Fanongonongo ha Ui Loto-Māfana ʻe he Fakataha-Lahi Fakavahé!​—Fakahīkihikiʻi Fiefia ʻa Sihova ʻi he ʻAho ki he ʻAho!

¹ “Kaeʻumaʻā kapau ʻoku ʻikai mahino ʻa e lea ʻa e talupite, ko hai te ne teu ke fakahoko tau?” ko e fehuʻi ia ʻa e ʻaposetolo ko Paulá. (1 Kol. 14:8) ʻE mahino mo leʻo lahi ʻa e ui ʻe fai ʻi he Fakataha-Lahi Fakavahe ko e “Kau Fakahīkihikiʻi Fiefia”! Ko e hā ʻa e uí. Ko e pōpoaki fakalotomāfana ē ke ‘Fakahīkihikiʻi fiefia ʻa Sihova ʻi he ʻaho kotoa!’ ʻE fonu ʻa e polokalama ʻo e fakataha-lahí ʻi he ngaahi ʻuhinga mālohi ki heʻetau fakahīkihikiʻi maʻu ai pē ʻa e Tuʻi ʻo ʻītaniti, ko Sihová.​—Sāme 35:​27, 28.

² ʻOku tala ʻe he ngaahi langi fakaofó ʻa e lāngilangi ʻo Sihová ʻa e ‘ʻaho ko é ki he ʻaho ko é.’ (Sāme 19:​1-3) Kapau ko e ngaahi meʻa fakatupu ʻoku maté mo ʻikai hanau leʻó ʻoku nau fai ʻa e fakahīkihiki maʻu ai pē kia Sihová, ʻikai ʻoku totonu ke tau ongoʻi ʻoku ueʻi kitautolu ko e faʻahinga ʻo e tangata maʻu-ʻatamaí ke hiki hake hotau leʻó ʻi he fakahīkihiki kiate ia ʻi he taimi kotoa pē koeʻuhi ko hono ngaahi ʻulungaanga ʻoku ʻikai hano tataú mo e ngaahi meʻa ʻokú ne malavá? Ko hai ʻoku taau lahi ange ki ai ʻa ʻetau fakahīkihiki fiefiá ʻi hotau Tokotaha-Fakatupu fakaofó?​—Sāme 145:​3, 7.

³ Mei he ʻAho ki he ʻAho: Naʻe tohi ʻe he tokotaha-tohi-sāme fakamānavaʻí: “Fakaha atu ene fakamoui mei he aho ki he aho. He oku lahi a Jihova, bea totonu ke fakamalo lahi kiate ia.” (Sāme 96:​2, 4, PM) ʻOku kaunga pē ʻeni ki he kau tāimuʻá? ʻIkai! ʻOku ʻuhinga ʻení ko kitautolu hono kotoa ʻoku totonu ke tau lava ʻo lea ki he niʻihi kehé ʻo fekauʻaki mo Sihova ʻi ha taimi pē mo ha feituʻu pē, naʻa mo e ngaahi ʻaho ʻoku ʻikai te tau kau ai ki he ngāue fakamalanga fale-ki-he-fale? ʻIo! ʻOku fakavavevave ʻa e fiemaʻu ke fakahīkihikiʻi fakaʻaho ʻa Sihova mo tala ki he niʻihi kehé ʻo fekauʻaki mo e founga ʻo ʻene fakamoʻuí. Kuo pau ke ʻilo ʻe he kakaí ko Sihova ʻa e Tuʻi Taʻengatá pea kuó Ne ʻosi tuku ʻa e tuʻunga-pule ki he māmaní ki Hono ʻAlo kuo fakalāngilangiʻi, ko Sīsū Kalaisi. Ko e ʻofa kia Sihova mo e kakaí te ne ʻai kitautolu ke tau lea maʻu ai pē ʻo fekauʻaki mo e pōpoakí ni mo ʻene ngaahi tokonaki ki he fakamoʻuí ʻi ha feituʻu pē ʻe ʻi ai ha kakai.​—Sāme 71:15.

⁴ ʻI he ʻaho kotoa pē ʻo ʻene ngāue fakafaifekau ʻi māmaní, naʻe fokotuʻu ai ʻe Sīsū Kalaisi ʻa e faʻifaʻitakiʻanga lelei tahá ko ha tokotaha fakahīkihiki lea totonu ʻa Sihova. Naʻá ne pehē: “Oku ou fakafetai kiate koe, e Tamai, ko e Eiki oe lagi mo mamani.” (Mt. 11:​25, PM) Naʻá ne fai ki heʻene leá, ʻi ha feituʻu pē naʻe ʻi ai ʻa Sīsū, naʻá ne fakahīkihikiʻi fakahāhā ʻa Sihova. ʻI ha feituʻu pē ʻe fakatahataha ai ʻa e kakaí​—tatau pē ʻi he ngaahi sinakoké, ʻi he temipale ʻi Selusalemá, ʻi ha funga moʻunga, pe ʻi he matātahí—​naʻá ne fakahīkihikiʻi ʻa Sihova. Kapau te tau muimui ofi ʻi he topuvaʻe ʻo Sīsuú ʻaki hono tauhi maʻu fakaʻaho, maʻu ai pē ʻa e ngāue ko hono hiki hake fakahāhā ʻa Sihová, te tau maʻu ʻa e ngaahi ola fakafiefia-loto mo fakatupu-fiefia.

⁵ Tali ʻa e Uí: Te ke tali ʻa e ui ke fakahīkihikiʻi fakahāhā ʻa Sihová ʻi he ʻaho taki taha? Manatuʻi, ʻoku ʻikai ha fakangatangata lau taʻumotuʻa. ʻOku fakaafeʻi ʻe he Sāme 148:12 ʻa e kau talavou, kau finemui, kau mātuʻa, mo e tamaiki tangatá ke fakahīkihikiʻi ʻa Sihova. Kau talavou, te mou fakahīkihikiʻi ʻa Sihova ʻi he lotolotonga ʻo e kaungāakó mo e kau faiakó? Kakai lalahi, kuo fanongo ʻa kinautolu ʻoku mou ngāue ʻi he feituʻu ʻokú ke ngāue aí ʻo fekauʻaki mo Sihova mo ʻene ngaahi taumuʻá, ʻi he ʻi ai ha taimi feʻungamālie ke fetalanoaʻaki aí? ʻOku totonu kiate kitautolu hono kotoa ke tau ʻai ʻa e lea ʻo fekauʻaki mo Sihová ko e konga ia ʻo ʻetau moʻuí ʻo hangē ko e mānavá mo e kaí. Kapau ʻe ʻikai tokanga ʻa e kakai loto-noá ki he meʻa ʻoku tau leaʻakí, ʻoku ʻi ai ha Tokotaha ʻoku tokanga mai, pea te ne fakapaleʻi kitautolu.​—Mal. 3:16.

⁶ ʻI he fakaofi mai ʻa e ngataʻangá, ʻoku aʻu atu ʻa e uí ki he ngaahi ngataʻanga ʻo e māmani: “Mou fakamalo [“fakahīkihikiʻi,” NW] kia Jihova.” (Sāme 106:1, PM) ʻOfa ke hoko ʻa ʻetau kaila fakahīkihikí ʻo fakaʻau ke leʻo lahi ange ʻi he ʻosi atu ʻa e ʻaho taki taha ke ʻilo kotoa ko e Tokotaha ʻa ia ko hono huafa ko Sihová ko e Fungani Māʻolunga ʻi he māmani kotoa.​—Sāme 83:18.