Fiemaʻu—Kau Tāimuʻa Tokoni ʻe Toko 100
ʻE Lava ke Ke Tāimuʻa Tokoni ʻi Maʻasi? ʻEpeleli? Mē?
1 “ʻOku Fiemaʻu ʻa e Kau Malanga ʻe Toko 1,000” ko e kaveinga ia ʻo ha kupu naʻe pulusi ʻi he tatau ʻo e Watch Tower ʻo ʻEpeleli 1881. Naʻe ʻi ai ha kole ki he kau tangata mo e kau fefine ʻosi fakatapui kotoa pē, “naʻe tuku ki ai ʻe he ʻEikí ʻa e ʻilo fekauʻaki mo ʻEne moʻoní,” ke ngāueʻaki ʻa e taimi ʻoku nau maʻú ke kau ai ʻi hono fakamafola atu ʻa e moʻoni ʻo e Tohitapú. Ko e faʻahinga naʻe lava ke nau ʻoatu ha vaeua pe lahi ange ʻo honau taimí ki he ngāue ʻa e ʻEikí ʻataʻatā peé naʻe fakalototoʻaʻi ke nau pole ko e kau ngāue ʻevangeliō tuʻuaki tohi—ko e kau fakamelomelo ʻo e kau tāimuʻa ʻo e ʻaho ní.
2 Neongo ʻa e liliu ʻa e taimí talu mei he 1800 tupú, ʻoku kei tuʻumaʻu ai pē ʻa e moʻoniʻi meʻa tatau—ko e kau sevāniti fakatapui ʻa e ʻOtuá ʻoku fiemaʻu ke nau hokohoko atu hono ngāueʻaki ʻa e lahi taha ʻo e taimi ʻoku malavá ʻi hono fakamafola atu ʻa e ongoongo leleí. ʻI he ngāue ko ha tāimuʻa tokoní ʻoku fakaivia ai ʻa e kau malanga ʻi he fakatahaʻangá ke lelei ange ai ʻenau ngaahi malavá ʻi heʻenau fakamoleki ha toe taimi lahi ange ʻi he ngāue fakafaifekau ʻo e Puleʻangá.—Kol. 4:17; 2 Tim. 4:5.
3 Talu pē mei he kamataʻanga ʻo e ngāue tāimuʻa tokoní, mo e fiefia ai ʻa e laui kilu ʻo e ngaahi tokouá mo e ngaahi tuofāfiné ʻi māmani lahi. Ko ha fakalotomāfana ē ʻa hono fakahaaʻi ko ʻeni ʻo e tupu lahi ʻo e ngāue tāimuʻá ʻa ia ko ha tumutumu ia ʻo e kau tāimuʻa tokoni naʻe laka hake ʻi he toko 100 naʻe aʻu ki ai ʻi he vāhenga-ngāue ʻa e vaʻa ʻi Haʻamoa Hihifó ʻi ʻEpeleli 1989! Neongo naʻe ʻikai te tau toe aʻu ki he fika ko iá talu mei ai, ʻoku malava moʻoni ke hokohoko atu ke toe fai ʻa e ngāue lelei ko ʻení he lolotonga ʻo e 1997.
