Ko e Tokoni ki he Niʻihi Kehé ke Maʻu ʻa e Mahino Fekauʻaki mo Sīsū

¹ ʻI heʻetau hoko ko e kau fakamoʻoni ʻa Sihova mo Sīsū, ʻoku tau fiefia ke fakamatalaʻi ki he kakaí ʻa e meʻa ʻoku fakahā ʻe he Tohi Tapú ʻo kau ki he “Otua moʻonia pe taha” pea mo Sīsū Kalaisi. (Sione 17:3) Ko ha konga mahuʻinga ʻo ʻetau ngāue fakamalangá ko hono fakahā ʻa e ngafa mātuʻaki mahuʻinga ʻo Sīsū Kalaisí pea tokoni ki he kakaí ke maʻu ʻa e mahino ki hono tuʻunga moʻoni ʻi he felāveʻi mo Sihová.

² Koeʻuhi ʻoku tau ʻilo ʻoku puputuʻu ʻa e kakai tokolahi ʻo fekauʻaki mo Sīsū, pe ko hai ia pea mo ʻene kaunga ki he ngaahi taumuʻa ʻa e ʻOtuá, ʻoku lava ke tau tokoniʻi kinautolu ke nau maʻu ʻa e mahino ki he moʻoni fekauʻaki mo Sīsuú ʻi he lolotonga ʻo ʻetau ngāue fakamalanga ʻi he māhina ní. ʻOku lava fēfē ke tau tokoniʻi ʻa e kakai mahuʻingaʻiá ke fakatonutonu ʻenau ngaahi fakakaukau hala fekauʻaki mo e ʻOtuá mo Kalaisí?

³ Kapau naʻá ke tuku ʻa e tuleki “Ko e hā ʻOku Tui Ki Ai ʻa e Kau Fakamoʻoni ʻa Sihova?” ʻi hoʻo ʻuluaki ʻaʻahí, te ke toe foki nai pea ke lea pehē ni:

◼ “ʻOku loto-tatau ʻa e kau Kalisitiané ki he pehē ko Sīsū Kalaisi ʻa e toko taha kuó ne fakaʻatā ʻa e hala kiate kitautolu ke maʻu ʻa e fakahaofí. ʻOkú ke fakakaukau ʻoku mahuʻinga ke ʻilo ʻa e meʻa naʻe leaʻaki ʻe Sīsū ʻo kau ki hono tuʻungá? [Tuku ke ne tali.] Fakatokangaʻi ʻa e meʻa naʻe leaʻaki ʻe ia tonu ʻi he Sione 17:3. [Lau.] Ko ia ai, ʻoku mātuʻaki mahuʻinga kiate kitautolu ke tau ʻilo fekauʻaki mo e ʻOtuá mo Sīsū Kalaisi, koeʻuhi ʻoku fekauʻaki ia mo hotau kahaʻu taʻe ngatá.” ʻE lava ke ke toki lave ki he niʻihi ʻo e ngaahi fakamatala fekauʻaki mo Sīsū ʻi he palakalafi 4 ʻi he peesi 2 ʻo e tulekí. Pea lave ki he ʻuluaki palakalafi ʻi he kaveinga tokoni “Ko e Puleʻanga ʻo e ʻOtua” ʻi he peesi 3, ʻo fakahā ʻe fakahoko mai ʻe he Puleʻanga ʻo e ʻOtuá ʻa e melino. ʻE lava leva ke ke fakatoka ha makatuʻunga ki ha toe ʻaʻahi ʻaki hono fakamatalaʻi ʻa e ongo palakalafi ʻe ua hono hokó pea langaʻi ʻa e fehuʻi ʻi he kamataʻanga ʻo e palakalafi hono ua ʻi he peesi 4, ʻa ia ʻe lava ke ke tali ʻi hoʻo ʻaʻahi hono hokó.

⁴ Kapau naʻe mahuʻingaʻia ʻa e toko taha ʻapí ke ne ako lahi ange ʻo fekauʻaki mo e ʻOtuá mo Kalaisi pea naʻá ne tali ʻa e polosiua “Tolu-tahaʻiʻotua,” te ke lea pehē ni nai:

◼ “ʻOku tau mahuʻingaʻia ʻi he meʻa ʻoku fakahā ʻe he Tohi Tapú ʻo fekauʻaki mo e ʻOtuá mo Sīsū Kalaisí, ʻikai ko ia? ʻOku ou fie fakahā atu ha ngaahi meʻa ʻe niʻihi naʻá ku ako mei he polosiua naʻá ku tuku kiate koe ʻi he uike kuo ʻosí, ʻOku Totonu Ke Ke Tui ki he Tolu-tahaʻi-ʻotua?” Pea fakamatala ki he toko taha ʻapí ʻa e niʻihi ʻo e ngaahi meʻa ʻi he peesi 14-16. Fakatuʻunga ʻi he mahuʻingaʻia ʻa e toko taha ʻapí, ʻe lava ke ke fakakau atu mo e niʻihi ʻo e ngaahi meʻa mei he tohi Reasoning ʻi he peesi 405-426. ʻI hoʻo lea fakaʻosí, fakahā ʻoku ʻikai ke kei ʻi he māmaní ʻa Sīsū, pea langaʻi ʻa e fehuʻi ʻoku ʻasi ʻi he peesi 16, “ʻOku Māʻolunga Ange Maʻu Pē ʻa e ʻOtua ʻia Sīsū?” Fakamatala ki ai te ke saiʻia ke toe foki pea ke fakamatala lahi ange ki he fehuʻí ni ʻi ha taimi faingamālie ki he toko taha ʻapí.

⁵ ʻOku tau fiefia ke maʻu ʻa e moʻoni ʻo e Folofola ʻa e ʻOtuá mo ha mahino maʻalaʻala fekauʻaki mo e ʻOtuá mo Kalaisi. Ko ia ai, tau tōtōivi ʻi hono fakaafeʻi ʻa e niʻihi kehé ke nau maʻu ʻa e ʻaonga mei he mahino tatau ko ení.