Ko ha Sīpinga ke Muimui Ofi ki Ai
1 Naʻe fokotuʻu ʻe Sīsū ha faʻifaʻitakiʻanga haohaoa ki heʻene kau ākongá. Neongo ʻoku ʻikai malava ke tau faitatau mo hono tuʻunga haohaoá, ʻoku naʻinaʻi mai ke tau “muimui ofi, ʻo topuvaʻe taha mo ia.” (1 Pita 2:21) ʻOku totonu ke tau holi ke hangē ko Sīsuú ʻi he lahi taha ʻe malavá, ʻo fakahā tōtōivi ʻa e moʻoní ki he niʻihi kehé.
2 Naʻe ʻikai ko ha tokotaha malanga pē ʻa Sīsū; naʻá ne hoko ko ha faiako laulōtaha. “Bea ofo ae kakai i he ene akonaki.” (Mt. 7:28, PM) Ko e hā ʻa e ʻuhinga naʻá ne mātuʻaki ola lelei aí? Tau vakai ange ki he “anga o ʻene faiako.”
3 Founga ke Tau Muimui Ai ʻia Sīsū: Naʻe akoʻi ʻa Sīsū ʻe heʻene Tamaí. (Sione 8:28) Ko ʻene taumuʻá ke fakalāngilangiʻi ʻa Sihova mo fakangeingeiaʻi ʻa Hono huafá. (Sione 17:4, 26) ʻI heʻetau ngāue fakamalanga mo faiakó, ʻoku totonu ko ʻetau taumuʻá ia ke fakalāngilangiʻi ʻa Sihova pea ʻoua ʻe fakahanga mai ʻa e tokangá kiate kitautolu.
4 Ko e meʻa kotoa pē naʻe akoʻi ʻe Sīsuú naʻe makatuʻunga ʻi he Folofola ʻa e ʻOtuá. Naʻá ne toutou lave ki he meʻa kuo tohi ʻi he Folofola fakamānavaʻí. (Mt. 4:4, 7; 19:4; 22:31) ʻOku fiemaʻu ke tau fakahanga ʻa e kau fanongó ki he Tohi Tapú; ʻoku tau ʻai ai kinautolu ke nau sio ko e meʻa ʻoku tau malangaʻí mo akoʻí ʻoku makatuʻunga ʻi he maʻuʻanga fakamatala māʻolunga tahá.
5 Naʻe ngāueʻaki ʻe Sīsū ʻa e ngaahi lea nounou, fakapotopoto, pea ʻikai ke fihi. Ko e fakatātaá, ʻi he fakamatala ʻo kau ki he founga ʻe lava ke tau maʻu ai ʻa e fakamolemole ʻa e ʻOtuá, naʻá ne fakalototoʻaʻi mai ke tau fakamolemoleʻi ʻe kitautolu ʻa e niʻihi kehé. (Mt. 6:14, 15) ʻOku totonu ke tau feinga ke fakamatalaʻi ʻa e pōpoaki ʻo e Puleʻangá ʻi he ngaahi lea faingofua.
6 Naʻe ngāuepōtoʻiʻaki ʻe Sīsū ʻa e ngaahi talanoa fakatātaá mo e ngaahi fehuʻí ke ueʻi ʻa e fakakaukau ʻa e niʻihi kehé. (Mt. 13:34, 35; 22:20-22) Ko e ngaahi talanoa fakatātā ʻo fekauʻaki mo e ngaahi meʻa ʻoku hoko fakaʻahó ʻoku malava ke tokoni ia ki he kakaí ke nau mahinoʻi ʻa e ngaahi tokāteline fihi ʻi he Tohi Tapú. ʻOku totonu ke tau ʻeke ʻa e ngaahi fehuʻi ʻokú ne fakalototoʻaʻi ʻa e kau fanongó ke nau fakakaukau atu ʻo fekauʻaki mo e meʻa ʻoku nau fanongo aí. ʻOku tokoni ʻa e ngaahi fehuʻi takí ke nau aʻu ai ki ha ngaahi fakamulituku totonu.
7 Naʻe vaheʻi ʻe Sīsū ha taimi ke fakamatalaʻi ai ʻa e ngaahi meʻa faingataʻá ki he faʻahinga naʻa nau kole ki ha fakamatala lahi angé. Ko e faʻahinga naʻe fiefanongo moʻoní, ʻo hangē ko ʻene kau ākongá, naʻe malava ke nau maʻu ʻa e ʻuhinga ʻo e meʻa naʻe akoʻi ʻe Sīsuú. (Mt. 13:36) ʻOku totonu ke tau fietokoni pehē ʻi he taimi ʻoku ʻeke loto-totonu mai ai ʻa e ngaahi fehuʻí. Kapau ʻoku ʻikai te tau ʻilo ʻa e ngaahi talí, ʻoku lava ke tau fekumi ki he kaveingá pea tau toe foki mo ha fakamatala ʻamui ange.
8 Naʻe ngāueʻaki ʻe Sīsū ʻi heʻene faiakó ʻa hono fakatātaaʻi ʻo e meʻa ko iá. Ko e fakatātā ʻo e meʻá ni ko ʻene fufulu ʻa e vaʻe ʻo ʻene kau ākongá, neongo ko honau ʻEikí ia. (Sione 13:2-16) Kapau te tau fakahāhā ha loto anga-fakatōkilalo, ʻe ueʻi ai ʻa e faʻahinga ʻoku akoʻí ke nau ngāueʻaki ʻa e meʻa ʻoku nau akó.
9 Naʻe ongo kia Sīsū ʻa e loto ʻo e kakaí pea mo ʻenau ʻofa ki he māʻoniʻoní. ʻOku fiemaʻu foki ke tau aʻu ki he loto ʻo e kakaí. ʻOku totonu ke tau ongoʻi ʻa e holi ʻoku fanauʻi pē mo e faʻahinga kotoa ʻo e tangatá ke lotu ki ha tokotaha māʻolunga ange pea nofo fakataha mo e niʻihi kehé ʻi he melino mo e fiefia.
10 ʻI he lolotonga ʻo Tīsemá ʻe lava ke tau fakahā atu ai ki he niʻihi kehé ʻa e ngaahi meʻa kuo tau ako fekauʻaki mo Sīsuú ʻaki hono tuʻuaki atu ʻa e tohi Ko ʻEku Tohi ʻo e Ngaahi Talanoa Faka-Tohitapú. Ko ʻetau faʻifaʻitaki ki he ngaahi founga faiako ʻa Sīsuú ʻe ueʻi nai ai ʻa e faʻahinga loto-totonú ke nau fanongo ki heʻetau fakamatalaʻi atu ʻa e meʻa naʻá ne akoʻí.—Mt. 10:40.