Tokoniʻi ʻe he Kau Tāimuʻá ʻa e Niʻihi Kehé
1 Naʻe pehē ʻe Sīsū: “Kuo lahi ʻa e taʻu kuo motuʻu, ka ʻoku kaungatāmaki ʻa e kau ngāue: ko ia ke mou kole ki he ʻEiki ʻoku aʻana ʻa e taʻu, ke ne kouna atu mo ha kau ngāue ke utu ʻene taʻu.” Koeʻuhi naʻe tokosiʻi ʻa e kau utu-taʻú ʻi he ʻuluaki senitulí pea naʻa nau maʻu ha feituʻu lahi ke ngāueʻi, naʻe mei lava ʻe Sīsū ke tataki kinautolu ke aʻu ki he tokolahi taha ʻe malavá mo e ongoongo leleí ʻaki hono tuku atu kinautolu tautau toko taha. Ka, naʻá ne “fekau atu kinautolu, ʻo tautau toko ua.” (Luke 10:1, 2) Ko e hā hono ʻuhinga ke tautau toko ua aí?
2 Ko e kau ākonga ko iá naʻa nau kei foʻou pea ʻikai fuʻu taukei. ʻI he ngāue fakatahá ʻe lava ai ke nau feakoʻaki mo fefakalototoʻaʻaki. Hangē ko ia ʻoku ʻomai ʻe Solomoné, “ʻoku ngutuhuaange ke toko ua ʻi heʻete toko taha.” (Koh. 4:9, 10) Naʻa mo e hili hono huaʻi hifo ʻa e laumālie māʻoniʻoní ʻi he Penitekosi ʻo e 33 T.S., ko Paula, Panepasa, pea mo e niʻihi kehe naʻa nau ngāue fakataha mo e kaungā-tuí ʻi he ngāue fakafaifekaú. (Ng. 15:35) Ko ha monū lahi ē kuo pau naʻe maʻu ʻe ha niʻihi ke akoʻi fakafoʻituitui kinautolu ʻe ha kau tangata taau pehē!
3 Ko ha Polokalama Ako Lelei: Hangē ko ia naʻe fakahoko ʻi he ʻuluaki senitulí, ko e fakatahaʻanga Kalisitiane ʻi onopōní ko ha kautaha malanga. ʻOku toe tokonaki mai ai maʻatautolu ha akoʻi. ʻI he tuʻunga tāutahá, ʻoku totonu ko ʻetau holi fakamātoató ia ke ʻoatu ʻa e ongoongo leleí ʻi he ola lelei taha ʻe malavá. Koeʻuhí ko ha kau malanga tokolahi ange ke lava ʻo fakaleleiʻi ʻenau ngāué, ʻoku ʻai ke ala maʻu ʻa e tokoní.
4 ʻI he Akoʻanga Fakafaifekau ʻo e Puleʻangá naʻe toki faí, naʻe fanongonongo ai ʻe he Sōsaietí ha polokalama ki he kau tāimuʻá ke nau tokoniʻi ʻa e niʻihi kehé ʻi he ngāue fakamalangá. ʻOku ʻi ai ha fiemaʻu ki he meʻá ni? ʻIo, ʻoku ʻi ai. Laka hake ʻi he kau malanga ʻe toko taha miliona naʻe papitaiso ʻi he taʻu ʻe tolu kuohilí, pea ko e tokolahi ʻo e faʻahingá ni ʻoku fiemaʻu ke akoʻi ke hoko ʻo ola lelei ange ʻi he ngāue fakamalangá. Ko hai ʻoku lava ke ngāueʻaki ke fakahoko ʻa e fiemaʻu ko iá?
5 ʻE lava ke tokoni ʻa e kau tāimuʻa taimi-kakató. ʻOku tokonaki ʻe he kautaha ʻa Sihová maʻanautolu ʻa e fakahinohino mo e ako lahi. ʻOku maʻu ʻe he kau tāimuʻá ʻa e fakahinohino feʻunga ki heʻenau ngaahi fiemaʻú ʻi he uike ʻe ua ʻo e Akoʻanga Ngāue Tāimuʻá. ʻOku nau toe maʻu foki ʻa e ʻaonga mei he ngaahi fakataha mo e kau ʻovasia fakafeituʻú mo fakavahé, pea pehē ki he tataki mei he kau mātuʻá. Neongo ʻoku ʻikai ko e kau tāimuʻa kotoa pē ʻoku nau taukei hangē ko Paula mo Panepasá, kuo nau maʻu ha ako mahuʻinga, ʻa ia ʻoku nau fiefia ke vahevahe atu.
