ʻE Lava ke Ke Fakatupulekina Hoʻo Fakamālōʻia ʻa Sihová he Lolotonga ʻo ʻEpelelí?

¹ Naʻe tupu mei he loto ʻo e tangata tohi sāme ko Tēvitá ʻa e holi ke ne fakamālō kia Sihova ʻi ha founga ʻe hōifua ki ai, pea ko ia ai, naʻá ne fakahā: “Ko hoku ngutu ni te ne fakafetaʻi lahi kia Sihova; pea te u fakamālō kiate ia ʻi ha fuʻu fakataha.” (Sāme 109:30) Ko ʻEpelelí ko ha taimi lelei ia ke ‘tānaki atu ki hono fakamālōʻiaʻí’ ʻaki hono fakalahi atu ʻetau kau ki he ngāue fakamalangá. (Sāme 71:14) ʻOkú ke fakaangaanga nai ke kau ʻi he tokolahi te nau fai ʻení ʻaki hoʻo kau ki he ngāue tāimuʻa fakataimí?

² Fakaangaanga ki ai he Taimí Ni: ʻOku fakamanatu mai kiate kitautolu ʻi he tohi Palōvepi 21:5: “Ko e ngaahi tuʻutuʻuni [“fakaangaanga,” NW] ʻa e faʻa ngaue ʻoku iku pe ki he maʻu ha meʻa.” Ke fai ʻení ʻoku fie maʻu ke ke tuku atu ia kia Sihova ʻi he lotu, pea ke fakamuʻomuʻa ia ʻi hoʻo ngaahi fakaangaangá. (Pal. 3:​5, 6) Ko hono hokó ke ke sivisiviʻi fakalelei hoʻo taimi-tēpile lolotongá ke vakai pe ko e hā ʻa e ngaahi liliu ʻe lava ke fai ke ke fakamoleki ha houa ʻe ua ʻi he ʻaho ʻi he ngāue fakamalangá. Ko hoʻo ‘toʻo’ ʻa e taimi mei he ngaahi ngāue kehé te ne fakaʻatā ai koe ke fakamoleki ha taimi lahi ange ʻi he ngāue fakamalangá.​—ʻEf. 5:16.

³ Fetalanoaʻaki mo Fetokoniʻaki: Naʻe lave ʻa e ʻaposetolo ko Paulá ki ha faʻahinga ʻe niʻihi naʻa nau hoko ko e “tokoni fakaongoʻimālohi” kiate ia ʻi hono fai ʻa e ngāue fakamalangá. (Kol. 4:​11, NW) Fetalanoaʻaki ʻo kau ki hoʻo ngaahi fakaangaangá mo e faʻahinga kehe ʻoku nau fie kau ki he ngāue tāimuʻa fakataimí ʻi ʻEpelelí. Ko ʻenau poupoú mo ʻenau fie kaungāngāué te mou fakatou maʻu ai ʻa e ʻaonga fakalaumālie. Ko e ʻovasia ngāué te ne tokoniʻi koe ʻo kapau ʻoku ʻi ai haʻo fehuʻi fekauʻaki mo e ngaahi fokotuʻutuʻu ki he ngāue fakamalangá pe ko e kauhala ke ngāue aí.

⁴ Ko e fetokoniʻaki mo e poupou mei he ngaahi memipa ʻo e fāmilí te ne tokoniʻi ʻa e ngaahi memipa ʻe niʻihi ke nau tāimuʻa fakataimi. Ko e ngaahi ngāue fakaʻapí ʻe fie maʻu nai ke feʻunuʻaki fakataimi pē. Ko e taimi-tēpile ki hono fakahoko ʻa e ngaahi ngāue ko iá ʻe fie maʻu nai ke fai hano liliu foki. Ko e fakatahataha fakafāmili ke fetalanoaʻaki ki he ngaahi fie maʻú ni ʻe tokoni ia ki hono fakahoko ʻa hoʻo taumuʻá. Ko e fetalanoaʻaki mo e fetokoniʻaki leleí ko e tefitoʻi meʻa mahuʻinga ia ki he lavameʻá.

⁵ Tauhi Maʻu ha Fakakaukau Pau: ʻAi ke ʻoua ʻe loto-ʻoho leva ke tuku ange ʻa e faingamālie ki he ngāue tāimuʻa fakataimí koeʻuhi ko e ngaahi tuʻunga taʻe fakafiemālié. Ko e faʻahinga kei talavou ʻi he akoʻangá, kakai taʻu motuʻa kuo mālōlō mei he ngāué, ngaahi uaifi maʻu fānaú, ngaahi ʻulu ʻo e fāmilí ʻoku nau ngāue taimi-kakató, kuo nau tuku ange ʻa e ngaahi meʻa ʻoku mahuʻinga kiate kinautolú ʻo nau fai loto-fiefia ia kae malava ke ngāue tāimuʻa fakataimi ʻi ʻEpeleli. ʻOku nau loto-tatau mo e tangata tohi sāmé “oku tāu moe agatonu ae fakafetai,” pea ʻoku ʻikai te nau fakakaukau ko ha fuʻu mole lahi ia ke nau fai ha feinga makehe ke fakamoleki ha houa ʻe 60 ʻi he ngāue fakamalangá. (Sāme 33:1, PM) Kapau ʻoku ʻikai malava ke ke tāimuʻa fakataimi, fēfē ke ke kau ai ʻi he fiefia ʻi hono fakalahi atu hoʻo ngāue fakamalangá ko ha toko taha malanga ʻi he fakatahaʻangá?

⁶ Ko e ngāue tāimuʻa fakataimi ʻi ʻEpelelí kuó ne hoko ko e founga ke hokohoko atu ai ki he ngāue tāimuʻa tuʻumaʻú ki he tokolahi. ʻI hono fakalahi ʻenau ngāue fakamalangá, kuo nau ʻilo ai ko e fetongi ke ngāue tāimuʻa tuʻumaʻú kuo hoko ʻo toe faingofua ange ai.

⁷ ʻIo, ʻai ke tau toe fakalahi ange ʻetau ngāue fakateokalatí ʻi ʻEpeleli. Feinga ke toe fai ha fakamoʻoni lahi ange ʻi he pongipongí mo e efiafí. ʻOku totonu ke tau fai hotau lelei tahá ke fakamālōʻia hotau ʻOtua, ko Sihová. Ko e ngāue tāimuʻa fakataimi ʻi ʻEpelelí ko ha founga lelei ia ke fakahāhā ai ʻetau houngaʻia ki heʻene ngaahi ngāue anga-ʻofa lahi mai kiate kitautolú.