ʻOku Maʻu ʻe he Folofola ʻa e ʻOtuá ʻa e Mālohi
1 Kuo tākiekina lahi ʻe he Tohi Tapú ʻa e moʻui ʻe laui miliona. ʻOku fakatupu-ueʻiloto ange ʻa e meʻa ʻokú ne leaʻakí ʻi ha meʻa pē kuo malava ke fakatupu mai ʻe he tangatá. (Hep. 4:12) Vakai ki he meʻa kuó ne fai maʻatautolú. Ko e moʻoni, ʻoku taʻefakatataua ʻa hono mahuʻingá.
2 Ko e Kau Fakamoʻoni ʻa Sihová ʻoku nau tuʻu-ki-muʻa ʻi he hoko ko e kau ako pea mo hono poupouʻi ʻo e Tohi Tapú. ʻOku totonu ke tau vakai ki hono lau ʻo e Tohi Tapú ko ha konga mātuʻaki mahuʻinga ia ʻo ʻetau taimi-tēpile tuʻumaʻu fakateokalatí, ʻo ʻai ia ke muʻomuʻa ʻi he mamata televīsoné pea pehē ki he ngaahi meʻa fakafiefia kehé.
3 ʻAi Ke ʻUlungaangaʻaki Ia: Kuo hoko ʻo houngaʻia ʻa e kakai ʻa Sihová ʻi he tākiekina mālohi ʻoku malava ke fakahoko ʻe he lau Tohi Tapu tuʻumaʻú. Kuo laui taʻu lahi ʻa e tuʻu ʻa ha fakaʻilonga lahi ʻi he taha ʻo hotau ngaahi fale ngāue ʻi Brooklyn ʻo fakalotoʻi ʻa e faʻahinga ʻoku feʻaluʻaki holó ke nau “Lau Fakaʻaho ʻa e Folofola ʻa e ʻOtuá ko e Tohi Tapú.” ʻOku fiemaʻu ki he kau mēmipa foʻou ʻo e fāmili Pētelí ke nau lau ʻa e Tohi Tapú fakakātoa ʻi he lolotonga ʻo honau ʻuluaki taʻu ʻi he ngāue faka-Pētelí.
4 Neongo ʻoku moʻumoʻua ʻa hoʻo taimi-tēpilé, ʻokú ke laka tatau mo e lau Tohi Tapu ʻoku fokotuʻu fakauike mai ʻi he Fakahokohoko Ako Fakafaifekau Fakateokalatí? Kapau ʻoku faingataʻa kiate koe ʻa hono fai ʻo e meʻá ni, ko e hā ʻoku ʻikai fai ai ha ngāue ke fakaleleiʻi ia ʻi he lolotonga ʻo Nōvemá? Ko e lau Tohi Tapu ki he māhiná fakakātoa ko e Sāme 95-109, ʻa ia ʻoku fiemaʻu ai ke lau ha peesi nai ʻe tolu pe fā ʻi he uike taki taha. ʻOku fili ʻa e niʻihi ke fai ha lautohi ʻi he ʻaho taki taha, mahalo pē ʻi he taimi hengihengí pe ko e ki muʻa ke mohe ʻi he poʻulí. Tatau ai pē pe ʻoku fēfē ʻa hoʻo fai iá, ko e meʻa mahuʻingá ko hoʻo maʻu ʻa e ngaahi ʻaonga mei hono lau maʻu pē ʻa e Folofola ʻa e ʻOtuá.
5 Tuʻuaki Atu ʻa e “New World Translation”: Ko e tokolahi ʻo ʻetau kau ako Tohi Tapú pea mo e faʻahinga kehe ʻoku nau fiefanongó ʻoku nau lava ʻo lea faka-Pilitānia lelei. Kapau ko ia, fēfē ke tuʻuaki kiate kinautolu ha tatau ʻo e New World Translation ke nau ngāue fakatahaʻaki mo ʻenau Tohi Tapu faka-Tongá ʻi he taimi ʻoku nau fai ai ha fekumi?
6 Teuteu ha ngaahi fakamatala fakatupunga fakakaukau ʻe niʻihi ʻi he ngaahi konga tuʻu-ki-muʻa ʻi he New World Translation ʻa ia te ne langaʻi ʻa e mahuʻingaʻia ʻa e kakaí ke nau fiemaʻu iá. Fakaeʻa ʻa hono mahuʻinga ke ngāueʻaki iá. ʻE lava ke ke fakaeʻa ʻa e taha ʻo e ngaahi tuʻunga-lea ʻi he konga ko e “Ngaahi Tuʻunga Lea Faka-Tohitapu Ke Fetalanoaʻaki Ai.” Pe te ke fakahāhā ʻa e mahuʻinga ʻo e fakahokohoko ʻi he peesi 92 ʻo e ngaahi foʻi lea faka-Tohitapú ʻaki hoʻo fakahaaʻi ʻa e founga ʻe malava ai ha tokotaha lautohi ke ne maʻu ʻa e ngaahi konga Tohi Tapu ʻoku anga maheni mo iá. ʻE loto nai ʻa e kau malanga ʻe niʻihi ke nau fakaeʻa ʻa e “Appendix” pe ko e “Fakahokohoko ʻo e Ngaahi Tohi ʻo e Tohi Tapú” ʻaki hono fakahāhā ʻa hono mahuʻingá ʻi he ako Tohi Tapú.
7 Fakapapauʻi ke fakahaaʻi ko e New World Translation ʻoku ʻi he lea faka-Pilitānia ia ʻo onopooní, ʻa ia ʻokú ne ʻai ke faingofua ange ke maʻu ʻa e mahinó. Ko e niʻihi ʻo e ngaahi fakafehoanaki mahuʻinga mo e King James Version ko e 1 Kolinitō 10:25 mo e 16:22. ʻOku ngāueʻaki ʻe he New World Translation ʻa e huafa ʻo e ʻOtua, ko Sihová, ʻo tuʻo 7,210.
8 ʻIo, ko e Tohi Tapú ko e Folofola ia ʻa e ʻOtuá. Kapau te tau lau ia, tui ki ai, pea ngāueʻaki ʻene akonakí ʻi heʻetau moʻuí, te tau maʻu ai ʻa e ngaahi ʻaonga lahi. Naʻe tohi ia ke ne ʻomai kiate kitautolu ʻa e fakahinohino mo e ʻamanaki. (Loma 15:4) ʻOku mātuʻaki mahuʻinga ke tau vakai ki ai ʻi he ʻaho kotoa pē pea te tau hoko ai ʻo mateuteu ke ngāueʻaki ia ke akoʻi ha niʻihi kehe.