Puha Fehuʻi

◼ Ko e hā ʻa e founga ʻoku totonu ke muimui ai ʻi hono ʻoatu ha fakapapau ki he fakatahaʻangá?

ʻOku fie maʻu ke fai ha fakapapau ʻi he taimi kuo pau ai ke fai ha fili fekauʻaki mo ha ngaahi meʻa mahuʻinga ʻo hangē ko hano fakatau ʻo ha konga ʻapi, ko hono fakaleleiʻi pe langa ha Kingdom Hall, ko hono ʻoatu ha ngaahi tokoni fakapaʻanga makehe ki he Sosaieté, pe ko hono tokangaʻi ʻa e ngaahi fakamole ʻa e ʻovasia fakafeituʻú. ʻOku faʻa lelei maʻu pē ke fokotuʻu atu ha fakapapau ke fai ha loto ki ai ʻi he taimi taki taha ʻoku ngāueʻaki ai ʻa e paʻanga ʻa e fakatahaʻangá.

ʻE lava nai ke fai ha meʻa ia ʻoku kehe mei hono anga totonú ʻi he fekauʻaki mo e ngaahi fie maʻu makehe ʻoku kaunga fakahangatonu ki he ngaahi palani pe ngaahi ngāue mahuʻinga. Ko e fakatātā, ʻe fili nai ʻe he fakatahaʻangá ke nau lī atu ha paʻanga kuo ʻosi fakapapauʻi hono lahí ki he Sosaieté ke tokoni ki he ngāue fakamalanga ʻi māmani lahí. ʻIkai ngata aí, ko e ngaahi fakamole anga-maheni ki he Kingdom Hall, ʻo hangē ko e ngaahi nāunau pea mo e ngaahi meʻa ki hono fakamaʻá, ʻoku ʻikai fie maʻu ai ha fakapapau ia.

ʻI he hā mahino mai ha fie maʻu, ʻoku totonu ki he kulupu ʻo e kau mātuʻá ke nau fetalanoaʻaki fakaikiiki ki he meʻa ko iá. Kapau ʻe loto-tatau ʻa e tokolahi taha ʻo pehē kuo pau ke fai ha meʻa ki he fie maʻu ko iá, ko e taha ʻo e kau mātuʻá, ʻa ia ko ha memipa nai ʻo e Kōmiti Ngāue ʻa e Fakatahaʻangá, ʻoku totonu ke ne teuteu ha fakapapau kuo ʻosi tohi ke fokotuʻu atu ʻi he Fakataha Ngāué.

Ko e taha ʻo e kau mātuʻá ʻa ia ʻe hoko ko e toko taha seá ʻoku totonu ke ne fakamatala nounou kae mahino ʻa e meʻa ʻo kau ki he fie maʻu ʻoku lolotonga hokó pea mo e meʻa ʻoku fokotuʻutuʻu ʻe he kulupu ʻo e kau mātuʻá ke fai ki aí. ʻOku ʻoatu leva ki he fakatahaʻangá ʻa e faingamālie ke ʻeke ki ai ʻa e ngaahi fehuʻi ʻo fekauʻaki mo e meʻá ni. Kapau ʻoku fihi ʻa e meʻa ʻoku lave ki aí, ʻe lelei nai ke toloi ʻa hono fai ha fili ki ai kae ʻoua kuo aʻu ki he Fakataha Ngāue hono hoko maí ke maʻu ai ʻe he toko taha kotoa ha taimi ke nau fakakaukau fekauʻaki pea mo e meʻá ni. ʻE fai leva ʻa e filí ʻaki ʻa e hiki nima ʻa e kau memipa ʻi he fakatahaʻangá.

Ko e kau memipa ʻosi fakatapui mo papitaisó pē ʻi he fakatahaʻangá ʻoku nau kau ki he fili ke faí tuku kehe ʻo ka kehe ʻa e ngaahi fie maʻu fakalaó, ʻo hangē ko ia ʻoku fekauʻaki nai pea mo e ngaahi meʻa fakaekautahá pe fekauʻaki mo e ngaahi nō ʻa e Kingdom Hall. ʻE ʻikai feʻunga ke kau ki he fili ʻoku faí ha Kau Fakamoʻoni mei ha ngaahi fakatahaʻanga kehe.

ʻI he hili ʻa hono tali ʻo e fakapapaú, ʻoku totonu leva ke fokotuʻu ki ai ʻa e ʻahó, fai ki ai ʻa e fakamoʻoni hingoá, pea tauhi ia ʻi he tauhiʻanga tohi ʻa e fakatahaʻangá.