Ngaahi Fiemaʻu ki he Kau Faifekau Foʻou mo Taukei

¹ Naʻe ʻeke ʻe he tokotaha-tohi-sāme ko Tēvitá: “E Jihova, kohai te ne nofo i ho fale fehikitaki? kohai te ne nofo mau i ho mouga maonioni?” Naʻe taliʻaki ʻe Tēvita ha ngaahi foʻi lea ne filifili lelei: “Ko ia ia oku eveeva i he agatonu, bea gaue i he maonioni, mo lea aki ae mooni i hono loto.” (Sāme 15:​1, 2, PM) Kuo teʻeki ai ke toe liliu ʻa e ngaahi fiemaʻu ko iá. Ko kinautolu kotoa he ʻahó ni ʻoku nau haʻu ke lotu ʻi he fakatahaʻanga Kalisitiané kuo pau ke nau liʻaki ʻa e ngaahi tōʻonga taʻetaau fakaeʻulungaangá mo e faʻa konā. ʻOku ʻikai taau ke ʻi he lotolotonga ʻo e kakai ʻa Sihová ʻa kinautolu ʻoku faʻa kē, mo loto-ʻita lahi, pe ngutungutuuá. Tatau ai pē pe ko e kau faifekau foʻou pe taukei, kuo pau pē ke tau angatonu ʻi hono tauhi ʻa e ngaahi tuʻunga māʻolunga ʻoku fokotuʻutuʻu ʻi he Folofola ʻa e ʻOtuá.​—Kal. 5:​19-21.

² ʻOku tokolahi ʻa e kau foʻou ʻoku nau feohi mo e kautaha ʻa Sihová. Ko e kau talavou pea pehē pē mo e kau taʻumotuʻa kuo liliu ʻa e anga ʻo ʻenau fakakaukaú koeʻuhi ke fehoanaki ʻenau founga moʻuí mo e ngaahi fiemaʻu ʻa e ʻOtuá. Naʻe tupu hake ha tamasiʻi ʻi ʻAmelika Tonga ʻo ʻikai ke ʻi ai ha tataki fakamātuʻa peá ne maʻu ʻa e ngaahi palopalema mamafa fekauʻaki mo ʻene tōʻongá. Pea ʻi heʻene aʻu ki hono taʻu 18, naʻe maʻu ia ʻe he faitoʻo kona tapú pea naʻe ʻosi tuku pōpulaʻi ia koeʻuhi ko ʻene kaihaʻa ke poupouʻi ʻa e ʻulungaanga ko iá. Koeʻuhi ko ha ako Tohitapu mo ia, naʻá ne motuhi ai ʻene feohi mo hono ngaahi kaungāmeʻa ki muʻá, kae maʻu hono ngaahi kaungāmeʻa foʻou ʻi he lotolotonga ʻo e Kau Fakamoʻoni ʻa Sihová, pea fakaiku ai ki heʻene fakatapui ʻene moʻuí ki he ʻOtuá.

³ Pehē foki, kuo pau ke tau loto-ʻalovili ke fakahōifua ki he ʻOtuá ʻa hotau ʻulungaanga kotoa pē, “i he agatonu moe maonioni mooni.” (ʻEf. 4:​24, PM) Kapau te tau nofo maʻu ʻi he kautaha ʻa e ʻOtuá ʻoku hangē ha moʻungá ko hotau moʻua ia ke “huʻihuʻi ʻa e motuʻa tangata, mo ʻene ngaahi falengā ngaue” mo “ʻai ʻa e tangata foʻou, ʻa ia ʻoku fai ai pe hono fakafoʻou ʻi he . . . ʻilo kanokano”.”​—Kol. 3:​9, 10.

⁴ Folofola ʻa e ʻOtuá, ko e Tākiekina Mālohi: ʻOku fakahā kiate kitautolu fakafou mai ʻi he Tohitapú ʻa e ngaahi ʻulungaanga ʻo Sihová pea ʻokú ne malava ke ueʻi mālohi ʻetau fakakaukaú mo ʻetau ngaahi ngāué ʻi ha founga pau. (Loma 12:2) ʻOku ʻi heʻene Folofolá ʻa e mālohi ke liliu ʻa e ngaahi fakakaukaú mo siviʻi ʻa e ngaahi lotó. (Hep. 4:12) ʻOku akoʻi kitautolu ʻe he Tohitapu fakamānavaʻí ko e finangalo ʻo Sihová ke maʻa mo angatonu fakaeʻulungaanga ʻetau moʻuí, ke kau kakato ʻi he ngāue fakamalangá, pea ʻoua ʻe liʻaki ʻa e ngaahi fakataha Kalisitiané.

⁵ ʻI he ngaahi taimi faingataʻá ni, ʻe malava ke ueʻi ha Kalisitiane ʻe he ngaahi mafasia ʻoku fakaʻau ke lahi ange ke maumauʻi ʻa e ngaahi lao ʻa e ʻOtuá. Kapau ʻe liʻekina ʻa e ako fakafoʻituituí, ako fakafāmilí, ngaahi fakataha ʻa e fakatahaʻangá, pe ngāue fakamalangá, naʻa mo ha Kalisitiane mālohi ki muʻa te ne tēkina mamaʻo nai mei he tuí, ʻo ne tō nai ki ha ʻulungaanga kovi. Ko e ʻuhinga ia naʻe tohi ai ʻa Paula kia Tīmote: “Lamalama kiate koe mo e meʻa ʻoku ke akoʻaki” pea, “Tokanga [maʻu pē, NW] ki he eku lea.”​—1 Tīm. 4:16; 2 Tīm. 2:​7, PM.

⁶ Tatau ai pē pe ko ha tokotaha toki kau mai pe ko ha taha kuo maʻu ʻa e taukei ʻi ha ngaahi taʻu lahi, ke fakahaofi ʻetau moʻui kuo pau ke tau tauhi ke maʻalaʻala lelei ʻa e anga ʻetau sio ki he ngaahi fiemaʻu ʻa e ʻOtuá, ʻai ke mātuʻaki mafamafatatau ʻi he ngāue fakamalangá, pea mo tauhi maʻu ke mālohi ʻetau ʻamanakí. (1 Pita 1:​13-16) ʻOku mātuʻaki mahuʻinga ʻaupito hono tauhi ʻi he ʻaho ki he ʻaho ʻa e ngaahi fiemaʻu māʻoniʻoni ʻa e ʻOtuá.

⁷ ʻAi ia ko hoʻo kolo ke kau ʻi he ngāue fakamalangá lolotonga ʻa e māhina fakaʻosi ʻo e taʻu fakangāue 1993. ʻAi ke ke loto-ʻalovili ke tokoni ki ha niʻihi kehe ke tupu ʻenau tui mo fakalahi ke ola lelei lahi ange ʻi he ngāue fakamalangá. (Loma 1:12) Tauhi hoʻo fakakaukaú ʻi he ngaahi meʻa ʻoku totonú ʻaki hono fai tuʻumaʻu ʻa e ako fakafoʻituituí, ako fakafāmilí, mo e maʻu ʻa e ngaahi fakatahá. (Fili. 4:8) ʻE ʻikai ke taʻe fakatokangaʻi ʻa hoʻo ngaahi feinga ke ʻai ke fiefia ʻa e ʻOtuá ʻaki hoʻo fakafehoanaki hoʻo moʻuí ki heʻene ngaahi fiemaʻú.​—Kol. 3:​23, 24.