Ko e Taimí ʻEni
1 ʻI he taimi naʻe tohi ai ʻe he ʻaposetolo ko Paulá ʻa ʻene tohi hono ua ki he kau Kolinitoó, naʻá ne fakamanatu kiate kinautolu ʻo pehē naʻa nau fakapapau ʻi honau lotó ke fai ha ngāue lelei maʻa honau kaungā-tui ʻi Selusalemá. Kae kehe, ʻi he hili ha taʻu ʻe taha mei ai, naʻe teʻeki ai ke nau fakakakato ʻa e ngāue ko ia naʻa nau kamatá. Ko ia naʻá ne naʻinaʻi kiate kinautolu: “Mou hoko atu pea fai ke ʻosi ia: ke hangē ko hoʻomou loto-vēkeveke ke fakakakato ʻa e fokotuʻutuʻu naʻa mou fakakaukau ki aí.”—2 Kol. 8:11, The New English Bible.
2 ʻI he taimi ʻe niʻihi, ko kitautolu hono kotoa kuo tau fokotuʻu ha ngaahi kolo maʻatautolu. Naʻa tau fakapapauʻi nai ʻi hotau lotó ke fakalahi ʻa ʻetau kau ki he ngāue fakamalangá, ke hoko ʻo ʻilo lelei ange hotau ngaahi tokouá, ke hoko ʻo taau mo ha monū ʻo e ngāué, pe ke ikuʻi ha vaivaiʻanga ʻe niʻihi. Neongo naʻa tau kamata ʻaki ha ngaahi fakakaukau lelei, kuo ʻikai nai te tau tutui atu ke aʻu ki heʻetau koló. Ki muʻa ke tau fakatokangaʻí, kuo ʻosi atu ʻa e ngaahi uike, ngaahi māhina, pea naʻa mo ha ngaahi taʻu kuo ʻikai pē ke tau fai ʻe kitautolu ha laka ki muʻa. ʻIkai ʻe fiemaʻu ai ke tau ngāueʻaki kiate kitautolu ʻa e akonaki ko eni ke “hoko atu pea fai ke ʻosi” ʻa e meʻa naʻa tau kamatá?
3 Ko Hono Lavaʻi ʻEtau Ngaahi Koló: ʻOku faingofua ʻa hono fai ha fakapapau fakafoʻituitui ki hono fai ha meʻa ka ʻoku faingataʻa ange ʻa hono fakahoko ʻa e meʻa ko iá. Ko e toloi-meʻá ʻoku malava ke ne fakatutaʻi ha laka ki muʻa. ʻOku fiemaʻu ke tau fakapapauʻi ʻi hotau ʻatamaí pea tau fakapapauʻi ke tutui atu ʻo ʻoua ʻe toe toloi. ʻOku mātuʻaki mahuʻinga ʻa e fokotuʻutuʻu maau fakafoʻituituí. ʻOku mahuʻinga ke vaheʻi ʻa e taimi ʻoku fiemaʻu ki hono fai ai ʻa e ngāué pea ke fakapapauʻi ke ngāueʻaki ʻa e taimi ko iá ki he taumuʻa ko iá. Ko ha fakakaukau lelei ia ke fokotuʻu ha taimi pau ʻe ʻosi ki ai ia pea ngāueʻaki ʻa hono puleʻi kita ke fakapapauʻi ʻoku aʻu ki he meʻa ko ia.
4 ʻI he taimi ʻoku faingataʻa ai ke tau aʻusia ʻetau ngaahi koló, ʻoku faingofua ke tau pehē: ‘Te u aʻu ki ai ʻamui.’ Ka ʻoku ʻikai te tau ʻilo pe ko e hā ʻe hoko ʻi he kahaʻú. ʻOku fakahā ʻe he Palōvepi 27:1: “ʻOua te ke polepole ha meʻa te ke fai ʻapongipongi; he ʻoku ʻikai te ke ʻilo pe ko e ha ʻe fanauʻi ʻe he ʻaho.” Naʻe fai fakatokanga mai ʻa e ākonga ko Sēmisí ʻo kau ki he falala ki he kahaʻú koeʻuhi “ʻoku ʻikai te mou ʻilo ʻa e meʻa ʻo e ʻapongipongi. . . . Ko ia ʻoku ne ʻilo ha lelei ke fai ka ʻoku ʻikai fai, ko haʻána angahala ia.”—Sēm. 4:13-17.
5 ʻI he lahi fau ʻa e ngaahi meʻa ʻokú ne fakaleluʻi kitá pea pehē ki he ngaahi meʻa ʻoku fiemaʻu ʻe he niʻihi kehé meiate kitautolú, ʻoku faingofua ke fakaʻuliʻulilātaiʻi ai ʻetau ngaahi koló. ʻOku fiemaʻu ha feinga loto-tokanga ki hono ʻai ʻetau ngaahi koló ke māʻalaʻala maʻu pē ʻi heʻetau fakakaukaú. ʻOku mātuʻaki tokoni ai ʻa ʻetau ngaahi lotu ʻo kau ki he meʻá ni. Ko e kole ki he niʻihi kehe ʻokú te maheni mo iá ke nau fakamanatu mo fakalototoʻaʻi kitautolu ki aí ʻoku ʻi ai hano ola lelei. Ko hono hikiʻi ha kiʻi fakamatala ʻi heʻetau tohi māhiná ʻe hoko ia ko ha fakamanatu kiate kitautolu ke tau vakaiʻi ʻetau laka ki muʻa. Kuo pau ke fakapapauʻi ʻe ha taha ʻi heʻene fakakaukaú ke ne “fai ki he meʻa kuo ne tuʻutuʻuni ʻi hono loto.”—2 Kol. 9:7.
6 ʻOku tokonaki mai ʻe he māhina ko ʻOkatopá ha faingamālie lelei ke tau tokanga taha ai ki heʻetau ngaahi koló. Te tau tuʻuaki atu ai ʻa e ngaahi tatau ʻo e Taua Leʻo mo e Awake! ʻE lava ke tuʻuaki atu ʻa e ngaahi tukuhau ki he ongo makasini ko ení ʻo ka ʻi ai ha fie fanongo moʻoni, tautautefito ʻi he ngaahi toe ʻaʻahí. ʻE lava ke tau fokotuʻu ha ngaahi kolo ʻe malava ke lavaʻí? Fēfē ke tau feinga ke fakalahi ʻa e ngaahi makasini ʻoku tau tuku atú? ʻOku malava ke hoko ko ha kolo ʻe lava ke lavaʻi ʻe he tokolahi ʻa hono fakapapauʻi ke fai ha ngaahi toe ʻaʻahi lahi ange pea ke kamata ha ako Tohi Tapu foʻou.
7 ʻOku ʻikai ke fakapotopoto ʻa hono toloi ʻa e meʻa ʻoku mahuʻingá, koeʻuhi “ʻoku fakaʻaʻau ke mole ʻa mamani.” (1 Sione 2:17) ʻOku malava ke tau maʻu he taimí ni ʻa e ngaahi monū mo e ngaahi tāpuaki makehe ʻi he ngāue ʻa Sihová. ʻOku fakatuʻunga pē ʻiate kitautolu ʻa hono ngāueʻaongaʻaki kinautolú.