Poupouʻi Fakaʻaufuli ʻa e Polokalama Fakataha Fakahāhā ʻi Hoʻo Fakatahaʻangá
1 ʻI he ngaahi taʻu kuo maliu atú naʻe ʻilo ʻe ha talavou ʻa e lauʻi pepa naʻe tuʻuaki ai ʻa e ngaahi fakataha ʻa e fakatahaʻanga fakalotofonuá. Pea koeʻuhi naʻá ne fekumi ki he moʻoní, naʻá ne fakakaukau ke ʻalu ki he Fakataha Fakahāhā ʻi he Sāpate pē ko iá, ʻo ne aʻu ki he holó ki muʻa ʻoku teʻeki ai hoko ʻa e taimí. Naʻe talitali māfana ia ʻe ha toko taha malanga pea ʻi he lolotonga ʻa e fetalanoaʻakí naʻá ne tuʻuaki kiate ia ha ako Tohi Tapu, ʻa ia naʻe ʻikai tali ʻe he talavoú. Kae kehe, naʻe mātuʻaki maongo kiate ia ʻa e malanga fakahāhā naʻe ʻosi teuteuʻi lelei ʻa ia naʻá ne liliu ʻa ʻene fakakaukaú, pea ʻi he ʻosi ʻa e fakatahá naʻá ne tali ke fai ʻa e akó. Naʻe fakalakalaka lahi ʻa e talavou ko ʻení pea naʻá ne papitaiso ʻi he ʻosi atu ha ngaahi māhina. ʻOku malava ke tau ako ʻo ʻikai ke siʻi hifo ʻi he ngaahi meʻa ʻaonga ʻe tolu mei he meʻa ko ʻeni naʻe hokosiá.
2 Ko e ʻuluakí, naʻe fanongonongo ʻa e Fakataha Fakahāhaá. ʻI hono fanongonongo ʻe he toko taha seá ʻa e kaveinga ʻo e malanga fakahāhā ʻe fai ʻi he uike hono hoko maí, fakakaukau kiate kinautolu ʻi ho feituʻú ʻa ia ʻe tautefito ʻenau fie fanongó nai ʻi he kaveinga ko iá, tatau ai pē pe ʻoku nau kei lau ʻa ʻetau ngaahi tohí pe ʻikai. Ko e kakai ʻe niʻihi ʻoku ʻikai te nau saiʻia he lau tohí pe ʻoku nau faingataʻaʻia lahi he lau tohí, ka te nau loto-lelei nai ke fanongo ki ha malanga ʻi ha kaveinga fakatohitapu.
3 Ko hono uá, naʻe fai ha talitali māfana ʻo e toko taha foʻoú. Kapau te ke palani ke aʻu ki he holó kei taimi ki muʻa, ʻe lava ke ke talitali ʻa ho ngaahi tokouá mo e tuofāfiné pea pehē pē ki ha faʻahinga fie fanongo. (Hep. 10:24) Kapau ko ha toko taha foʻou ko ʻene ʻuluaki kau pē ia ki he fakatahá, ʻoku ʻikai nai te ne ʻilo pe ko e hā ʻa e meʻa ʻoku faí. Fakamatala ki ai ko ʻetau ngaahi fakatahá ʻoku kamata ʻaki ʻa e hiva mo e lotu pea tala kiate ia ʻa e anga ʻo hono fai ʻo e fakatahá. Kapau ʻe feʻunga, fakaafeʻi ia ke mo nofo fakataha koeʻuhi ke lava ke mo ngāueʻaki ʻa hoʻo Tohi Tapú mo e tohi hivá. ʻI he ʻosi ʻa e fakatahá fakaafeʻi ke mo fetalanoaʻaki ki haʻane ngaahi fehuʻi ʻokú ne fifili nai ki ai.
4 Ko hono tolú, ko e malanga naʻe ʻosi teuteuʻi lelei. Ko kinautolu ʻoku nau maʻu ʻa e monū ke nau fakafofongaʻi ʻa e fakatahaʻangá ʻi he tuʻunga ko e kau malanga fakahāhaá ʻoku nau fakamoleki ʻa e ngaahi houa lahi ʻi hono teuteu mo ʻahiʻahiʻi ʻa e malangá koeʻuhi ke ueʻi ʻa e kau fanongó ke fakahā ʻo toe lahi ange ʻa e ʻofa mo e ngaahi ngāue lelei. ʻI he ʻahó ni ʻoku tau faingataʻaʻia hono kotoa pē ʻi he ngaahi mafasia, pea ko e ngaahi moʻoni fakatupu ongoʻi mālohi mei he Folofola ʻa e ʻOtuá ko e meʻa pē ia ʻoku fie maʻu kiate kitautolu ke tokoni kiate kitautolu ke tau kātakí. Ko e moʻoni, tatau ai pē pe ʻoku ʻaonga fēfē ʻa e malanga fakahāhaá ia, ʻe siʻisiʻi pē ʻa e lahi ʻo hono ʻaongá kiate kitautolu tāutaha ʻo kapau ʻe ʻikai te tau fanongo tokanga ki he meʻa ʻoku leaʻakí. ʻOkú ke faingataʻaʻia ʻi he taimi ʻe niʻihi ke tokanga taha ki he malanga ʻoku lolotonga faí? ʻE tokoni nai ke hiki ha ngaahi nouti fakanounou, ʻo hangē pē ko ia ʻoku tau faʻa fai lolotonga ʻa ʻetau ngaahi fakataha lalahí. ʻAi ke ke muimui ʻi hoʻo Tohi Tapú ʻi he taimi ʻoku lau mo fakamatalaʻi ai ʻa e veesi taki taha mei he Tohi Tapú.
5 Kuo tokonaki ʻe he Sosaieté ʻa e ngaahi malanga fakahāhā ʻi he ngaahi kaveinga fakatohitapu kehekehe. ʻI he ngāue ʻo fakafou ʻi he ʻovasia pulé pe ko ha toko taha kuó ne vaheʻi, ʻoku fokotuʻutuʻu ʻe he kulupu ʻo e kau mātuʻá ke ngāue lelei ʻa e polokalama Fakataha Fakahāhā ʻa e fakatahaʻangá. ʻOku fili ʻa e ngaahi kaveinga malanga kuo faʻu ʻe he Sosaieté ke fakahanga ʻa e tokangá ki he ngaahi fie maʻu lolotonga fakalotofonuá. ʻOua naʻá ke liʻaki ha taha ʻo e ngaahi fakamatala mātuʻaki mahuʻinga ko ʻení, pea poupouʻi fakaʻaufuli ʻa e Fakataha Fakahāhā fakauike ʻa hoʻo fakatahaʻangá.