4 ʻOku mau fakalototoʻaʻi koe ke ʻai ko ha kolo ia ke ngāue tāimuʻa tokoni tuʻo taha pe lahi ange he lolotonga ʻo e māhina ko Maʻasi, ʻEpeleli, mo Meé. Ko e hā ʻoku kau ai ki ai ʻa Maʻasí? Koeʻuhi ʻi he taʻu ní ko e Fakamanatu ʻo e pekia ʻa Kalaisí ʻe fai ia ʻi he Sāpate, Maʻasi 23. ʻOku ʻikai ha toe founga ʻe lelei ange ke tau fakaʻaongaʻi ai ʻa e ngaahi uike ki muʻa ʻi he Fakamanatú ka ko ʻete kau faivelenga ʻi he ngāue malangaʻi ʻo e Puleʻangá ʻa ia naʻe kamata ʻe hotau ʻEiki mo e Fakamoʻui, ko Sīsū Kalaisí. ʻI ha faifakamoʻoni lahi ʻe fakahoko ʻi Maʻasí, ʻe lava ke tau fakaafeʻi ai ha faʻahinga mahuʻingaʻia tokolahi ke kau mo kitautolu ʻi hono fakamanatu ʻo e pekia ʻa Kalaisí. Tānaki atu ki ai, ko e māhina ko Maʻasí ʻoku ʻi ai ʻa e Tokonaki ʻe nima pea mo e Sāpate ʻe nima, ʻa ia ʻe ʻatā ai ki ha ngāue lahi ʻaupito ʻi he fakaʻosinga ʻo e uiké ʻi he ngāue fakamalangá. Ko ia ai, ʻi he lolotonga ʻo e māhina ko ʻEpeleli mo Meé, ko ha hokohoko atu ha feinga faivelenga ʻi he ngāue fakafaifekaú ʻe fakaʻatā ai kitautolu ke ʻaʻahi ki he kau mahuʻingaʻia naʻe maʻú pea kamata ha ngaahi ako Tohitapu foʻou ʻi ʻapi, ʻo ngāueʻaki ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú? Te tau ngāueʻi fakaʻauliliki ai hotau feituʻú, kae tautefito ʻi he ngaahi fakaʻosinga ʻo e uiké, fakataha mo e ngaahi tatau lolotonga ʻo e Taua Leʻo mo e Awake!
5 Ko Hai ʻOku Taau ke Tāimuʻa Tokoní?: ʻOku fakamatalaʻi ʻe he Organized to Accomplish Our Ministry, peesi 114: “Ko e hā pē ho ngaahi tuʻunga fakafoʻituituí, kapau kuó ke ʻosi papitaiso, pea ʻokú ke ʻi ha tuʻunga fakaeʻulungaanga lelei, ʻe lava ke fokotuʻutuʻu ke aʻusia ʻa e fiemaʻu ʻo e houa ʻe 60 ʻi he māhiná ʻi he ngāue fakamalangá pea ke tui ʻe lava ke ke ngāue ʻi ha māhina ʻe taha pe lahi ange ko ha tāimuʻa tokoni, ko e kau mātuʻa ʻi he fakatahaʻangá te nau loto-lelei ke vakaiʻi hoʻo kole ki he monū ko ʻeni ʻo e ngāué.” ʻE lava ke ke fai ha fokotuʻutuʻu koeʻuhi ke ke kau ai ʻi he monū ko ʻení ʻi Maʻasi? ʻEpeleli? Mē?
6 Ko ha fakakaukau pau ʻi he tafaʻaki ʻa e ngaahi kulupu ʻo e kau mātuʻá, fakataha mo e poupou ʻaufuatō ʻa e toenga ʻo e kau malangá, ʻoku totonu ke ne ʻai ʻa e tali ki he fiemaʻu ko ʻeni ha kau tāimuʻa tokoni ʻe toko 100 ko ha lavameʻa lahi ia. (Hep. 13:7) ʻOku fakalototoʻaʻi ʻa e ngaahi ʻuluʻi fāmili kotoa pē ke nau fakapapauʻi pe ko e toko fiha ʻi honau fāmilí ʻe lava ke kau ki he lākanga ʻo e kau tāimuʻa tokoní he lolotonga ʻo e māhina ʻe taha pe lahi ange ka hoko maí.—Sāme 148:12, 13; fakafehoanaki mo Ngāue 21:8, 9.
