Teuteu ki he Ngāue Makasini ʻi ʻEpeleli

Hangē ko ia ʻoku fakaʻilongaʻi ʻi heʻetau 1996 Calendar, ko e Kai Efiafi ʻa e ʻEikí ʻe kātoangaʻi ʻi he taʻú ni ʻi ʻEpeleli 2. ʻI hono fakalototoʻaʻi ʻe he kātoanga molumalú ni, ʻai ke kau ʻa e tokotaha kotoa pē ʻi hono tufaki faivelenga ʻo e makasiní ʻi ʻEpeleli kotoa. Ko ha ngaahi makasini taimi totonu ē te tau ngāueʻaki! Ko e Taua Leʻo ʻo ʻEpeleli 1 te ne fakahangataha ki he malanga fakahāhā ʻo e fakataha-lahi fakavahe kuo ʻosí, “Fakahīkihikiʻi ʻa e Tuʻi ʻo ʻĪtaniti!” Ko e Taua Leʻo ʻo Mē 1 ʻoku ʻi ai ʻa e kaveinga ʻo e malanga fakahāhā makehe ʻo ʻEpeleli kuo ʻosí, “ʻOku Ofi ʻa e Ngataʻanga ʻo e Lotu Loí.” Ko e malanga makehe ʻo e taʻu ní ʻi ʻEpeleli 21, “Tuʻumaʻu Taʻehalaia ʻi he Lotolotonga ʻo ha Toʻutangata Anga-Pikopiko,” ʻoku totonu ke fakatupu fakaʻaiʻai ke ngāue mālohi mo vave ange.

ʻI hono hoko atu ki he feingangāue ʻo e Ongoongo ʻo e Puleʻangá ʻi he ʻEpeleli kuo ʻosí, ko ʻEpelelí ni ʻe totonu ke hoko ko ha māhina tuʻu-ki-muʻa ki hono tufaki ʻo e makasiní. Ko e taimi ʻeni ke fai ai ha ngaahi fokotuʻutuʻu. Ko e tokolahi te nau fiemaʻu ke hoko ko e kau tāimuʻa tokoni. Fakatatau ki he fiemaʻú, ko e ngaahi tatau lahi ange ʻo e ngaahi makasini ʻo ʻEpelelí ʻoku totonu ke kole ki ai. ʻE lava ke fai ha ngaahi fokotuʻutuʻu ki he Ngaahi ʻAho Makasiní, ko e tokotaha kotoa ʻe ala kau ki ai​—ʻi he pongipongi, hoʻatā, mo e/pe efiafi. ʻOfa ke hoko kotoa ʻa kitautolu ko e “kau fai ki he folofola.” Hangē ko ia naʻe tala ki muʻa ʻo fekauʻaki mo e Mīsaiá ʻi he Sāme 69:9, ʻofa ke tau leaʻaki foki ʻo pehē: “Ko e mamahiʻi ʻo ho fale te ne kai ʻo ʻosi au.”​—Sēm. 1:​22; Sione 2:​17.