Founga ke Aʻusia Ai Hoʻo Ngaahi Taumuʻa Fakalaumālié
1. Ko e hā ʻa e ngaahi taumuʻa fakalaumālie ʻoku maʻu ʻe he toʻutupu Kalisitiane tokolahi?
1 ʻI he tuʻunga ko ha toʻutupu Kalisitiané, ʻoku ʻikai ha veiveiua ko hoʻo ngaahi taumuʻa ʻi he moʻuí ʻoku tākiekina ia ʻe hoʻo ʻofa kia Sihová, pea mo e ngaahi lea ʻa Sīsū ki he kau Kalisitiane kotoa pē ke “fuofua kumi ae buleaga.” (Mt. 6:33, PM) Ko hoʻo taumuʻá nai ia ke fakalahi atu hoʻo ngāue fakafaifekaú ʻaki ʻa e hoko ko ha tāimuʻa pe ko hoʻo ngāue ʻi ha feituʻu ʻoku lahi ange ai ʻa e fiemaʻu ki ha kau fanongonongo ʻo e Puleʻangá. ʻE fakakaukau nai ʻa e niʻihi ke nau pole ki he ngāue langa fakavahaʻapuleʻangá, ngāue ʻi ha ʻōfisi vaʻa, pe ngāue ko ha misinale. He ngaahi taumuʻa fakafiemālie mo lelei moʻoni ia!
2. Ko e hā ʻe lava ke ne tokoniʻi koe ke ke aʻusia ai hoʻo ngaahi taumuʻa fakalaumālié?
2 Ko ha meʻa ʻe tokoni ke ke aʻusia ai hoʻo ngaahi taumuʻa fakalaumālié ko hono hikiʻi fakahokohoko ia. ʻOku pehē ʻe he Taua Leʻo ʻo Siulai 15, 2004: “Ko ha fakakaukau noa ʻoku hoko ia ʻo hā mahino mo makehe ʻi he taimi [ʻokú ke] filifili ai ʻa e ngaahi foʻi lea ke fakahaaʻi ʻaki iá. Te [ke] fakaʻamu nai ai ke hiki ʻi ha pepa [hoʻo] ngaahi taumuʻá mo e palani ke aʻusia ai iá.” Tānaki atu ki ai, ko e ngaahi taumuʻa ʻi he tuʻunga fakaʻavalisí ʻe lava ke tokoni ia kiate koe ke ke fakafuofuaʻi ʻa e anga hoʻo fakalakalaká pea tauhi maʻu hoʻo tokangá ʻi hoʻo tuli ki ha taumuʻa vahaʻa taimi lōloá.
3. Lave ki he ngaahi taumuʻa vahaʻa taimi nounou ʻe lava ke tokoniʻi ai ha taha ke ne taau ki he papitaisó.
3 Taumuʻa Vahaʻa Taimi Nounou: Kapau ʻoku teʻeki ai ke ke papitaiso, fakakaukau angé ki he meʻa ʻoku fiemaʻu ke ke fai ka ke lava ai ʻo aʻusia ʻa e taumuʻa ko iá. ʻE fiemaʻu nai ke ke mahinoʻi lelei ange ʻa e ngaahi akonaki Fakatohitapu tefitó. Kapau ko ia, ʻai ia ko hoʻo taumuʻa ke ako fakamākukanga ʻa e tohi Akoʻi ʻe he Tohi Tapú, ʻo huke ki he ngaahi konga Tohi Tapu kotoa ʻoku hā aí. (1 Tim. 4:15) Fokotuʻu foki ha taumuʻa ke lau ʻa e Tohi Tapú kotoa meia Senesi kia Fakahā, ʻo hangē ko ia ʻoku fiemaʻu ke fai ʻe he kau Pētelí pe ko e kau ako ʻi Kiliatí. Hili iá, tauhi maʻu ha polokalama tuʻumaʻu ʻo e lau Tohi Tapu fakaʻahó. (Sāme 1:2, 3) Fakaʻuta atu ki he tokoni lahi ʻa e meʻa ko iá kiate koe ke ke tupu fakalaumālie aí! Kamata mo fakaʻosiʻaki ha lotu fakamātoato ʻi he taimi taki taha ʻo hono lau mo e ako ʻo e Tohi Tapú, pea feinga maʻu pē ke ngāueʻaki ʻa e meʻa ʻokú ke akó.—Sem. 1:25.