7 ʻOua ʻe vave ke fakaʻosiʻaki ʻo pehē ʻe ʻikai lava ke ngāue tāimuʻa koeʻuhi ko hoʻo ngāue fakamāmani taimi-kakató, taimi-tēpile he akoʻangá, ngaahi fatongia fakafāmilí, pe ngaahi fatongia kehe Fakatohitapú. ʻOku ʻikai nai ke faingofua ke kau ki ai ha faʻahinga; ka neongo ia, ʻi he fokotuʻutuʻu maau mo e tāpuaki ʻa Sihová, te nau malava ai ke lavameʻa. (Sāme 37:5; Pal. 16:3) ʻAi ke puleʻi ʻe he holi ke kau ki he ngāue tāimuʻá ho ngaahi tuʻungá; ʻoua ʻe ʻai ho ngaahi tuʻungá ke ne puleʻi hoʻo holi ke tāimuʻá. (Pal. 13:19a) Ko ia ai, ʻi he mālohi ʻo e ʻofa kia Sihova pea mo e kaungā-faʻahinga ʻo e tangatá, ʻoku malava ai ʻe he tokolahi ke feʻunuʻaki ʻenau taimi-tēpile fakauike ʻi he moʻuí koeʻuhi kae fakalahi atu ʻenau ngāue fakafaifekaú ʻi he māhina taki taha. (Luke 10:27, 28) ʻOku lahi ʻa e ngaahi tāpuaki ʻoku tuku tauhi maʻa kinautolu ʻoku nau ngāue longomoʻui ʻi he ngāue ʻo e Puleʻangá.—1 Tim. 4:10.
8 Ko e Ngaahi Meʻa ʻOku Fakahoko ʻe he Ngāue Tāimuʻá: Ko e feinga ʻaufuatō ʻa e kau sevāniti tokolahi ʻaupito ʻa e ʻOtuá ʻoku fai ʻi he tāimuʻa tokoní ʻoku ʻi ai ʻa e ola ko ha fuʻu kalanga ʻo e fakahīkihiki kia Sihova. Koeʻuhi ko e fakafaingamālieʻi ʻe he kau fanongonongo ʻo e Puleʻangá kinautolu ke fakamafola ʻa e ongoongo leleí ki he kakai tokolahi ange, ʻoku nau ʻunuʻunu ofi ange ai fakafoʻituitui kia Sihova koeʻuhi ʻoku nau ako ke falala lahi ange kiate ia ki hono laumālié pea mo ʻene tāpuakí.
9 Ko hono maʻu ha kau tāimuʻa tokoni, tuʻumaʻu, mo makehe ʻoku longomoʻui ʻi hotau lotolotongá ʻokú ne fakatupu ai ha laumālie foʻou ʻo e ivimoʻui ʻi he fakatahaʻangá. Ko ʻenau loto-māfaná ʻoku pipihi ia ʻi he taimi ʻoku nau talanoa ai ʻo fekauʻaki mo ʻenau ngaahi meʻa naʻe hokosia ʻi he ngāue fakamalangá. ʻOku ueʻi ai heni ʻa e niʻihi kehé ke nau fakakaukau ki he mahuʻinga ʻo ʻenau ngaahi meʻa mahuʻingá mo haʻanau malava ke fakalahi atu ʻa e kau ʻi he ngāue mātuʻaki mahuʻinga ʻo e ngāue fakafaifekaú. Ko ha tuofefine naʻá ne papitaiso ʻi hono taʻu 70 naʻá ne kamata leva ʻi he tāimuʻa tokoní ʻi ha tuʻunga hokohoko. ʻI he taimi naʻe ʻeke ai ki mui mai ʻi ha ngaahi taʻu pe ko e hā, fakatatau ki hono taʻumotuʻá, ʻokú ne kei fakafaingamālieʻi ai ia ʻo lahi ange ʻi he ngāue fakafaifekaú ko ha tāimuʻa tokoni ʻi he māhina kotoa pē, naʻá ne pehē naʻá ne ongoʻi ko e kotoa ʻo e ʻuluaki taʻu ʻe 70 ʻo ʻene moʻuí naʻe mole noaʻia, pea naʻe ʻikai te ne fiemaʻu ke fakamole noaʻia ʻa e ngaahi taʻu ʻo ʻene moʻuí ʻoku toé!