6 Ko Hai ʻE ʻAonga ki Aí? Ko e kau ki he polokalama ko ʻení ʻoku fakangatangata pē ia ki he kau malanga foʻoú pe faʻahinga papitaiso foʻoú? ʻIkai ʻaupito! ʻOku ʻi ai ʻa e toʻutupu mo e faʻahinga taʻumotuʻa naʻa nau ʻilo ʻa e moʻoní ʻi he ngaahi taʻu, te nau houngaʻia ai ʻi ha tokoni ʻi he ngaahi tafaʻaki kehekehe ʻo e ngāue fakafaifekaú. ʻOku fai ʻe he niʻihi ʻa e ngāue lelei ʻaupito ʻi hono tufa ʻa e ngaahi tohí ka ʻoku faingataʻa ke fai ha ngaahi toe ʻaʻahi pe ko hano kamata ha ngaahi ako Tohitapu. ʻOku kamata nai ʻe he niʻihi ha ngaahi ako Tohitapu ʻi he founga faingofua ka ʻoku nau fakatokangaʻi ko ʻenau kau akó ʻoku ʻikai laka ki muʻa. Ko e hā ʻokú ne taʻotaʻofi kinautolú? ʻE kole nai ki ha kau tāimuʻa taukei ke nau fai ha tokoni ʻi he ngaahi tafaʻaki ko ʻení. Ko e kau tāimuʻa ʻe niʻihi ʻoku nau ola lelei ʻi hono fakatupulekina ha mahuʻingaʻia, kamata ha ngaahi ako Tohitapu, pea tataki ʻa e kau ako foʻoú ki he kautahá. ʻE ʻaonga ʻenau ngaahi taukeí ki he polokalama foʻou ko ʻení.
7 ʻOkú ke fakatokangaʻi ko hoʻo taimi-tēpilé ʻoku ʻikai te ne fakaʻatā koe ke ke poupou ki he ngaahi fakataha tuʻumaʻu ʻa e fakatahaʻangá ki he ngāue fakamalangá ʻo hangē ko ia ʻokú ke loto ki aí? ʻE malava nai ha tāimuʻa ke ngāue fakataha mo koe ʻi ha ngaahi taimi ʻi he taimi ʻoku ʻikai ke faingamālie ai ha kau malanga ʻe niʻihi.
8 ʻOku Fiemaʻu ʻa e Fengāueʻaki Lelei: Tuʻo ua ʻi he taʻu, ʻe fai ai ʻe he kau mātuʻá ha ngaahi fokotuʻutuʻu ki he kau malanga ʻoku nau fiemaʻu ha tokoni fakafoʻituitui ke kau ki he polokalama Tokoniʻi ʻe he Kau Tāimuʻá ʻa e Niʻihi Kehé. Kapau te ke loto ke maʻu ha tokoni pehē, ngāue fakataha mo e tokotaha malanga tāimuʻa ʻoku vaheʻi ke ne tokoniʻi koé, ngāueʻi ha taimi-tēpile ʻaonga ki he ngāue fakamalangá, pea piki ki ai. Tauhi ki hoʻomo aleá. ʻI hoʻomo ngāue fakatahá, fakatokangaʻi ʻa e ngaahi founga ola lelei ʻo hono ʻoatu ʻa e ongoongo leleí. Sivisiviʻi ʻa e ʻuhinga ʻoku ola lelei ai ʻa e ngaahi founga lea fakaofiofi kehekehe. Fakakaukau ki he ngaahi fokotuʻu ʻe ʻoatu nai ʻe he tokotaha malanga tāimuʻá ki hono fakaleleiʻi ʻa hoʻo tuʻuakí. ʻI hoʻo ngāueʻaki ʻa e ngaahi meʻa ʻokú ke akó, ʻe hoko ʻo hā mahino ai ʻa hoʻo laka ki muʻa ʻi he ngāue fakafaifekaú, fakatouʻosi kiate koe pea ki he niʻihi kehé. (Sio ki he 1 Timote 4:15.) Ngāue fakataha ki he lahi taha ʻe alalavá, kau ki he ngaahi tafaʻaki kotoa pē ʻo e ngāue fakafaifekaú, kau ai ʻa e faifakamoʻoni ʻi he founga ʻikai anga-mahení kae fakahangataha ki ha tafaʻaki pau pē ʻa ia ʻe fiemaʻu ai kiate koe ha tokoni fakafoʻituitui.
9 ʻE houngaʻia ʻa e ʻovasia ngāué ʻi he laka ki muʻa ʻe faí. ʻI he taimi ki he taimi, te ne vakai fakataha mo e tokotaha faiako ʻi he Ako Tohi ʻa e Fakatahaʻangá ke sio pe ʻoku founga fēfē ʻa hoʻo maʻu ʻa e ʻaonga mei he polokalamá. ʻE tokoniʻi foki koe ʻe he ʻovasia fakafeituʻú ʻi he taimi te ne ʻaʻahi ai ki he fakatahaʻangá.
10 ʻOku fiemaʻu ʻe Sihova hono kakaí ke akoʻi pea “sāuni ki he ngāue lelei fulipe.” (2 Tim. 3:17) Vakai ki he fokotuʻutuʻu ko e Tokoniʻi ʻe he Kau Tāimuʻá ʻa e Niʻihi Kehé ko ha tokonaki lelei ia ke tokoniʻi ʻa e faʻahinga ʻoku nau saiʻia ke fakaleleiʻi ʻenau malavá ke malangaʻaki ʻa e folofolá. Kapau ko ho monuú ia ke kau ki ai, fai pehē ʻaki ʻa e loto-hounga, anga-fakatōkilalo, mo e fiefia.