Foaki ha Meʻa Lahi—Fiemaʻu ha Meʻa Lahi
1 Ko e monūʻia lahi ē ka ko kitautolu ʻi heʻetau maʻu ʻa e moʻoní! Koeʻuhi ko ʻetau fakatapui kia Sihová ‘kuo tuku kiate kitautolu ʻa e Kosipeli.’ (1 Tes. 2:4) ʻI he meʻa ko ʻení ʻoku tau maʻu ai ha fatongia lahi ange. Naʻe pehē ʻe Sīsū: “Pea ko ia kuo foaki ki ai ha meʻa lahi, ʻe fiemaʻu mei ai ha meʻa lahi.”—Luke 12:48e.
2 Ko e moʻoni ē ka ko e ngaahi lea ko ia! Koeʻuhi he ko kitautolu kotoa kuo tau maʻu ʻa e tāpuaki ʻa ia ko e ʻilo ʻo e Folofola ʻa e ʻOtua, ko ha feohi fiefia mo e ngaahi tokoua, ko ha ʻamanaki fakaofo, ʻe lava ke moʻoni ʻa e pehē kuo lahi ʻa e meʻa kuo ʻomai kiate kitautolú. Pea ʻoku ʻuhinga lelei, ʻa e ʻamanekina ha meʻa lahi ko hono fetongi.
3 Tauhi Maʻu ha Fakakaukau Totonu ʻo e Ngaahi Fiemaʻú: Kuo fakaʻosiʻaki ʻe he niʻihi ia ʻoku fuʻu lahi ʻa ia ʻoku fiemaʻu meiate kitautolu. Naʻe fakapapauʻi ʻe Sīsū Kalaisi ko e ʻUlu ia ʻo e fakatahaʻanga Kalisitiane, ʻa e “meʻa oku tokoni aki” ke ngāue lelei ia. (ʻEf. 4:15, 16, PM) ʻOkú ne fakapapauʻi mai kiate kitautolu ko ‘ʻene ioke ʻoku molū pea ko ʻene kavenga ʻoku maʻamaʻa.’ (Mt. 11:28-30) ʻOkú ne anga-ʻofa ʻo fakaʻatuʻi kiate kinautolu ʻoku ʻi ai ha nau ngaahi fakangatangatá. (Luke 21:1-4) Kapau te tau ʻoatu ʻetau lelei tahá, tatau ai pē pe ko e hā ʻa hono lahí, ʻe tāpuakiʻi kitautolu.—Kol. 3:23, 24.
4 ʻEke pē kiate koe, ‘Ko e ngaahi meʻa mahuʻinga ʻo e Puleʻangá ʻoku muʻomuʻa ʻi heʻeku moʻuí? ʻOku ou ngāueʻaki hoku taimí mo ʻeku ngaahi koloá ʻi ha founga ʻe iku ai ki ha fakamālō ki he huafa ʻo e ʻOtuá mo ʻaonga ki he niʻihi kehé? Ko ʻeku fiefia lahi tahá ʻoku maʻu ia ʻi he ngāue ʻa Sihová kae ʻikai mei he fiefia siokita ʻo e ngaahi meʻa fakamatelie?’ Ko ʻetau tali faitotonu ki he ngaahi fehuʻi ko ʻení ʻokú ne fakahā ʻa e ueʻi ʻo hotau lotó.—Luke 6:45.
5 Fakaʻehiʻehi mei Hano Fakataueleʻi ke Fai ʻa ia ʻOku Kovi: Naʻe ʻikai pehē ia ki muʻa, ʻa e lahi ʻo e ngaahi fakatauele mo e ngaahi fakaʻaiʻai ki he siokitá, mānumanú, mo e ʻofa ki he fiefia fakakakanó. ʻOku tau fehangahangai ʻi he ʻaho kotoa pē mo e ngaahi pole fakaeʻulungaanga, mo e ngaahi fakatauele ke fakangaloku. ʻOku pau ke tau kole kia Sihova ke tokoniʻi kitautolu, kae lavameʻa ʻa ʻetau fetaulaki mo e ngaahi pole ko ʻení. (Mt. 26:41) ʻOku lava ke ne ʻai kitautolu ke tau mālohi ʻo fakafou mai ʻi hono laumālié. (ʻAi. 40:29) Ko ha tokoni lahi ia ʻa hono lau fakaʻaho ʻo e Folofola ʻa e ʻOtuá. (Sāme 1:2, 3) ʻOku kaunga lahi ʻa e akonakiʻi pē kita ʻe kitá mo e mapuleʻi-kitá.—1 Kol. 9:27.
6 ʻOku ʻikai feʻunga pē ʻa e ʻofa ki he meʻa ʻoku leleí—ʻoku pau ke tau fehiʻa foki ki he meʻa ʻoku koví. (Sāme 97:10) ʻOku ʻuhinga ʻeni ke ʻoua ʻe fakatupulekina ʻa e fakaʻamu ki he ngaahi meʻa ʻoku koví. ʻOku fakahokohoko ʻa e ngaahi meʻa ʻe fitu ʻa ia ʻoku fehiʻa ai ʻa Sihová ʻi he Palōvepi 6:16-19. ʻOku hā mahino, ke fakahōifua ha taha kia Sihova ʻoku pau foki ke fehiʻa ia ki he ngaahi meʻa peheé. Kuo tāpuakiʻi kitautolu ʻaki ha ʻilo kānokano ʻo e moʻoní, pea ʻoku totonu ke tau loto ke ngāue ʻo fakatatau mo e ʻilo ko iá, fakamaʻu ʻa hotau ʻatamaí ki he ngaahi meʻa lelei.
7 ʻOku totonu ke lotu ki ha ngaahi tuʻunga ʻoku fakaʻatā ai kitautolu ke “tupulekina maʻu ai pe ʻi he ngāue ʻa e ʻEiki.” (1 Kol. 15:58) Kuo pehē ʻe he tokolahi ko ha taimi-tēpile femoʻuekina ʻi he ngāue ʻa Sihová ko ha maluʻi ia koeʻuhi ʻoku siʻisiʻi ai ʻa e taimi ke tulimui ki he ngaahi meʻa taʻeʻaongá.
8 ʻI he fakakaukauʻi ʻa e ngaahi meʻá kotoa, ʻoku ʻuhinga totonu pē ʻa ia ʻoku fiemaʻu ʻe Sihova meiate kitautolu. (Mai. 6:8) ʻOku tau maʻu ʻa e ʻuhinga lelei ke houngaʻia ki he monū ʻo e ngāué taki taha. (ʻEf. 5:20) Ko ia ai “tau fakafitefitaʻa ki ai mo tau,” ʻo tuipau ko hotau palé ʻe lahi ange ʻaupito ia ʻi ha meʻa pē ʻoku fiemaʻu meiate kitautolu.—1 Tīm. 4:10.