Ko e Moʻoni ʻo Fekauʻaki mo Sīsū Kalaisi
1 ʻOku maʻu ʻe he kakai tokolahi ʻi he ʻahó ni ʻa e ngaahi fakakaukau kehekehe ʻo fekauʻaki mo Sīsū Kalaisi. ʻOku lava ke tau tokoniʻi kinautolu ke nau ʻilo ki he moʻoni ʻo kau kiate iá ʻi heʻetau tuʻuaki ʻa e polosiua ko e ʻOku Totonu Ke Ke Tui ki he Tolu-tahaʻi-ʻotua?
2 ʻOku faʻa ʻaonga ke ʻuluaki tuʻuaki ha tuleki ke ʻiloʻi pe ʻoku mahuʻingaʻia ʻa e kakai ʻoku tau talanoa ki aí. ʻE lava ke ngāue-ola-leleiʻaki ʻa e tuleki Ko e hā ʻOku Tui Ki Ai ʻa e Kau Fakamoʻoni ʻa Sihova? ke feʻunga mālie mo e polosiua Tolu-tahaʻiʻotuá.
3 Te te pehē nai:
◼ “ʻOku fifili ʻa e kakai tokolahi pe ko e hā ʻoku ʻaʻahi ai ʻa e Kau Fakamoʻoni ʻa Sihová ki he ngaahi ʻapi ʻo e kakaí ke talanoa ʻo kau ki he Tohi Tapú, pea ʻoku kehe nai ʻenau ngaahi tui mei he tui ʻa e ngaahi lotu kehé. Mahalo pē kuó ke fakakaukau pehē. Fakatokangaʻi ʻa e kaveinga ʻo e tulekí ni, Ko e hā ʻOku Tui Ki Ai ʻa e Kau Fakamoʻoni ʻa Sihova?” Fakahanga ʻa e tokangá ki he fakatātā ʻi he takafí, pea lau ʻa e palakalafi ʻuluaki mo e ua ʻi he peesi 2. Kapau ʻoku hā ha mahuʻingaʻia mei he toko taha ʻapí, te ke hoko atu nai ki he palakalafi hono tolú, ʻo lau pea fakamatalaʻi ʻa e ngaahi konga Tohi Tapu ʻi aí. Fai ha fokotuʻutuʻu ke toe ʻaʻahi ke fakamatala lahi ange ki he tulekí ʻaki haʻo langaʻi nai ha fehuʻi ʻo ʻeke pe ko ha konga ʻo ha tolu-tahaʻi-ʻotua ʻa Sīsū, koeʻuhi ke langaʻi ʻa e mahuʻingaʻiá.
4 Ko e toe meʻa ʻe taha ke leaʻaki nai ʻe meimei tatau mo ʻeni:
◼ “ʻOku loto-tatau ʻa e kakai tokolahi taha ʻi hotau feituʻú ni ki he pehē ko Sīsū Kalaisí ko e toko taha mahuʻinga lahi taha ia ʻi he hisitōlia ʻo e tangatá. ʻOku pehē ʻa hoʻo fakakaukaú? [Tuku ke ne tali.] Ka ko e hā ʻa e tuʻunga ʻokú ne ʻi ai he taimí ni? Ko e ʻOtua Māfimafí ia? Pe ko ha konga ia ʻo ha tolu-tahaʻi-ʻotua? ʻOkú ke fakakaukau ʻe lava ke tokoni ʻa e Tohi Tapú kiate kitautolu ke maʻu ʻa e tali ki he ngaahi fehuʻí ni? [Tuku ke ne tali.] Fakatokangaʻi ʻa e meʻa ʻoku hā ʻi he Sione 17:3. [Lau.] ʻOku tokonaki mai ʻe he Folofola ʻa e ʻOtuá ʻa e ʻilo ki he ʻOtuá mo Sīsū Kalaisi ʻa ia te ne taki atu kitautolu ki he moʻui taʻe ngatá.” Kapau ʻe fie fanongo ʻa e toko taha ʻapí, fakahā ʻa e meʻa ʻe taha pe ua naʻá ke ʻosi filifili ki muʻa mei he peesi 3 ʻo e polosiua ʻOku Totonu Ke Ke Tui ki he Tolu-tahaʻi-ʻotua? ke fakahaaʻi ʻa e mahuʻinga ʻo hono vakaiʻi ʻa e meʻa ʻoku fakahā mai ʻe he Tohi Tapú ʻo fekauʻaki mo Sīsū Kalaisí.
5 Te ke ʻilo nai ʻoku ʻaonga ke ngāueʻaki ha niʻihi ʻo e ngaahi fakamatala ʻo fekauʻaki mo Sīsū Kalaisi ʻoku hā ʻi he peesi 209-220 ʻo e tohi Reasoning ʻa ia ʻe tokoni nai ki hono tali ʻa e ngaahi fehuʻi ʻa e toko taha ʻapí pe ko hono ikuʻi ʻaki ʻenau ngaahi taʻe lotó.
6 Ko Hono Tuʻuaki Atu ʻa e Polosiua Tolu-tahaʻi-ʻotua: ʻE tuʻuaki atu nai ʻa e polosiua Tolu-tahaʻi-ʻotuá ʻo kapau ʻoku hā mai ha mahuʻingaʻia ʻi he ʻuluaki ʻaʻahí pe ko ha toe ʻaʻahi. ʻE lava ke ke fakahanga ʻa e tokangá ki he ngaahi fakatātā ʻi he peesi 2 pea mo e ngaahi fehuʻi ʻoku hā aí, pea pehē ki he fakamatala ʻi he peesi 3 ʻo fekauʻaki mo e fie maʻu ke vakaiʻi lahi ange ʻa e meʻá ni. ʻE lava ke ke fakaeʻa ha meʻa ʻe taha pe ua mei he peesi 405-426 ʻo e tohi Reasoning.
7 Tokanga ke ngāueʻaki ʻa e ngaahi faingamālié ke fakalototoʻaʻi ʻa e kakaí ke nau tali mo lau ʻa e polosiua Tolu-tahaʻiʻotuá. Tokoni ki he faʻahinga ʻoku mahuʻingaʻiá ke nau ako ki he moʻoni ʻo fekauʻaki mo Sīsū Kalaisí pea tui kiate ia mo ʻene Tamaí, koeʻuhi ke nau lava mo kinautolu ke maʻu ʻa e ʻamanaki ko e moʻui taʻe ngatá.—Sione 17:3.