10 Ko kinautolu taki taha ʻoku kau ki he ngāue tāimuʻa tokoní ʻoku nau fakatupulekina ha lavameʻa pōtoʻi ʻi he ngāue fakafaifekaú. Naʻe fakamoʻoniʻi ʻe ha fakamoʻoni kei talavou ʻe taha: ‘Lolotonga ʻa e kei siʻí naʻá ku ngāue mo ʻeku ongo mātuʻá ʻi heʻena ngaahi ngāue fakamalangá. Ko e ngāue fakamalangá ia naʻe fakaoli ʻaupito. Kae kehe, ʻi ha taimi, naʻá ku ʻiloʻi ai ʻi he akoʻangá naʻá ku tuʻu makehe au mei he tokolahi ko ē. Naʻá ku hoko leva ʻo ongoʻi mā ke lea ki he ngaahi kaungāakó ʻo fekauʻaki mo e moʻoní. ʻI he malanga mei he fale ki he falé, naʻe kamata ke hohaʻa ʻeku fakakaukaú ki ha fetaulaki mo ha taha ʻoku ou maheni mo ia ʻi he akoʻangá. ʻI hoku tuʻungá, ʻoku ou fakakaukau ko e palopalemá ko e manavahē ki he tangatá. [Pal. 29:25] ʻI he hili ʻa e nofo mei he akoʻangá, naʻá ku fakakaukau ke ʻahiʻahiʻi ʻa e ngāue tāimuʻá ʻi ha taimi nounou. Ko hono olá, naʻe hoko ʻa e malangá ʻo fakamānako ange ia ʻi he ki muʻá. Naʻe ʻikai te u toe fakakaukau ki ai ko ha ngāue fakaoli, pe ko ha kavenga mamafa. ʻI heʻeku vakai ki he laka ki muʻa ʻeku kau ako Tohitapú ʻi he moʻoní, naʻá ku fiefia ʻi ha tuʻunga mātuʻaki fakafiemālie moʻoni ʻo e fakamoʻoni ko Sihova ko e ʻOtuá naʻá ne tokoniʻi ʻeku ngaahi feingá.’ Naʻe hokohoko atu ʻa e talavou ko ʻení ʻi he ngāue ko ha tāimuʻa tuʻumaʻu.
11 ʻI ha vakai lelei ki he meʻa ʻoku hokó, ʻi he taimi ʻoku ngāue ai ʻa e tokolahi ko ha kau tāimuʻa tokoni ʻi he fakatahaʻangá, ʻoku lava ai ke ngāueʻi lelei ʻa e feituʻú. Ko e tokoua ʻokú ne tokangaʻi ʻa hono vahevahe ʻo e ngaahi feituʻú ʻe lava ke ne kole ki he kau tāimuʻa tokoní ke nau tokoni ki hono ngāueʻi ʻa e ngaahi feituʻu ʻoku tātātaha hono ngāueʻí. Ko hano ʻave ha kai hoʻatā pea fakamoleki ha ʻaho kakato ʻi he ngāué ʻe faingofua ange ai ke ngāue ʻo aʻu ki he tafaʻaki mamaʻo atu ʻo e feituʻú.
