Ngaahi Tāpuaki ʻOku Maʻu mei he Ngāue mo e Niʻihi Kehé
1 ʻOkú ke pehē ʻoku ʻi ai ha ngaahi ʻaonga ʻoku tau maʻu mei he ngāue mo e niʻihi kehe ʻi he ngāue fakamalangá? Naʻe pehē ʻa Sīsū. Neongo naʻe lahi ʻa e ututaʻú pea tokosiʻi ʻa e kau ngāué, ka naʻá ne fekau atu ʻa e kau ākonga ʻe toko 70 ki he ngāue fakamalangá ʻo “tautau toko ua.” Ko ha taimi fakafiefia ia kiate kinautolu kotoa ʻi he malanga “ki he kolo taki taha mo e potu ʻoku ne teu ʻalu ki ai ʻe ia”!—Luke 10:1, 17; Mt. 9:37.
2 ʻOku fakalotomāfana ke ngāue mo e niʻihi kehé. Ko e niʻihi ʻo kitautolu ʻoku nau mā pea ʻoku nau faingataʻaʻia ke lea ki ha faʻahinga ʻoku ʻikai ke maheni mo ia. ʻI he hoa mo ha tokotaha ʻoku tau maʻu ai ha loto-pau ke lea lototoʻaʻaki ʻa e Folofola ʻa e ʻOtuá. ʻI heʻetau ʻalu mo ha tokotaha, ʻoku faingofua ange ai kiate kitautolu ke fai ʻa e ngāué ʻi he founga naʻa tau ako ki aí. (Pal. 27:17) ʻOku pehē ʻe he tangata potó: “ʻOku ngutuhuaange ke toko ua ʻi heʻete toko taha.”—Koh. 4:9.
3 ʻOku lelei ke ngāue mo e kau malanga mo e kau tāimuʻa kehekehe. Naʻe kau ki he kau kaungāngāue ʻo e ʻaposetolo ko Paulá ʻa Panepasa, Sailosi, Tīmote, mo Sione Maʻake, pea naʻa nau maʻu ʻa e ngaahi tāpuaki ʻi heʻenau ngāue fakamalanga fakatahá. ʻOku hoko ʻa e meʻa tatau pē ʻi he ʻahó ni. Kuó ke ngāue mo ha tokotaha kuo fuoloa ʻa ʻene kau ki he moʻoní? ʻI he ʻosi ʻo hoʻo mamata ki heʻene pōtoʻi ʻi hono fai ha fakamoʻoni, ngalingali naʻá ke maʻu ai ha ngaahi fakakaukau lelei kuo hoko ʻo tokoni ke ke lelei ange ai. Kuó ke hoa mo ha kau malanga ʻoku nau kei foʻoú? Tā naʻá ke lava nai ʻo ʻoatu ha niʻihi ʻo e meʻa naʻá ke ʻosi akó pea tokoni nai kiate kinautolu ke nau ola lelei ange mo maʻu ha fiefia lahi ange ʻi heʻenau ngāue fakamalangá.
4 ʻOkú ke lolotonga fai ha ako Tohi Tapu? Kapau ko ia, ko e hā ʻoku ʻikai te ke fakaafeʻi ai ha tokotaha ʻo e kau mātuʻá pe ʻovasia fakafeituʻú ke mo ō? ʻOku ʻaonga ki heʻetau kau ako Tohi Tapú ke nau maheni mo e kau ʻovasiá. Kapau ʻokú ke teteki ʻo fekauʻaki mo hono fai ʻo e akó ʻi he ʻi ai ʻa e tokotaha ʻo e kau mātuʻá, mahalo ʻe loto-lelei ia ke ne fai ʻa e akó ka ke fanongo pē. ʻI he ʻosi ʻa e akó, ongoʻi tauʻatāina ke ʻeke kiate ia ha ngaahi fokotuʻu ki ha meʻa te ke fai ke tokoni ki he tokotaha akó ke fakalakalaka vave ange.
5 ʻI hoʻo ngāue mo e niʻihi kehé ʻai ke ke hoko ko ha hoa fakatupu-lototoʻa. Fakakaukau pau ʻi hoʻo ngaahi fakamatala ʻo fekauʻaki mo e kauhalá. ʻOua ʻaupito ʻe lauʻi ʻa e niʻihi kehé pe lāunga ʻo fekauʻaki mo e ngaahi fokotuʻutuʻu ʻa e fakatahaʻangá. Fakahanga pē ʻa hoʻo fakakaukaú ki he ngāue fakamalangá mo e ngaahi tāpuaki meia Sihová. Kapau te ke fai pehē, te mo fakatou foki mo ho hoa ki ʻapí kuó mo fakafoʻou fakalaumālie.
6 Ko ho ngaahi tuʻungá ʻokú ne ʻai nai ke faingataʻa kiate koe ke ngāue maʻu pē mo e ngaahi tokoua mo e tuofefine kehé. Kae kehe, kapau ʻoku malava, ko e hā ʻoku ʻikai fokotuʻutuʻu ai ke ʻi ai ha taimi ke ngāue ai mo ha tokotaha malanga kehe? Ko ha fakatou tāpuaki ē kiate kimoua!—Loma 1:11, 12.