Vaheʻi ha Taimi ki he Ngāue Makasiní
1 Kuo fakapapauʻi ʻe Sihova ʻe ʻi ai ha ‘melino, mo ha kahaʻu, mo e ʻamanaki’ kiate kinautolu ʻoku muimui ki heʻene ngaahi foungá. (Sel. 29:11) ʻOku fakahā ʻi he Ko e Taua Leʻo mo e Awake! ʻa e fakamatala faingatonu ʻo kau ki he meʻá ni. ʻE malava ke hoko ʻo ʻaonga ʻa e ongo makasini ko ʻení ki ha faʻahinga kakai pē ʻi he ngaahi tuʻunga kotoa ʻoku nau ʻi aí. (1 Tīm. 2:4) ʻOkú ke faʻa vaheʻi ʻe koe mo ho fāmilí ha taimi ke fai ai hono tuku atu ʻo e makasiní?
2 Kapau kuo fakaʻau ke siʻisiʻi ange ʻa e ngaahi makasini ʻokú ke tuku atú, ʻe lava fēfē nai ke fakaleleiʻi ʻa e tuʻunga ko iá? Ko e meʻa ʻe taha ʻoku ʻikai ala tuku ko hono tauhi maʻu pē ʻa hoʻo houngaʻia ki he meʻa ʻoku hā ʻi heʻetau ngaahi makasiní. Naʻe tohi ʻe ha tangata ʻe taha ʻo pehē: “ʻOku maʻu ʻa e fiefia moʻoni mei hono lau hoʻomou ngaahi makasiní. ʻOku ʻikai ko e ‘fakafiemālieʻanga’ lelei siʻisiʻi ia ka ʻoku ʻi ai ʻa e tataki mo e fakahinohino ki hono ʻai ʻo e moʻuí ke ʻi ai hano taumuʻa.” Ko e Taua Leʻó mo e Awake! ko e ola ia ʻo e fekumi fakamākukanga pea ko e tokonaki ia ʻa e “tamaioeiki agatonu mo boto.” (Mt. 24:45, PM) Ko e ongo meʻangāue ola lelei ia ke aʻu ai ki he loto ʻo e kakaí.
3 ʻAi ke maheni mo e ngaahi kupu ʻi he ngaahi makasini ʻokú ke tuʻuakí. Kumi ki ha ngaahi poini ʻoku lave ki he ngaahi palōpalema ʻoku lolotonga hoko ʻi ho feituʻú. ʻOku lelei ke mateuteu ke lea ki he kau tangata, kau fefine, mo e kau talavou te ke fetaulaki nai mo ia ʻi he ngaahi ʻapí pe ʻi he halá. ʻAi ke mateuteu ke fakahā ʻa e kaunga ʻa e ngaahi makasiní ki he toko taha tāutaha pea pehē ki he fakakātoa ʻo e fāmilí.
4 ʻAi Ke Mahuʻingaʻia ʻi Hono Tuku atu ʻa e Ngaahi Makasiní: ʻOku totonu ke hoko ʻa e ngāue makasiní ko e konga mahuʻinga ia ʻo e taimi ʻokú ke vaheʻi ki he ngāue fakamalangá. Ko e fē ʻa e taimi lelei taha kiate koe ke ke tuʻuaki ai ʻa e ngaahi makasiní? Kuó ke ʻahiʻahi ke ngāue fale-ki-he-fale ʻi ha houa ʻe taha nai ʻi he malu efiafí pe ko e ki muʻa ʻi he Ako Tohi Fakaefakatahaʻangá? Kuo ola lelei ʻa e ngāue fakamalanga ʻi he malu efiafí ʻi ha ngaahi feituʻu ʻe niʻihi. Ko e ʻaho lelei ʻa e ʻaho Tokonakí ki hono tuku atu ʻo e ngaahi makasiní ʻi ha ngaahi founga kehekehe, ka ʻe lava ke toe ngāueʻaki mo e ngaahi ʻaho kehé foki ki he ngāue ko ʻení. ʻOku totonu ke hoko ʻa e ngāue fale-ki-he-falé mo e fale koloa-ki-he-fale koloá ko e konga tuʻu maʻu ʻo e ʻAho Makasiní.
5 ʻOku totonu ki he toko taha taki taha ke ʻi ai haʻane ʻota pau ʻo e ngaahi tatau ʻo e ngaahi makasini ke tuku atú. ʻI he taimi ʻe niʻihi kuo lahi haʻo ngaahi makasini motuʻa, ʻe lava ke ngāueʻaki ia ke fakahā ki he toko taha ʻapí ʻa e kehekehe ʻo e ngaahi kaveinga ʻoku hā ʻi he ngaahi makasiní. ʻI he taimi ʻe niʻihi, ʻe lava ke tuku ha ngaahi tatau ʻi he ngaahi ʻapi ʻoku tauhi ai ʻa e kau vaivaí, ngaahi ʻapi tauhi mahaki, mo e ngaahi fale mahakí ʻo ka fakangofua. Ko e ngaahi makasini peheé ʻa ia ʻoku tuku atú ʻe lava ke lau ia ʻi he lipooti ʻo e māhina taki taha ʻi hoʻo lauʻi pepa ko e Lipooti Ngāue Fakamalanga.
6 ʻI hono ngāueʻaki ʻa e ngaahi fokotuʻu ko ia ʻoku hā ʻi ʻolungá, ʻoku ʻikai ha veiveiua te ke sio ʻoku lahi ange ʻa e ngaahi makasini te ke tuku atú. Ko e kakai loto-faitotonu ʻa ia ʻoku nau mafasia ʻi he moʻui ʻi he fokotuʻutuʻu fulikivanu lolotonga ní ʻoku nau houngaʻia ʻi he fakamatala fakatupu langa hake ʻo hangē ko ia ʻoku maʻu ʻi he Ko e Taua Leʻo mo e Awake! ʻOku tokonaki moʻoni ʻe he ongo makasiní ʻa e meʻakai fakalaumālie ʻoku fie maʻu kiate kinautolu ʻoku fekumi ke maʻu ʻa e fakahōifua meia Sihová. Ko ia ai, ʻai ke mahuʻingaʻia ʻi hono tuku atu ʻa e ngaahi makasiní, pea fekumi atu ki ha ngaahi founga ke fakalahi hono tuku atu ʻo e ngaahi makasini mahuʻinga ko ʻení ʻi ho feituʻú.