12 Ko e Kau Mātuʻá ke Nau Fai ha Ngaahi Fokotuʻutuʻu Ki Muʻa: Ko e kotoa ʻo e ngaahi māhina ʻe tolu ka hoko maí, ʻoku totonu ke fai ha fokotuʻutuʻu ke ʻai ha taimi-tēpile ʻo e ngaahi faʻahinga ngāue fakaefakamoʻoni kehekehe ʻi ha ngaahi taimi kehekehe ʻi he uiké, kau ai ʻa e hoʻatā efiafí mo e efiafí, koeʻuhi ke malava ʻa e tokolahi tahá ʻo kau mai ki ai. Tānaki atu ki he ngāue tuʻumaʻu fale-ki-he-falé, fakakau atu ki ai mo e vahaʻa taimi ki he faifakamoʻoni he halá, ngāue ʻi he feituʻu fakapisinisí, pea mo e ʻaʻahi ki he ʻū ʻikai-ʻi-ʻapí. ʻI he fai peheé, ʻe tokoniʻi ai ʻe he kau mātuʻá ʻa e faʻahinga ʻoku nau ngāue tāimuʻá ke kau ki he ngāue fakamalangá fakataha mo e fakatahaʻangá ʻi ha taimi ʻe ʻaonga mo faingamālie ange. ʻOku totonu ke fakamatalaʻi fakalelei ki he fakatahaʻangá ʻa e ngaahi fokotuʻutuʻu kotoa ki he ngāue fakamalangá. Ko hono fai ʻo e ngaahi fakataha ki he ngāue fakamalangá ʻoku totonu ke fokotuʻutuʻu maau fakalelei. Tānaki atu ki ai, ʻoku totonu ke ʻai ke feʻunga ʻa e feituʻú pea ʻoku totonu ke ʻota leva ha ngaahi makasini feʻunga pea mo ha ngaahi tohi kehe.
13 Fokotuʻutuʻu Hoʻo Taimi-Tēpile Ngāue Fakafoʻituituí: Ko ha tokoua ʻe taha, ʻa ia naʻá ne ʻuluaki hohaʻa fekauʻaki mo e ngāue tāimuʻa tokoní, naʻá ne pehē: “ʻOku fuʻu faingofua ange ʻo ʻikai ke hangē ko ia naʻá ku fakakaukau ki aí. Ko e taimi-tēpile lelei pē ʻoku fiemaʻú.” ʻI he peesi fakamuimui ʻo e fakalahi ko ʻení, ʻokú ke vakai ai ki he fakatātā ʻo e taimi-tēpile ʻo e tāimuʻa tokoní ʻe lava ke ʻaonga kiate koe? Ko e houa ʻe 15 ʻi he uike taki taha ki he ngāue fakafaifekaú ko e kotoa ia ʻo e taimi ʻoku fiemaʻu ki he kau tāimuʻa tokoní.
14 Ke ngāue ko e kau tāimuʻa tokoní, ko e ngaahi uaifi tauhi-ʻapí pea mo e kau ngāue sifi efiafí ʻoku faʻa malava ke nau fakataimi-tēpileʻi honau taimi pongipongí ki he ngāue fakamalangá. Ko e fānau akó mo e kau ngāue sifi hengihengí ʻe lava ke nau ngāueʻaki kakato ʻa e hoʻatā efiafí ki he ngāue fakamalangá. Ko e kau ngāue fakamāmani taimi-kakató kuo nau ʻilo ʻoku malava pē ke nau mālōlō ʻi ha ʻaho ʻe taha mei he ngāué ʻi ha uike, pe ke ngāueʻaki kakato ʻa e fakaʻosinga ʻo e uiké ki he ngāue fakafaifekaú, ke tānaki atu ki hono fai ʻo e fakamoʻoni he efiafí. Ko e tokolahi ʻa ē ʻoku meimei ke toki fai pē ʻenau ngāue fakamalangá ʻi he fakaʻosinga ʻo e uiké ʻoku nau fili ʻa e ngaahi māhina ʻoku ʻi ai ʻa e ngaahi fakaʻosinga kakato ʻo e uiké ʻe nima. ʻI he taʻú ni, ʻoku hoko moʻoni ia ʻi Maʻasi, pea pehē ki ʻAokosi mo Nōvema. Ko hono ngāueʻaki ʻa e taimi-tēpile ʻi he peesi 6 ʻa ia ʻoku ʻomai ko ha tatakí, fai ha fakakaukau lelei mo faʻa lotu ki he meʻa ʻe hoko ko ha taimi-tēpile ngāue fakafoʻituitui ʻaonga ia ki ho tuʻunga tāutahá.
