kiate kitautolu ke fai ʻa e tokanga kakato ki he ngaahi meʻa mahuʻinga fakalaumālié pea ke tuku pē ʻa e ngaahi meʻa fakakomēsialé ʻi hono feituʻu totonu.” Ko ia ai, ʻoku mahuʻinga ke tau fakaʻehiʻehi ʻi he maʻu ʻo e fakakaukau ki he tupu fakaepaʻanga ʻi hono ngāue fakakomēsiale ʻaki ʻa e Folofola ʻa e ʻOtuá pe ko e ngaahi meʻa ʻoku fekauʻaki mo iá.