ʻOku ʻIkai Te Nau Fakaʻehiʻehi mei he Fakamoʻoní

¹ Ko hotau hingoá, ko e Kau Fakamoʻoni ʻa Sihova, ʻoku ʻiloʻi ai kitautolu mo fakamatalaʻi ai ʻa e meʻa ʻoku tau faí. ʻOku tau fai ʻa e fakamoʻoni ki he ngaahi ngeia ʻo hotau ʻOtua ko Sihová. (ʻAi. 43:​10, 12) Kuo pau ke kau ʻa e tokotaha taki taha ʻi hono fai ʻa e fakamoʻoni ko ʻení koeʻuhi ke ne hoko ko ha mēmipa ʻo e fakatahaʻangá. ʻOku fai fakatefito ʻa e fakamoʻoní ʻi heʻetau ngāue fakamalanga ki he kakaí, ʻa ia ʻoku kau ki ai ʻa e ʻaʻahi mei he fale ki he fale, ngāue ʻi he halá, fai ʻo e ngaahi toe ʻaʻahí, mo hono fai ʻo e ngaahi ako Tohi Tapu. ʻOku totonu ʻa hono naʻinaʻi mai kiate kitautolu hono kotoa ke kakapa atu ke kau kakato ki ai.​—1 Kol. 15:58.

² Kae kehe, ko e kau mēmipa ʻe niʻihi ʻo e fakatahaʻangá ʻoku fakangatangata ʻa e lahi ʻo e meʻa ʻoku lava ke nau faí. ʻOku fakangatangata nai kinautolu ʻe he puke lahi pe faingataʻaʻia. ʻOku fakatupu nai ʻe he ngaahi kāinga fakafepakí ha ngaahi faingataʻaʻiaʻanga ʻoku lavaʻingataʻa. ʻOku fakangatangata nai ha talavou ʻe ha mātuʻa taʻetui. Ko ha niʻihi ʻoku nau nofo ʻi he ngaahi feituʻu ʻoku ʻikai ke ʻi ai ha meʻalelé ʻoku nau pehē nai ʻoku meimei taʻemalava ke fai ha fakamoʻoni ia. Ko e anga maá ʻoku lava ke ne ʻai ha faʻahinga loto-siʻi ke nau toumoua. Ko e kau malanga ʻe niʻihi ʻoku nau ʻi he ngaahi tuʻunga ko ʻení pe meimei tatau pē ʻoku nau ongoʻi nai ʻoku ʻikai te nau maʻu ʻa e tuʻunga ʻoku taau mo ha kau Kalisitiané koeʻuhi ko e meʻa ʻoku nau lava ʻo faí ʻoku siʻi ʻaupito ia mei he meʻa ʻoku fai ʻe he niʻihi kehe pea toe siʻi ange ia mei he meʻa ʻoku nau loto moʻoni ke faí. ʻOku ʻikai ha ʻuhinga kiate kinautolu ke nau fakasiʻisiʻi ʻa ʻenau ngaahi feingá. (Kal. 6:4) ʻOku lava ke nau maʻu ha fiemālie ʻi he ʻilo ʻoku hōifua ʻa Sihova ʻi heʻenau fai ʻa honau lelei tahá neongo pe ko e hā ʻa e tuʻunga ʻoku nau ʻi aí.​—Luke 21:​1-4.

³ Fili ha Founga ke Kau Ai: Ko e ngaahi meʻa kuo hokosia ʻe laui afe ʻoku hā mei ai ʻa e faʻahinga ʻi he ngaahi tuʻunga faingataʻa ka naʻe ʻikai te nau tuku ʻa e ngaahi faingataʻaʻiaʻangá ke ne taʻofi kinautolu mei he fakamoʻoní. ʻI hono ngāueʻaki ʻa ʻenau feinga mālohí, kuo nau fakakaukauʻi ai ha ngaahi founga lahi mo kehekehe ke fai ai ʻa e fakamoʻoni ʻikai ʻi he founga mahení. Ko kinautolu ʻoku pau ke nau nofo pē ʻi ʻapí kuo nau ngāueʻaki ʻa e telefoní ke fakaava ai ha matapā lahi ki he fakamoʻoní. ʻOku fai ʻa e vakai ki he tokotaha ʻaʻahi kotoa pē ko e tokotaha fanongo. Neongo ko ha uaifi ʻoku ʻi ha fāmili ʻoku fakafepaki pea ʻoku ʻikai lava nai ʻo fakamoʻoni ʻi he ʻapí, ʻokú ne ngāueʻaki ʻe ia ʻa e ngaahi faingamālié ke lea ki he ngaahi kaungāʻapí pe niʻihi kehe ʻokú ne feʻiloaki mo ia ʻi heʻene ngāue fakaʻahó.

⁴ Ko ha talavou ʻe taʻofi nai ia ʻe ha mātuʻa taʻetui ke ʻoua ʻe kau ʻi heʻetau fakamoʻoni ki he kakaí. Ke ʻoua te ne lau ia ko ha faingataʻaʻiaʻanga ʻoku ʻikai ala lavaʻi, ka ne lau ʻa hono kaungāakó mo e kau faiakó ko hono “kauhala” ia ʻoʻona pea lava ke ne fai ha fakamoʻoni lelei mo kamata nai ha ngaahi ako Tohi Tapu. Ko e tokolahi ʻoku nau nofo ʻi he ngaahi feituʻu ʻoku maomaonganoa mo mamaʻó ʻoku malava ke nau fai fakamoʻoni ʻaki ʻa e faitohi. Ko kinautolu kuo ueʻi ʻe he faivelenga faka-Kalisitiané te nau maʻu maʻu ai pē ha founga ke fakaʻehiʻehi ai mei he “fakapikopiko pe taʻefua, ʻi he lavaʻi ʻo e ʻilo kanokano ki hotau ʻEiki ko Sisu Kalaisi.”​—2 Pita 1:8.

⁵ ʻI he fekauʻaki mo ʻetau kau ki he ngāue fakamoʻoní, kuo fokotuʻu ʻe Sihova ha tuʻunga faitatau ki he tokotaha kotoa pē, ʻa ia ʻoku totonu ke tau “ngaue fie ngaue.” (Kol. 3:23) Neongo ko e lahi ʻo e taimí pea mo e meʻa te tau malavá ʻe kehekehe pē ia, ka ʻoku tatau pē ʻa e meʻa tefito ʻokú ne ueʻi kitá​—ko e ʻofa moʻoni ʻoku tupu mei he “loto katoa.” (1 Kal. 28:​9, PM; 1 Kol. 16:14) Kapau ʻoku tau ʻoatu ʻa hotau lelei tahá, ʻe ʻikai pē ke ʻi ai ha ʻuhinga ia ke tau pehē ai ʻoku siʻi ʻa ʻetau tuí pe ko ha kau mēmipa taʻeʻaonga kitautolu ʻo e fakatahaʻangá koeʻuhi ko e siʻi ʻa e meʻa ʻoku tau lavá. Hangē ko Paulá, ʻe lava ke tau lea moʻoni, ʻoku ʻikai te tau ‘fakaʻehiʻehi mei hono tala ʻa e ngaahi meʻa ʻoku ʻaonga pea pehē ki he akoʻi ʻo e kakai.’​—Ng. 20:20.