4. Ko e hā ʻa e ngaahi taumuʻa vahaʻa taimi nounou ʻe fokotuʻu nai ʻe ha Kalisitiane ʻoku ʻi ai ʻene taumuʻa vahaʻa taimi lōloa ke ngāue ʻi he Pētelí pe ngāue fakamisinalé?
4 Kapau kuó ke ʻosi papitaiso, ko e hā ʻa e toe ngaahi taumuʻa ʻe lava ke ke tuli ki aí? ʻOku fiemaʻu ke fakaleleiʻi hoʻo ngaahi pōtoʻi malangá? Ko e fakatātaá, ʻe lava ke ʻai ko hoʻo taumuʻá ia ke ke hoko ʻo toe pōtoʻi ange ʻi hono ngāueʻaki ʻa e Folofola ʻa e ʻOtuá ʻi he ngāue fakafaifekaú? (2 Tim. 2:15) ʻE anga-fēfē nai haʻo fakalahi atu hoʻo ngāue fakafaifekaú? Fokotuʻu ha ngaahi taumuʻa vahaʻa taimi nounou ʻe niʻihi ʻa ia ʻoku feʻunga mo ho taʻú pea mo ho ngaahi tuʻungá pea ʻe tokoniʻi ai koe ke ke aʻusia ʻa hoʻo ngaahi taumuʻa vahaʻa taimi lōloá.
5. Naʻe anga-fēfē ʻa e tokoni hono fokotuʻu ha taumuʻa vahaʻa taimi nounoú ki ha tokoua ke ne aʻusia ai ʻene taumuʻa ko e ngāue ʻi he Pētelí?
5 Talanoa ki he Lavameʻá: ʻI he ʻaʻahi atu ʻa e taʻu 19 ko Tony ki ha ʻōfisi vaʻa ʻo e Kau Fakamoʻoni ʻa Sihová, naʻe langaʻi ai ʻene fie ngāue ʻi he Pētelí. Kae kehe, naʻá ne anga taʻemangoi, pea naʻe teʻeki ai foki ke ne fai ha fakatapui ki he ʻOtuá. Naʻe fakakaukau ʻa Tony ke ʻai ʻene moʻuí ke fehoanaki mo e ngaahi founga ʻa Sihová pea ʻai ko ʻene taumuʻá ia ke ne taau ki he papitaiso. Hili ʻene aʻusia iá, naʻá ne fokotuʻu e taumuʻa ke ne hoko ko ha tāimuʻa tokoni peá ne toki hoko ko ha tāimuʻa tuʻumaʻu, ʻo ne hikiʻi ʻi heʻene tohimāhiná ʻa e ngaahi ʻaho naʻá ne fie kamata aí. Sioloto atu ki heʻene fiefiá ʻi hono fakaafeʻi ia hili ʻene tāimuʻa ʻi ha vahaʻa taimí ke ne ngāue ʻi he Pētelí!
6. Ko e hā ʻe lava ke tokoni kiate koe ke ke aʻusia ai ʻa hoʻo ngaahi taumuʻa fakalaumālié?
6 Ko koe foki ʻe lava ke ke aʻusia ʻa hoʻo ngaahi taumuʻa fakalaumālié ʻi hoʻo feinga ke fakamuʻomuʻa ʻa e ngaahi meʻa ʻo e Puleʻangá. Fakahā maʻu pē “ʻa e ngaahi meʻa ʻoku ke fai” kia Sihova ʻi he lotu, pea feinga tōtōivi ke lavaʻi ia.—Pal. 16:3; 21:5.