15 Ko e tokonaki lelei ʻe taha ki he tāimuʻa tokoní ko e ngaofengofuá. ʻE lava ke ke fili ʻa e ngaahi māhina te ke tāimuʻa aí, pea ʻe lava ke ke ngāue ki he lahi taha te ke fiemaʻú. Kapau te ke saiʻia ke tāimuʻa tokoni hokohoko atu ka ʻoku ʻikai malava, kuó ke fakakaukau ke ke kau ki ai ʻi he ngaahi māhina kehé ʻi he taʻú kotoa? ʻI he tafaʻaki ʻe tahá, ko ha niʻihi ʻe malava ke ngāue hokohoko atu ko ha kau tāimuʻa tokoni ʻi ha vahaʻa taimi lahi.
16 Teuteu ki he Tāimuʻa Taimi-Kakato: Ko e tokolahi ʻoku nau maʻu ʻa e laumālie ʻo e tāimuʻá ʻoku nau saiʻia nai ke ngāue ko ha kau tāimuʻa tuʻumaʻu, ka ʻoku nau fifili pe te nau maʻu ʻa e taimi, ko e ngaahi tuʻunga, pe ko e ivi ki aí. ʻOku ʻikai ha toe veiveiua ko e tokolahi taha ʻo e faʻahinga ʻoku nau tāimuʻa tuʻumaʻu he taimi ní naʻa nau ʻuluaki ngāueʻaki ʻa e ngāue tāimuʻa tokoní ko ha teuteu atu ia ki he ngāue taimi-kakató. Ko hono fakalahi atu ʻo ha taimi-tēpile tāimuʻa tokoni ʻa ha taha ʻaki ʻa e houa ʻe taha ʻi he ʻaho taki taha, pe ko ha ʻaho kakato ʻe taha ʻi he uike taki taha, ʻe malava ai ke fakahoko ʻa e taimi-tēpile tāimuʻa tuʻumaʻú. Ke vakai pe te ke malava ia, fēfē ke ngāueʻi ʻa e houa ʻe 90 ʻi he ngāue fakafaifekaú he lolotonga ʻo e māhina ʻe taha pe lahi ange ʻo e tāimuʻa tokoní? ʻI he taimi tatau, ʻe lava ke fakatupulekina ʻa e ngaahi toe ʻaʻahí mo e ngaahi ako Tohitapú, ʻa ia te ke fiefia ai ʻi he mafamafatatau lelei ʻa e ngāue tāimuʻá.
