Fakahāhā ʻa e Houngaʻia ki he Fale ʻo e ʻOtuá
1 ʻI he kuonga ʻo e Tohi Tapú naʻe fekau ai ʻe Sihova ʻa ʻene kakaí ke nau fakataha fakatahataha maʻu pē ki hono falé. (Liv. 23:2) Naʻe tokoni ʻa e fakatahataha ko ení kiate kinautolu ke nau tauhimaʻu ʻenau fakakaukaú ʻi he folofola ʻa e ʻOtuá, maʻu ai ʻa e taimi ke fai ha fakalaulauloto, feohi, mo fetalanoaʻaki ʻo fekauʻaki mo e Lao ʻa Sihová. Naʻe hoko ʻo fakafonu ai honau ʻatamaí ʻaki ʻa e ngaahi fakakaukau ʻa e ʻOtuá, ʻa ia naʻe hoko mai ai ʻa e ngaahi tāpuaki fakalaumālie lahi ʻaupito. Naʻe hoko moʻoni eni ko ha ngaahi taimi fiefia. Naʻe tokoniʻi ʻe he fokotuʻutuʻu ko ení ʻa e fāʻūtaha mo e lotu maʻá. ʻOku ʻikai ke mahuʻinga siʻisiʻi ange ʻa e ngaahi fakatahataha ʻi he ʻahó ni ʻi he fale ʻo e ʻOtuá.
2 ʻOku Anga-Fēfē ʻEtau Fakahāhā ʻOku Tau Houngaʻia ʻi he Ngaahi Fakatahá? ʻOku lipooti mai mei he ngaahi fakatahaʻanga ʻe niʻihi ʻa e tō lalo ʻa e maʻu fakatahá. ʻOku faʻa taʻofi nai ʻe ha tuʻunga ʻo ha taha ʻa ʻene maʻu ʻa e fakatahá. Ka kuó ke fakaʻatā ʻa e fanga kiʻi palopalema iikí ke nau fakafaingataʻaʻiaʻi ʻa hoʻo maʻu maʻu pē ʻa e fakatahá? ʻOku fili nai ʻa e niʻihi ke nau nofo pē ʻi ʻapi ʻo kapau ʻoku nau kiʻi langaʻulu pe ongoʻi helaʻia ʻi he hili ha ngāue lahi. Kuo ongoʻi ʻe he niʻihi ia kuo pau ke nau nofo ʻo talitali fiefia ha ngaahi kāinga taʻetui ʻoku ʻaʻahi ange. Kuo aʻu ʻo liʻaki ʻe he niʻihi ia ʻa e ngaahi fakatahá koeʻuhi ka nau mamata ʻi ha polokalama mālie ʻi he TV pe ko ha sipoti ʻoku fai. Ko e tuʻunga ʻoku ʻi ai ʻa e houngaʻiá ʻi he ngaahi meʻá ni ʻoku ʻikai ke tatau ia mo e holi loto-moʻoni naʻe fakahāhā ʻe he ngaahi foha ʻo Kolá: “ʻOku holi hoku laumalie, ʻio ʻoku ne pongia he fiemaʻu ʻa e ngaahi lotoʻā ʻo Sihova.”—Sāme 84:2.
3 Neongo ʻoku lahi fau ʻa e meʻakai fakalaumālie ʻoku tokonaki mai ʻi he ngaahi fakatahá, ʻoku ʻi ai ha niʻihi ʻi he kau fanongó ʻoku ʻikai te nau fanongo tokanga. ʻOku nau fakaʻānaua nai, ʻo fakakaukau ki he ngaahi meʻa ʻo e ʻaho ko iá, pe kiʻi tulemohe. Kuo ʻilo ʻe he tokolahi ko hono hiki ha kiʻi noutí ʻoku tokoni ia ke nau ʻāʻā ai mo tokanga ki he meʻa ʻoku leaʻakí. Ko hono tohi ha ngaahi meʻa, ʻoku toe maongo ai ʻa e fakamatalá ki he ʻatamaí. ʻIkai ko ia pē, ko e teuteu ki muʻá ko ha tokoni ia ke maʻu ai ʻa e nonga kakató. Kapau ʻoku tau teuteu lelei, te tau malava ai “ke ʻasili ai ʻetau fakatokanga.”—Hep. 2:1.
4 ʻOku fiemaʻu ki he fānaú pea pehē ki he kakai lalahí ke nau maʻu ʻa e fakamatala ʻoku ʻomai ʻi he ngaahi fakatahá. ʻE mātuʻaki fakangatangata ʻa e meʻa ʻe ako ʻe he fānaú ʻo kapau ʻoku ʻoange ʻe he ngaahi mātuʻá ha ngaahi meʻavaʻinga mo ha ngaahi tohi tāvalivali ke nau femoʻuekina mo nau fakalongolongo ai. ʻOku ʻikai ko ha akonaki totonu ia ʻa hono fakaʻatā ʻa e fānaú ke vaʻinga, talanoa, tangi, pe fai ha ngaahi meʻa kehe ʻo hohaʻaʻia ai ʻa e faʻahinga ʻoku tangutu ofi maí. Ko e faʻa ʻalu noaʻia ki he falemālōloó pe ko e ʻalu ʻo inu he lolotonga ʻa e fakatahá ʻe faʻa siʻisiʻi ia ʻi ha ʻilo ʻe he kiʻi tamá te ne ʻalu maʻu pē mo ha taha ʻo ʻene ongo mātuʻá.
5 ʻOku Mahuʻinga ʻa e Tauhi-Taimí: ʻOku faʻa hoko, ʻo taʻofi nai kitautolu ʻe ha ngaahi tuʻunga taʻealakalofi mei haʻatau aʻu taimi totonu ki ha fakataha, ka ko e angaʻaki ʻa e aʻu tōmui ʻi he hili ʻa e hiva mo e lotu kamatá ʻoku fakahaaʻi ai ʻa e ʻikai ha ʻapasia ki he taumuʻa toputapu ʻo e ngaahi fakatahá pea mo hotau fatongia ke fakaʻehiʻehi mei hano fakahohaʻasi ʻa e niʻihi kehé. Manatuʻi ko e hiva mo e lotu fakataha mo hotau ngaahi tokouá ʻi he ngaahi fakataha ʻa e fakatahaʻangá ko e konga ia ʻo ʻetau lotú. Ko e angaʻaki ʻa e fakatuotuaí ʻoku faʻa tupu ia mei he ʻikai fokotuʻutuʻu maaú pe ʻikai palani ki muʻá. Ko e tauhi-taimí ʻoku fakahaaʻi ai ʻoku tau tokaʻi mo houngaʻia ʻi heʻetau ngaahi fakatahá.
6 ʻI he fakaʻau ke toe ofi ange ʻa e ʻahó, ʻoku fakaʻau ai pē ke toe lahi ange ʻa e fiemaʻu ke fakataha fakatahatahá. (Hep. 10:24, 25) Tau fakahāhā ʻetau houngaʻiá ʻaki hono maʻu maʻu pē ia, teuteu ki muʻa, tauhi-taimi, tokanga lelei, pea ngāueʻaki ʻa e meʻa ʻoku tau akó.