17 Ko ha tuofefine ʻe taha naʻá ne fiefia ʻi he taʻu ʻe ono hokohoko ʻo e tāimuʻa tokoní. Ko e taimi kotoa ko iá ko ʻene taumuʻa ia ki he kau ki he ngāue tāimuʻa tuʻumaʻú. Ki he taumuʻa ko iá, naʻá ne feinga ʻi ha ngaahi ngāue fakamāmani kehekehe ʻe fā ʻi he ʻamanaki ke fakalahi ange ha tuʻunga ʻa ia ʻe maʻu ai ʻa e fiemaʻu ki he houa ʻe 90 ki he kau tāimuʻa tuʻumaʻú ʻo fakatatau ki heʻene malavá. ʻI he māhina taki taha, naʻá ne fokotuʻutuʻu ha taimi-tēpile ʻe taha pe ua koeʻuhi ke ʻilo ai pe ʻe malava nai. Ka ʻi hono vakaiʻi kinautolú, naʻá ne ongoʻi ko e ngāue fakafaifekau taimi-kakató naʻe fuʻu mamaʻo ia mei heʻene aʻu ki aí. Ka neongo ia, naʻá ne hokohoko atu ʻene kole kia Sihova ki heʻene tatakí. Pea ʻi he ʻaho ʻe taha lolotonga ʻene teuteu ki he Fakataha Ngāué, naʻá ne lau ha kupu ʻi he ʻEtau Ngāue Fakafaifekau ʻo e Puleʻanga ʻo Sepitema 1991 naʻe pehē ai: ‘ʻI he lelei ange ke ʻoua ʻe fakamamafaʻi taʻetotonu ʻa e fiemaʻu ʻo e ngaahi houá, fēfē ke fakahanga ʻa e tokangá ia ki he faingamālie lahi ange ke kau ki he ngāue fakamalangá? (Sione 4:35, 36)’ ʻOkú ne pehē: “Naʻá ku toe lau ʻa e sētesi ko ʻení ʻo tuʻo nima pe ono, pea naʻá ku fakapapauʻi ai ko e tali ʻeni naʻe fai ʻe Sihová. ʻI he taimi ko iá naʻá ku fai leva ha fakakaukau ke kau ki he ngāue tāimuʻa tuʻumaʻú.” Neongo ko ʻene taimi-tēpile ngāue fakamāmani konga ʻahó naʻe ʻikai ke fuʻu lelei, naʻá ne fakahū atu ʻene tohi kole ki he tāimuʻa tuʻumaʻú. ʻI he uike ki mui aí naʻe liliu ʻene taimi-tēpilé, naʻá ne maʻu ha houa ngāue fakamāmani ʻa ia naʻe feʻungamālie kiate ia. Naʻá ne fakaʻosiʻaki, “Ko e toʻukupu ʻeni ʻo Sihová, pe ʻikai?,” peá ne tānaki atu: “ʻI he taimi ʻokú ke kole ai ki he tataki ʻa Sihová pea ke maʻu iá, ʻoua te ke talitekeʻi ia—tali ia.” Kapau ko hoʻo holi tōtōiví ia ke tāimuʻa tuʻumaʻu, mahalo pē ʻi he ngataʻanga ʻo e māhina ʻe tolu ʻo e ngāue tāimuʻa tokoní ʻi Maʻasi, ʻEpeleli, pea mo Mē ko ʻení, te ke lava ke tuipau ʻe malava ke ke lavameʻa ʻi he ngāue fakafaifekau taimi-kakató.
18 ʻOku tau fakapapauʻi ʻe tāpuakiʻi ʻe Sihova ʻa e ngaahi feinga tōtōivi mo e poupou loto-lelei ʻa ʻene kakaí ʻi heʻenau talaki atu ʻa e ongoongo lelei ʻo e fakamoʻuí he lolotonga ʻo e vahaʻa taimi failau ʻo e ngāue makehe ko ʻení. (Ai. 52:7; Loma 10:15) Te ke tali ʻa e ui ko ia ki he kau tāimuʻa tokoni ʻe toko 100 ʻaki hoʻo kau ki ai ʻi Maʻasi? ʻEpeleli? Mē?
[Puha ʻi he peesi 3]
Founga ke Lavameʻa Ai ko ha Tāimuʻa Tokoni
■ Fakakaukau pau fekauʻaki mo hoʻo ngaahi ʻamanakí
■ Lotu kia Sihova ke tāpuakiʻi hoʻo ngaahi feingá
■ Fakaafeʻi ha tokotaha malanga ʻe taha ke tāimuʻa fakataha mo koe
■ Fokotuʻutuʻu ha taimi-tēpile ʻaonga ki he ngāué
■ ʻOta ha ngaahi makasini feʻunga
■ Poupouʻi ʻa e ngaahi fokotuʻutuʻu ʻa e fakatahaʻangá ki he ngāué
■ Lamalama ha ngaahi faingamālie ki ha faifakamoʻoni ʻi he founga ʻikai anga-mahení